କେନ୍ଦ୍ରାପଡ଼ା ଅଫିସ,୮ା୧: କେନ୍ଦ୍ରାପଡ଼ା ସହରର ଶାମଗୁଡ଼ିଆସ୍ଥିତ ଜିଲା ମାତୃ ଓ ଶିଶୁ ମଙ୍ଗଳ ହସ୍ପିଟାଲ ଉଦ୍ଘାଟିତ ହେବାର ଫଳକ ଲଗାଯିବା, ପୁଣି ହଟାଯିବା ଭଳି ଘଟଣା ଶୁକ୍ରବାର ଚର୍ଚ୍ଚାର ବିଷୟ ହୋଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗତ ଡିସେମ୍ବର ୧୫ରେ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା କାର୍ଡ ବଣ୍ଟନ ଉତ୍ସବ ଅବସରରେ ଏହି ହସ୍ପିଟାଲକୁ ଉଦ୍ଘାଟନ କରିଥିଲେ। ତାହାର ଫଳକ ଲଗାଯିବା କାର୍ଯ୍ୟକ୍ରମ ଶୁକ୍ରବାର ପୂର୍ତ୍ତ ବିଭାଗ ପକ୍ଷରୁ ଆୟୋଜନ କରାଯାଇଥିଲା। ଏଥିପାଇଁ ସ୍ଥାନୀୟ ବିଧାୟକ ଶଶିଭୂଷଣ ବେହେରାଙ୍କୁ ନିମନ୍ତ୍ରଣ କରାଯାଇଥିଲା। ହେଲେ କ’ଣ ହେଲା କେଜାଣି ପୂର୍ତ୍ତ ବିଭାଗ ପକ୍ଷରୁ ଫଳକକୁ କାଢ଼ି ନିଆଗଲା। ଏ ସମ୍ପର୍କରେ ବିଧାୟକ ବେହେରାଙ୍କୁ ପଚାରିବା ପାଇଁ ତାଙ୍କ ମୋବାଇଲ ଫୋନକୁ ଯୋଗାଯୋଗ କରାଯାଇଥିଲେ ମଧ୍ୟ ସେ କଲ୍ ଗ୍ରହଣ କରି ନ ଥିଲେ। ସେହିପରି ପୂର୍ତ୍ତ ବିଭାଗ ସହକାରୀ ଯନ୍ତ୍ରୀ ପ୍ରସନ୍ନ କୁମାର ସାମଲଙ୍କୁ ପଚରାଯିବାରୁ ସେ କହିଛନ୍ତି, ହସ୍ପିଟାଲ ନିର୍ମାଣ କାର୍ଯ୍ୟର ଚୂଡାନ୍ତ ରୂପ ଦିଆଯାଉଛି। ଖୁବ୍ଶୀଘ୍ର ମୁଖ୍ୟମନ୍ତ୍ରୀଙ୍କ ଦ୍ୱାରା ଉଦ୍ଘାଟିତ ନାମଫଳକ ହସ୍ପିଟାଲରେ ଲଗାଯିବ। କିନ୍ତୁ କାହିଁକି ଫଳକ କାଢ଼ି ନିଆଗଲା ତାହା ସେ କହି ନ ଥିଲେ। ଅନ୍ୟପକ୍ଷରେ ମୁଖ୍ୟମନ୍ତ୍ରୀଙ୍କ ଦ୍ୱାରା ଉଦ୍ଘାଟିତ ହସ୍ପିଟାଲକୁ ଆଉଥରେ ଉଦ୍ଘାଟନ କରିବାର ଚାଲ୍ ଫିକା ପଡ଼ିଛି ବୋଲି ଚର୍ଚ୍ଚା ହେଉଛି। ଏପରି କି ଉପର ମହଲରୁ ନିର୍ଦ୍ଦେଶ ମିଳିବା ପରେ ଫଳକ କାଢ଼ି ନିଆଯାଇଥିବା ଆଲୋଚନା ହେଉଛି।
କେନ୍ଦ୍ରାପଡ଼ା ଜିଲାର ସ୍ବାସ୍ଥ୍ୟସେବାକୁ ତ୍ୱରାନ୍ବିତ କରିବା ପାଇଁ ଶାମଗୁଡିଆଠାରେ ୨୦୧୬ ଡିସେମ୍ବରରେ ଏହି ହସ୍ପିଟାଲର ଶିଳାନ୍ୟାସ ହୋଇଥିଲା। ନିର୍ମାଣ କାର୍ଯ୍ୟ ଅଦ୍ୟାବଧି ସରିନାହିଁ। ମୁଖ୍ୟ ଫାଟକ ସମେତ ହସ୍ପିଟାଲର ବିଭିନ୍ନ କୋଠରିର ନିର୍ମାଣ କାର୍ଯ୍ୟ ଚାଲିଛି। ଏହାସହ ଡାକ୍ତର, ରୋଗୀଙ୍କ ପ୍ରକୋଷ୍ଠ ପ୍ରସ୍ତୁତ ହୋଇନାହିଁ କି ଆବଶ୍ୟକ ଯନ୍ତ୍ରପାତି ପହଞ୍ଚତ୍ ନାହିଁ। ବିଜୁଳି ଓ ପାନୀୟ ଜଳ ବ୍ୟବସ୍ଥା କରାଯାଉଛି। ହସ୍ପିଟାଲ ନିର୍ମାଣାଧୀନ ଥିବାରୁ ନିକଟବର୍ତ୍ତୀ ସ୍ଥାନରେ ପିଣ୍ଡି ନିର୍ମାଣ କରି ଶୁକ୍ରବାର ସେଥିରେ ଉଦ୍ଘାଟନ ଫଳକ ସ୍ଥାପନ କରାଯାଇଥିଲା। ସେଥିରେ ବିଧାୟକଙ୍କ ନାମ ମଧ୍ୟ ରହିଥିଲା। କିନ୍ତୁ ହଠାତ୍ ଫଳକ କାଢ଼ି ନିଆଯାଇଥିଲା।