ଭୁବନେଶ୍ୱର, ୨୩।୯(ବ୍ୟୁରୋ):ଏଣିକି ରାଜଧାନୀରେ ଥିବା ଐତିହ୍ୟସ୍ଥଳୀଗୁଡ଼ିକରେ ଅସମାନ ସାଇନ୍ ବୋର୍ଡ ରହିବ ନାହିଁ। ସେହିପରି ଐତିହ୍ୟସ୍ଥଳର ନିର୍ଦ୍ଧାରିତ ପରିସୀମା ଭିତରେ କେହି ମନଇଚ୍ଛା ସାଇନ୍ବୋର୍ଡ ଲଗାଇପାରିବେ ନାହିଁ। ଏନେଇ ମଙ୍ଗଳବାରଠାରୁ କଟକଣା ଲଗାଇଛି ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ)। ଏଣିକି ଗୋଟିଏ ରଙ୍ଗ ଓ ସମାନ ଉଚ୍ଚତାର ସାଇନ୍ବୋର୍ଡ ଲଗାଯିବ। ଓଡ଼ିଶା ଉନ୍ନୟନ କର୍ତ୍ତୃପକ୍ଷ (ଓଡ଼ିଏ)ଙ୍କ ନିୟମ ଆଧାରରେ ବିଡିଏ ଏହି ନିଷ୍ପତ୍ତି ନେଇଛି। ଏହାକୁ ଉଭୟ ବ୍ୟବସାୟୀ ଓ ସାଧାରଣ ଲୋକଙ୍କ ଘର ପାଇଁ ମଧ୍ୟ ବାଧ୍ୟତାମୂଳକ କରାଯାଇଥିବା ବିଡିଏ ପକ୍ଷରୁ ପ୍ରକାଶ ପାଇଛି।
ତେବେ ପ୍ରାଥମିକ ପର୍ଯ୍ୟାୟରେ ସହରର ୩ ଐତିହ୍ୟସ୍ଥଳରେ ଲାଗିଥିବା ସାଇନ୍ବୋର୍ଡ ୟୁନିଫର୍ମାଟିକ୍ ହେବ। ଏକାମ୍ରକ୍ଷେତ୍ର ହେରିଟେଜ୍ ଜୋନ୍ (ପୁରୁଣା ଭୁବନେଶ୍ୱର), ଐତିହାସିକକ୍ଷେତ୍ର ହେରିଟେଜ୍ ଜୋନ୍ (ଶିଶୁପାଳଗଡ଼) ଓ ସାଂସ୍କୃତିକ କ୍ଷେତ୍ର ହେରିଟେଜ୍ ଜୋନ୍ (ଧଉଳି)ରେ ଏହି ନିୟମ ଲାଗୁ କରାଯିବ। ପରବର୍ତ୍ତୀ ସମୟରେ ସହରର ଅନ୍ୟ ସ୍ଥାନଗୁଡ଼ିକରେ ମଧ୍ୟ ଏହି ନିୟମକୁ କଡ଼ାକଡ଼ି ଭାବେ ପାଳନ କରିବା ପାଇଁ ବିଭାଗ ଲକ୍ଷ୍ୟ ରଖିଛି ବୋଲି ବିଡିଏ ଆସିଷ୍ଟାଣ୍ଟ ଟାଉନ୍ ପ୍ଲାନର ସୁପର୍ଣ୍ଣା ଦାସ କହିଛନ୍ତି। ସେ କହିଛନ୍ତି, ରାଜଧାନୀରେ ଥିବା ହେରିଟେଜ୍ ଜୋନ୍ଗୁଡ଼ିକରେ ପର୍ଯ୍ୟଟକଙ୍କୁ ଏହା ନିଶ୍ଚିତ ଆକୃଷ୍ଟ କରିବ। ଏହି ସ୍ଥାନଗୁଡ଼ିକରେ ଯେଉଁ ସାଇନ୍ଏଜେ ଲାଗିବ ତାହାର ପୋଲ୍ ଏକା ପ୍ରକାର ସହିତ କଲର୍, ଲେଖାର ସାଇଜ୍ ଓ ଉଚ୍ଚତା ମଧ୍ୟ ସମାନ ରହିବ। ଗୋଟିଏ ପ୍ରକାର ଡିଜାଇନ୍କୁ ଗୁରୁତ୍ୱ ଦିଆଯିବା ସହ ପର୍ଯ୍ୟଟକଙ୍କୁ କିପରି ଏହା ଆକୃଷ୍ଟ କରିବ ସେଥିପ୍ରତି ଗୁରୁତ୍ୱ ପ୍ରଦାନ କରାଯିବ। ଏଥିରେ ୫ ପ୍ରକାର ସାଇନ୍ଏଜ୍ ରଖାଯାଇଥିବା ବେଳେ ୨ ପ୍ରକାର ମ୍ୟାପ୍, ଦୋକାନୀ, ବିଲ୍ଡିଂ ଓ ଘରର ନାମ ଲେଖାକୁ ମଧ୍ୟ ସ୍ଥିର କରାଯାଇଛି ବୋଲି ସେ କହିଛନ୍ତି।
ନୂଆ ଡିଜାଇନ୍ ଦ୍ୱାରା ଐତିହ୍ୟସ୍ଥଳୀଗୁଡ଼ିକର କଳାକୃତିକୁ ଗୁରୁତ୍ୱ ଦିଆଯାଇଛି। ସିଡିପି ୨୦୩୦ରେ ହେରିଟେଜ୍ ଡିଷ୍ଟ୍ରିକ୍ଟ କରାଯାଇଛି। ଏଥିରେ ଥିବା ୩ଟି ଜୋନ୍ରେ ପ୍ରଥମେ ଏହି ନିୟମ ଲାଗୁ କରାଯିବା ପାଇଁ ସ୍ଥିର ହୋଇଥିବା ବେଳେ ବିଡିଏର ୧୩୬ତମ ବୈଠକରେ ଏନେଇ ନିଷ୍ପତ୍ତି ହୋଇଥିଲା। ଯାହାକୁ ୧୮ ତାରିଖ ରାଜ୍ୟ ସରକାର ଅନୁମତି ଦେବା ପରେ ଏହି ନିୟମ ଲାଗୁ ହୋଇଛି ବୋଲି ସୁପର୍ଣ୍ଣା କହିଛନ୍ତି।