ନୂଆଦିଲ୍ଲୀ, ୨୪।୭(ପି.ଟି.): ୨୦୧୮ ଏସିଆନ ଗେମ୍ସରେ ରୌପ୍ୟ ପଦକ ବିଜୟୀ ଭାରତୀୟ ୪x୪୦୦ ମିଟର ମିକ୍ସଡ ରିଲେ ଦଳ ଏବେ ସ୍ବର୍ଣ୍ଣ ପଦକ ପାଇବାକୁ ଯୋଗ୍ୟ ବିବେଚିତ ହୋଇଛି। ଏହି ଇଭେଣ୍ଟରେ ସ୍ବର୍ଣ୍ଣ ପଦକ ଜିତିଥିବା ବାହାରିନ ଦଳର ଜଣେ ରନର ଡୋପ ଟେଷ୍ଟରେ ଧରା ପଡ଼ିବାରୁ ପୂରା ଦଳକୁ ଅଯୋଗ୍ୟ କରାଯାଇଛି। ଫଳରେ ଭାରତର ରୌପ୍ୟ ପଦକ ଅପଗ୍ରେଡ୍ ହୋଇଛି। ବାହାରିନ୍ର କେମି ଆଡେକୋୟା ଡୋପଟେଷ୍ଟରେ ବିଫଳ ହୋଇ ଆଥଲେଟିକ୍ସ ଇଣ୍ଟିଗ୍ରିଟି ୟୁନିଟ(ଏଆଇୟୁ) ଦ୍ୱାରା ୪ ବର୍ଷ ବାସନ୍ଦ ହୋଇଥିବାରୁ ପୂରା ଦଳକୁ ନିରାଶ ହେବାକୁ ପଡ଼ିଛି। ମହିଳା ୪୦୦ ମିଟର ହର୍ଡଲ୍ସରେ ଆଡେକୋୟା ସ୍ବର୍ଣ୍ଣ ପଦକ ଜିତିଥିଲେ। ସେ ଅଯୋଗ୍ୟ ବିବେଚିତ ହେବାରୁ ଏହି ଇଭେଣ୍ଟରେ ୪ର୍ଥ ସ୍ଥାନ ହାସଲ କରିଥିବା ଭାରତର ଅନୁ ରାଘବନ ବ୍ରୋଞ୍ଜ ପଦକ ପାଇବାକୁ ହକ୍ଦାର ହୋଇଛନ୍ତି।
ଭାରତୀୟ ୪x୪୦୦ ମିଟର ମିକ୍ସଡ ରିଲେ ଦଳରେ ମହମ୍ମଦ ଆନାସ, ଏମ.ଆର. ପୁଭମ୍ମା, ହିମା ଦାସ ଓ ଆରୋକିଆ ରାଜୀବ ସାମିଲ ଥିଲେ। ଏମାନେ ୩:୧୫:୭୧ ସେକେଣ୍ଡ ସମୟ ନେଇ ବାହାରିନ(୩:୧୧:୮୯) ପଛକୁ ଦ୍ୱିତୀୟ ସ୍ଥାନରେ ରହିଥିଲେ। ଜାକର୍ତ୍ତାରେ ଅନୁଷ୍ଠିତ ଏହି ପ୍ରତିଯୋଗିତାର ମହିଳା ୪୦୦ ମିଟର ହର୍ଡଲ୍ସରେ ଭାରତର ଅନୁ ୫୬.୯୨ ସେକେଣ୍ଡ ସମୟ ନେଇ ୪ର୍ଥ ହୋଇଥିଲେ। ଓ୍ବାଲର୍ଡ ଆଥଲେଟିକ୍ସ ଓ୍ବେସାଇଟ୍ରେ ଅପଡେଟ୍ ହେବାପରେ ଭାରତର ପଦକ ସଂଖ୍ୟା ୮ ସ୍ବର୍ଣ୍ଣ ଓ ୯ ରୌପ୍ୟ ସହ ଏବେ ୨୦ରେ ପହଞ୍ଚତ୍ଛି ବୋଲି ଆଥଲେଟିକ୍ ଫେଡେରେଶନ ଅଫ୍ ଇଣ୍ଡିଆ (ଏଏଫଆଇ) ସଭାପତି ଆଡିଲ ସୁମାରିଓ୍ବାଲା ପ୍ରକାଶ କରିଛନ୍ତି।
