କଟକ ଅଫିସ,୧୯ା୮:ପୋଲିସ ଓ ଡାକ୍ତରଙ୍କ ମଣିଷପଣିଆ ପାଇଁ କର୍କଟ ରୋଗରେ ମୃତ୍ୟୁ ଘଟିଥିବା ଭାଇ ମୁହଁରେ ମୁଖାଗ୍ନି ଦେଇଛନ୍ତି ଭଉଣୀ। ଗୁରୁବାର କଟକ ଖାନ୍ନଗର ସ୍ବର୍ଗଧାମଠାରେ ଏଭଳି ଦୃଶ୍ୟ ଦେଖିବାକୁ ମିଳିଥିଲା ଝାରସୁଗୁଡା ଜିଲା ବେଲପାହାଡ ଅଞ୍ଚଳର ଫଗୁଲାଲ ମାଝି(୨୫) କର୍କଟ ରୋଗରେ ଆକ୍ରାନ୍ତ ହୋଇ କିଛିଦିନ ତଳେ କଟକସ୍ଥିତ ଆଚାର୍ଯ୍ୟ ହରିହର କର୍କଟ ରୋଗ ପ୍ରତିଷ୍ଠାନରେ ଭର୍ତ୍ତି ହୋଇଥିଲେ। ତାଙ୍କ ସହ ଭଉଣୀ ଭୀମସୀତା ମାଝି ମେଡିକାଲକୁ ଆସିଥିଲେ। ଫଗୁଲାଲଙ୍କ ଅବସ୍ଥା ଗୁରୁତର ଥିବାରୁ ଚିକିତ୍ସା କରାଯାଉଥିଲା। ହେଲେ ତାଙ୍କ ଆରୋଗ୍ୟ ହେବା ଉପରେ ଭୀମସୀତା ଭରସା କରିପାରି ନ ଥିଲେ। ସେ ଭାଇ ଦୁଃଖକୁ ଦେଖି ନିଜକୁ ସମ୍ଭାଳି ପାରି ନ ଥିଲେ। ତେଣୁ ସେ ଭାଇଙ୍କୁ ମେଡିକାଲରେ ଛାଡି ଘରକୁ ପଳାଇଥିଲେ। କିଛିଦିନ ଚିକିତ୍ସିତ ହେବା ପରେ ଗତ ୧୫ ତାରିଖରେ ଫଗୁଲାଲଙ୍କର ମୃତ୍ୟୁ ଘଟିଥିଲା। ମେଡିକାଲ କର୍ତ୍ତୃପକ୍ଷ ଏ ସମ୍ପର୍କରେ ଏସ୍ସିବି ମେଡିକାଲ ଫାଣ୍ଡି ଇନ୍ଚାର୍ଜ ମାନେଶ୍ୱର ପ୍ରଧାନଙ୍କୁ ଜଣାଇଥିଲେ। ପ୍ରଧାନ ଏ ନେଇ ଭୀମସୀତାଙ୍କୁ ଅବଗତ କରାଇଥିଲେ। ଫଳରେ ଭୀମସୀତା ଗୁରୁବାର କଟକରେ ପହଞ୍ଚତ୍ବା ପରେ ତାଙ୍କୁ ଫଗୁଲାଲଙ୍କ ମୃତଦେହ ହସ୍ତାନ୍ତର କରାଯାଇଥିଲା। ଭୀମସୀତା ଅତ୍ୟନ୍ତ ଗରିବ ହୋଇଥିବାରୁ ଭାଇଙ୍କ ମୃତଦେହକୁ ନିଜ ଗାଁକୁ ନେଇ ସତ୍କାର କରିବାରେ ଅସମର୍ଥ ଥିଲେ। ତାଙ୍କର ଏଭଳି ଅସହାୟ ଅବସ୍ଥାରେ ଡା. ଆଶୁତୋଷ ସାହୁ ଓ ଫାଣ୍ଡି ଇନ୍ଚାର୍ଜ ପ୍ରଧାନ ମାନବିକତା ଦେଖାଇବାକୁ ଆଗେଇ ଆସିଥିଲେ। ଅସହାୟଙ୍କ ନିମନ୍ତେ ଉତ୍ସର୍ଗୀକୃତ କାର୍ଯ୍ୟ କରୁଥିବା ସାମାଜିକ କର୍ମୀ ଅଭିମନ୍ୟୁ ଦାସ, ଶିଶିର ସାହୁଙ୍କୁ ଏ ସମ୍ପର୍କରେ ପ୍ରଧାନ ଅବଗତ କରାଇଥିଲେ। ଏଥିସହ ଡା. ସାହୁ ମୃତଦେହ ସତ୍କାର ନିମନ୍ତେ ଆର୍ଥିକ ସହାୟତା ପ୍ରଦାନ କରିଥିଲେ। ମୃତଦେହ ନେବା ପାଇଁ ମାଗଣା ଆମ୍ବୁଲାନ୍ସ ଯୋଗାଇ ଦିଆଯାଇଥିଲା। ଫଳରେ ସମସ୍ତଙ୍କ ସହଯୋଗରେ ଫଗୁଲାଲଙ୍କ ମୃତଦେହକୁ ଖାନ୍ନଗର ସ୍ବର୍ଗଧାମ ନିଆଯାଇ ସତ୍କାର କରାଯାଇଥିଲା। ସେଠାରେ ଭୀମସୀତା ତାଙ୍କ ମୁହଁରେ ମୁଖାଗ୍ନି ଦେଇଥିଲେ। ପରେ ତାଙ୍କୁ ବସ୍ରେ ଘରକୁ ପଠାଇ ଦିଆଯାଇଥିଲା।