କେନ୍ଦୁଝର, ୨୮ା୫(ଡି.ଏନ.ଏ.) କେନ୍ଦୁଝର ଜିଲାର ନୋଡାଲ ଅଫିସର ତଥା ମୃତ୍ତିକା ସଂରକ୍ଷଣ ଓ ଜଳ ବିଭାଜିକା ଉନ୍ନୟନ ବିଭାଗ ନିର୍ଦ୍ଦେଶକ ହେମନ୍ତ କୁମାର ପଣ୍ଡା ଦୁଇଦିନିଆ କେନ୍ଦୁଝର ଜିଲା ଗସ୍ତ କରିଥିଲେ। ଗୁରୁବାର ଓ ଶୁକ୍ରବାର ଜିଲାର ବିଭିନ୍ନ ଅଞ୍ଚଳ ଗସ୍ତ କରି କ୍ଷେତ୍ର ପରିଦର୍ଶନ ସହ ବିଭିନ୍ନ ଉନ୍ନୟନମୂଳକ କାର୍ଯ୍ୟର ସମୀକ୍ଷା କରିଛନ୍ତି। ଗୁରୁବାର ଘସିପୁରା ବ୍ଲକ ଅଳିତ ପଞ୍ଚାୟତ ପଦନପୁର ଗଁାରେ ପୁଷ୍ପଲତା ନାୟକଙ୍କ ୫୦୦ରୁ ୭୦୦ ଶଯ୍ୟା ବିଶିଷ୍ଟ ଛତୁଚାଷ ବୁଲି ଦେଖିଥିଲେ। ଛତୁ ଚାଷ କରି କେନ୍ଦୁଝର ଏବଂ ଯାଜପୁରରୋଡ୍ରେ ବିକ୍ରି କରି ଲାଭ କରୁଥିବା ସେ ପ୍ରକାଶ କରିଥିଲେ। ଏହାପରେ ନିର୍ଦ୍ଦେଶକ ପଣ୍ଡା ପଦନପୁରଠାରେ ଥିବା ପ୍ରଭୁ ଏଜେନ୍ସି ସାର ବିକ୍ରୟ କେନ୍ଦ୍ର ବୁଲି ସାର ଷ୍ଟକ ଯାଞ୍ଚ କରିଥିଲେ। ଅଳତି ପଞ୍ଚାୟତ ହରିପୁରଠାରେ ଏମ୍ଜିଏନ୍ଆର୍ଇଜିଏସ୍ ଯୋଜନାରେ ସମନ୍ନିତ କୃଷି ବିକାଶ ପଦ୍ଧତିରେ ଦାମୋଦର ମଲ୍ଲିକଙ୍କ କ୍ଷେତ ପୋଖରୀ ପରିଦର୍ଶନ କରିଥିଲେ। ହିତାଧିକାରୀ କ୍ଷେତ ପୋଖରୀ ସହ ପୋଖରୀ ହୁଡ଼ାରେ କଦଳୀ, ଅମୃତଭଣ୍ଡା, ସଜନାଛୁଇଁ ଓ ପନିପରିବା ଚାଷ କରି ଲାଭବାନ ହେବା ସହ ଗୋପାଳନ କରିଥିବା ସେ ଦେଖିଥିଲେ। ଏହାପରେ ବାମ୍ପିଡିଠାରେ ବିଜ୍ଞାନ କୁମାର ଦାସ କରିଥିବା ବିଭିନ୍ନ ଚାଷ ଏବଂ ଭଗାନଈରେ ରାଜ୍ୟ ଯୋଜନା ମାଧ୍ୟମରେ ୬୩ଜଣ ହିତାଧିକାରୀଙ୍କ ସହଯୋଗରେ ୧୫ ହେକ୍ଟର ଜମିରେ ହୋଇଥିବା ଝୋଟ ଚାଷ ପରିଦର୍ଶନ କରିଥିଲେ।
ସକାଳେ ଉଦ୍ୟାନ କୃଷି ବିଭାଗର କୁଅଁର ଫାର୍ମ ବୁଲି ଦେଖିଥିଲେ। ଏହାପରେ କୃଷି ଓ ଆନୁସଙ୍ଗିକ କୃଷି ବିଭାଗକୁ ନେଇ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା। ଏହି ବିଭାଗର ବ୍ଲକସ୍ତରୀୟ ଅଧିକାରୀ ଏଥିରେ ଯୋଗ ଦେଇଥିଲେ। ନିର୍ଦ୍ଦେଶକ ପଣ୍ଡା ସମନ୍ନିତ କୃଷି ବିକାଶ ପଦ୍ଧତିରେ କୃଷି, ଉଦ୍ୟାନ କୃଷି, ମୃତ୍ତିକା ସଂରକ୍ଷଣ, ମତ୍ସ୍ୟ ଚାଷ, ପ୍ରାଣୀ ସମ୍ପଦ ନିର୍ଦ୍ଦେଶାଳୟ ମଧ୍ୟରେ ସମନ୍ବୟ ରକ୍ଷା କରି ଚାଲୁ ରହିଥିବା ସମସ୍ତ କାର୍ଯ୍ୟକ୍ରମ ମାଧ୍ୟମରେ ଚାଷୀ ଭଉଣୀ ଭାଇଙ୍କ ରୋଜଗାରକୁ ବହୁଗୁଣିତ କରିବାକୁ ଉପସ୍ଥିତ ଅଧିକାରୀଙ୍କୁ ପରାମର୍ଶ ଦେଇଥିଲେ। ଜଳ ବିଭାଜିକା ଓ ମୃତ୍ତିକା ସଂରକ୍ଷଣ ପ୍ରକଳ୍ପ ନିର୍ଦ୍ଦେଶକ ସୁଶାନ୍ତ କୁମାର ମଲ୍ଲିକ, ସହକାରୀ ପ୍ରକଳ୍ପ ନିର୍ଦ୍ଦେଶକ ବନମାଳି ପାତ୍ର, କୃଷି ବିଭାଗର ମୁଖ୍ୟ ଜିଲା କୃଷି ଅଧିକାରୀ ବିଜୟ କୁମାର ସ୍ବାଇଁ, ଉଦ୍ୟାନ କୃଷି ବିଭାଗ ଉପନିର୍ଦ୍ଦେଶକ ଡ. ଜୟନ୍ତ କୁମାର ନାୟକ ପ୍ରମୁଖ ଉପସ୍ଥିତ ଥିଲେ।