ଢେଙ୍କାନାଳ ଅଫିସ, ୨୬।୪ ଖରାରେ ସିଝୁଛି ଗାଁଠାରୁ ସହର। ଆକାଶରୁ ହେଉଛି ଅଗ୍ନିବର୍ଷା। ପ୍ରଚଣ୍ଡ ତାତିରେ ଜଳିପୋଡ଼ିଯାଉଛି ଦେହମୁଣ୍ଡ। ସକାଳ ୮ଟାରୁ ଆରମ୍ଭ ହୋଇଯାଉଛି ଗ୍ରୀଷ୍ମପ୍ରବାହ। ଅପରାହ୍ନ ୫ଟା ଯାଏ ଏଥିରୁ ମିଳୁନି ନିସ୍ତାର। ଆଭ୍ୟନ୍ତରୀଣ ଓଡ଼ିଶାରୁ ଉପକୂଳ। ଦକ୍ଷିଣରୁ ଉତ୍ତର ସବୁଠି ସମାନ ଅବସ୍ଥା। ଗରମ ପବନ ଏବଂ ଗୁଳୁଗୁଳିରେ ଜନଜୀବନ ଅସ୍ତବ୍ୟସ୍ତ ହୋଇପଡୁଥିବାବେଳେ ଅଘୋଷିତ ବିଜୁଳି ବିଭ୍ରାଟ ସ୍ଥିତିକୁ ଆହୁରି ବିଷମ କରିଦେଉଛି। ଢେଙ୍କାନାଳ ଜିଲାରେ ଏଭଳି ଘନଘନ ବିଦ୍ୟୁତ୍ କାଟ ଉପଭୋକ୍ତାଙ୍କ ଚିନ୍ତା ବଢ଼ାଇଥିବାବେଳେ ବିଦ୍ୟୁତ୍ ବିତରଣ କମ୍ପାନୀ ବିରୋଧରେ ଗାଁଠାରୁ ସହର ଯାଏ ସବୁଠି ଅସନ୍ତୋଷ ତେଜିବାରେ ଲାଗିଛି।
ପାଖାପାଖି ସପ୍ତାହେ ହେଲା ଢେଙ୍କାନାଳ ସହରର ତାପମାତ୍ରା ୪୦ ଡିଗ୍ରୀ ଛୁଇଁଥିବାବେଳେ ଗତ ଦୁଇଦିନ ହେଲା ପାରଦ ୪୨ ଡିଗ୍ରୀ ପାଖାପାଖି ପହଞ୍ଚତ୍ଛି। ସକାଳ ୧୦ଟା ପରେ ଘରୁ ପଦାକୁ ବାହାରିବା ମୁସ୍କିଲ ହୋଇପଡୁଛି। ଏଭଳି ସମୟରେ ମଧ୍ୟାହ୍ନ ଏବଂ ରାତିରେ ଘନଘନ ବିଦ୍ୟୁତ୍ କାଟ୍ ଯନ୍ତ୍ରଣାକୁ ଆହୁରି ବଢ଼ାଇ ଦେଇଛି। ଦିନବେଳା ବିଦ୍ୟୁତ୍ ବିଚ୍ଛିନ୍ନ ଯୋଗୁ ପାନୀୟଜଳ ଯୋଗାଣରେ ସମସ୍ୟା ଉପୁଜୁଛି। ଉପଭୋକ୍ତାମାନେ ପାଣି ମୁନ୍ଦାଏ ପାଇଁ ଡହଳବିକଳ ହେଉଛନ୍ତି। ପରୀକ୍ଷା ସମୟରେ ଛାତ୍ରୀଛାତ୍ର ନାହିଁ ନ ଥିବା ହଇରାଣ ହେଉଛନ୍ତି। ଜରୁରୀ କାର୍ଯ୍ୟ ବାଧାପ୍ରାପ୍ତ ହେଉଛି। ସମସ୍ୟା ଜଣାଇବାକୁ ବିଦ୍ୟୁତ୍ ବିଭାଗ ଅଧିକାରୀଙ୍କୁ ଯୋଗାଯୋଗ କଲେ ଫୋନ୍ ଉଠାଉ ନ ଥିବା ବେଳେ କେତେଜଣ ସୁଇଚ୍ ଅଫ୍ କରିଦେଉଛନ୍ତି। ଏପରି କି ଅଭିଯୋଗ ପାଇଁ ଉଦ୍ଦିଷ୍ଟ ଲ୍ୟାଣ୍ଡ ଫୋନ୍କୁ ଜାଣିଶୁଣି ବ୍ୟସ୍ତ କରାଇ ଦେଉଛନ୍ତି। ସ୍ଥଳବିଶେଷରେ ଉତ୍କ୍ଷିପ୍ତ ହୋଇ କଥାବାର୍ତ୍ତା କରି ଧମକାଉଥିବା ଅଭିଯୋଗ ମଧ୍ୟ ହେଉଛି। ବିଦ୍ୟୁତ୍ ଦେୟ ଆଦାୟରେ ସାମାନ୍ୟତମ ହେଳା କରୁଥିବା ନ ଥିବା ବିତରଣ କମ୍ପାନୀ ସେବା ପ୍ରଦାନରେ ଆନ୍ତରିକତା ଦେଖାଉନାହଁି, ଯାହା ଜନଅସନ୍ତୋଷକୁ ତୀବ୍ର କଲାଣି। ଅପରପକ୍ଷେ ଲୋ-ଭୋଲ୍ଟେଜ୍ ଅନ୍ୟ ଏକ ସମସ୍ୟା ହୋଇଛି। ଗ୍ରୀଷ୍ମପ୍ରବାହ ପୂର୍ବରୁ ବିଦ୍ୟୁତ୍ ଭିତ୍ତିଭୂମି ଠିକ୍ ଭାବେ ପରିଚାଳନା କରାଯାଉ ନ ଥିବାରୁ ଏଭଳି ବିଭ୍ରାଟ ହେଉଥିବା ଅଭିଯୋଗ ହେଉଛି। ଏ ସଂକ୍ରାନ୍ତରେ ଟାଟାପାୱାର ଜିଲା ପରିଚାଳକ ବିସ୍ମୟ ଦାସ କୁହନ୍ତି, ମେଣ୍ଟେନାନ୍ସ ପାଇଁ ମଝିରେ ମଝିରେ ବିଦ୍ୟୁତ୍ ସରବରାହ ବନ୍ଦ ରହୁଛି। ସୂଚନା ନ ଦେଇ ବିଦ୍ୟୁତ୍ କାଟ୍ କରାଯାଉଥିବା ସମ୍ପର୍କରେ ପଚାରିବାରେ ସେ କୌଣସି ସନ୍ତୋଷଜନକ ଉତ୍ତର ନ ଦେଇ ପ୍ରସଙ୍ଗକୁ ଏଡ଼ାଇ ଯାଇଥିଲେ।