କେନ୍ଦ୍ରାପଡ଼ା ଅଫିସ, ୨୬ା୧୨:କେନ୍ଦ୍ରାପଡ଼ା ସହରର ଟିକିଲି ମଠଠାରୁ ବଳଭଦ୍ରପୁର ଭାୟା ଶ୍ୟାମସୁନ୍ଦରପୁର ରାସ୍ତା ନିର୍ମାଣ ଅବଧି ଡିସେମ୍ବର ୧୦କୁ ଥିଲା। ଏହି ଅବଧି ପ୍ରାୟ ୧୫ ଦିନ ପୂର୍ବେ ସରିଥିବା ବେଳେ ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନା(ପିଏମ୍ଜିଏସ୍ୱାଇ)ର ଏହି ପ୍ରକଳ୍ପ ନିର୍ମାଣ କାର୍ଯ୍ୟ ଅଧା ହୋଇନାହିଁ। ଯେତିକି ନିର୍ମାଣ ହୋଇଛି, ସେଥିରେ ଦୁର୍ନୀତିର ଗନ୍ଧ ସ୍ପଷ୍ଟ ବାରି ହୋଇପଡୁଥିବା ଅଭିଯୋଗ ହେଉଛି। ମାଟିଠାରୁ ପିଚୁ କାମରେ ବହୁ ଅନିୟମିତତା ହୋଇଛି। ସ୍ଥାନୀୟ ଲୋକେ ଏ ନେଇ ଭିଜିଲାନ୍ସ ଦାବି ଉପସ୍ଥାପନ କରି ନିଜର ଅସନ୍ତୋଷ ପ୍ରକାଶ କରିଛନ୍ତି।
ଏ ସମ୍ପର୍କରେ ପୂର୍ବତନ ସରପଞ୍ଚ ବସନ୍ତ କୁମାର ରାଉତ, ଶାରଦା ପ୍ରସାଦ ରାଉତ, ସାମାଜିକ କର୍ମୀ ପ୍ରଦୀପ ମହାନ୍ତି, ବୁଦ୍ଧିଜୀବୀ ଚିତ୍ତରଞ୍ଜନ ଦାସ କହିଛନ୍ତି, କେନ୍ଦ୍ରାପଡ଼ା ଗ୍ରାମ୍ୟ ଉନ୍ନୟନ ଡିଭିଜନ-୧ ଅଧୀନରେ ଥିବା ଏହି ପ୍ରକଳ୍ପ ଦୁର୍ନୀତିର ଗନ୍ତାଘର ପାଲଟିଛି। ୬.୪୫୦ କିଲୋମିଟର ଲମ୍ବର ଏହି ରାସ୍ତା ନିର୍ମାଣ ଆରମ୍ଭ ପାଇଁ ଗତ ଜାନୁୟାରୀ ୧୧ରୁ ଠିକାଦାର ବିଭୁରଞ୍ଜନ ପରିଡାଙ୍କ ସହ ଚୁକ୍ତି ହୋଇଛି। ଏଥିପାଇଁ ୩,୭୯,୦୫,୯୮୩ ଟଙ୍କାର ବ୍ୟୟ ମଞ୍ଜୁରୀ ହୋଇଛି। ଚୁକ୍ତିନାମା ଅନୁଯାୟୀ, ଏହି ରାସ୍ତା ପାଇଁ ମାଟି କାମ ୨୧,୯୭୯ ଘନମିଟର ହେବ। ଅର୍ଥାତ୍ ୩୬୩ ଟ୍ରକ ମାଟି ଲାଗିବ। ମାତ୍ର ଠିକା ସଂସ୍ଥା ଏହି ପ୍ରକଳ୍ପରେ ନିକଟସ୍ଥ ରାସ୍ତା ପାର୍ଶ୍ୱ ଓ ବିଲରୁ ଅଳ୍ପ ପରିମାଣର ମାଟି ଉଠାଇ ଏହାର ବିଲ୍ ପାଇଁ ମସୁଧା କରିଛନ୍ତି। ଏଠାରେ ଏକ ମିଟର ମାଟି ପକାଇବା ବଦଳରେ ମାତ୍ର କେତେ ଇଞ୍ଚ ମାଟି ପକାଇଛନ୍ତି। ସେହିପରି ପୁରୁଣା ରାସ୍ତାକୁ ଖୋଳି ୩ ଓ ୬ ଇଞ୍ଚ ବହଳର ମେଟାଲିଂ ହେବା କଥା। ଏହାପରେ ପିଚୁ ବ୍ୟବସ୍ଥା କରାଯିବାକୁ ଚୁକ୍ତିନାମାରେ ନିର୍ଦ୍ଧାରିତ କରାଯାଇଛି। ମାତ୍ର ମେଟାଲିଂ ଓ ପିଚୁରେ ବହୁ ଅନିୟମିତତା ଅଛି। ନିର୍ମାଣାଧୀନ ରାସ୍ତା ମାତ୍ର ୧୫ ଦିନ ମଧ୍ୟରେ ଖାଲଖମାରେ ଭରି ଗଲାଣି। ସେହିପରି କଲଭର୍ଟ ନିର୍ମାଣରେ ଉପଯୁକ୍ତ ବିନିଯୋଗ ହେଉନାହିଁ। ଏହି ରାସ୍ତା ଏବେ ପ୍ରାୟ ୩୦ ପଞ୍ଚାୟତବାସୀଙ୍କ ଯାତାୟାତ ପଥ ହୋଇଥିବା ବେଳେ ଆରମ୍ଭରୁ ଅନିୟମିତତା ଘଟଣା ବାହାରକୁ ଆସିଛି। ରାସ୍ତାର ସ୍ଥାୟିତ୍ୱ ନେଇ ବିଭାଗୀୟ ଅଧିକାରୀ ଓ ଜିଲା ପ୍ରଶାସନକୁ ଅଭିଯୋଗ ହୋଇଥିଲେ ମଧ୍ୟ କୌଣସି ସୁଫଳ ମିଳିନାହିଁ। ଭିଜିଲାନ୍ସ ତଦନ୍ତ ହେଲେ ଏହାର ପ୍ରକୃତ ତଥ୍ୟ ବାହାରକୁ ଆସିବ ବୋଲି ସେମାନେ ନିଜର ମତ ପ୍ରକାଶ କରିଛନ୍ତି। ଏ ସମ୍ପର୍କରେ ନିର୍ବାହୀ ଯନ୍ତ୍ରୀ ରାକେଶ କୁମାର ପ୍ରଧାନଙ୍କୁ ପଚାରିବାରେ ରାସ୍ତା ନିର୍ମାଣ ତ୍ରୁଟିକୁ ନେଇ ପ୍ରଶାସନିକ ତଦନ୍ତ ହେବ। ତଦନ୍ତ ପରେ ଠିକାସଂସ୍ଥା ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।