ଭୁବନେଶ୍ୱର,୨୩।୧(ବ୍ୟୁରୋ):ହକି ବିଶ୍ୱକପ୍କୁ ଦୃଷ୍ଟିରେ ରଖି ରାଜଧାନୀ ଭୁବନେଶ୍ୱରର ସୌନ୍ଦଯର୍ୟକରଣକୁ ଗୁରୁତ୍ୱ ଦିଆଯାଉଥିବା ଭୁବନେଶ୍ୱର ମହାନଗର ନିଗମ(ବିଏମ୍ସି) ପକ୍ଷରୁ କୁହାଯାଉଛି। ସହରର ବାସ୍ତବ ଚିତ୍ର କିନ୍ତୁ କିଛି ଭିନ୍ନ କଥା ବଖାଣୁଛି। ରାଜଧାନୀର ପ୍ରମୁଖ ରାସ୍ତା ଓ ଛକଗୁଡ଼ିକୁ ବାଦ୍ଦେଲେ ଅଧିକାଂଶ ସ୍ଥାନରେ ଅଳିଆ ଗଦା ହୋଇ ରହିଛି। ଦିନରାତି ସଫେଇଗାଡି ଗୀତ ବଜାଇ ବୁଲୁଥିଲେ ମଧ୍ୟ ବର୍ଜ୍ୟସଂଗ୍ରହ ସଫଳ ହୋଇପାରୁ ନାହିଁ। ଫଳରେ ଏପରି ଅପ୍ରୀତିକର ପରିସ୍ଥିତି ସୃଷ୍ଟି ହେଉଛି। ବିଏମ୍ସି କାର୍ଯ୍ୟାଳୟରେ ଘନ ଘନ ବୈଠକ ବସୁଛି। ଉପରିସ୍ଥ ଅଧିକାରୀଙ୍କ ଚାପରେ କର୍ମଚାରୀ ବେହାଲ ହେଉଛନ୍ତି। କିନ୍ତୁ ସହରର ସ୍ଥିତି ବଦଳିବା ପରିବର୍ତ୍ତେ ବିଗୁଡ଼ୁଛି। ଅସ୍ବାସ୍ଥ୍ୟକର ପରିବେଶର ସ୍ଥାୟୀ ସମାଧାନ ପରିବର୍ତ୍ତେ କେବଳ ଦୋଷ ଲୁଚାଇବାକୁ ସୌନ୍ଦର୍ଯ୍ୟକରଣକୁ ଢାଲ କରୁଛି ବିଏମ୍ସି। ଅଶୋକନଗର, ପଞ୍ଚସଖା ନଗର, ଘାଟିକିଆ, ଖଣ୍ଡଗିରିବାରି, ପାଣ୍ଡରା, ଜିଜିପି କଲୋନୀ, ଲକ୍ଷ୍ମୀସାଗରଠାରୁ ଆରମ୍ଭ କରି ପଟିଆ ଚନ୍ଦ୍ରଶେଖରପୁର ଆଦି ଅଞ୍ଚଳର ବିଭିନ୍ନ ସ୍ଥାନରେ କୁଢ଼ କୁଢ଼ ଅଳିଆ ଗଦା ହେଉଛି। ଅସ୍ଥାୟୀ ଭାବେ ଅଳିଆ ଗଦା ଯାଉଥିବା ବିଏମ୍ସି ପକ୍ଷରୁ ସଫେଇ ଦିଆଯାଉଥିବାବେଳେ ସହର ଗଳିକନ୍ଦି, କଲୋନୀ ଓ ସାହିରୁ ଦୁର୍ଗନ୍ଧ ବାହାରିବା କମୁନି। ଦିନକୁଦିନ ଆବର୍ଜନାର ପରିମାଣ ବଢ଼ିବା ଫଳରେ ଅଞ୍ଚଳବାସୀଙ୍କ ମଧ୍ୟରେ ପ୍ରତିକ୍ରିୟା ପ୍ରକାଶ ପାଉଛି।