ଚଣ୍ଡିଖୋଲ,୧୭।୪(ଡି.ଏନ.ଏ.): ପାରାଦୀପ ବନ୍ଦରକୁ ଯାଉଥିବା ଲୁହାପଥର ଗୁଡ଼ିକ ରାସ୍ତାରେ ବିକ୍ରି ହୋଇଯାଉଛି। କେନ୍ଦୁଝର ଓ ସୁନ୍ଦରଗଡ଼ ଜିଲାର ବିଭିନ୍ନ ଲୁହାପଥର ଖଣିରୁ ପରିବହନ କରୁଥିବା ଟ୍ରକ୍ଗୁଡ଼ିକ ବନ୍ଦରରେ ପହଞ୍ଚତ୍ବାର ନିୟମ ରହିଛି। ହେଲେ ଅନେକ ଟ୍ରକ୍ ବନ୍ଦରରେ ନ ପହଞ୍ଚତ୍ ମଧ୍ୟ କାଗଜପତ୍ରରେ ପହଞ୍ଚତ୍ଥିବାର ଦେଖାଯାଉଛି। ସମସ୍ତ ଖଣିଜ ପଦାର୍ଥ ପରିବହନକାରୀ ଗାଡ଼ିଗୁଡ଼ିକ ଯାଜପୁର ଜିଲାର ଚଣ୍ଡିଖୋଲ ଛକ ଦେଇ ଅତିକ୍ରମ କରିଥାଏ। ଏପରି କି ଗୋପାଳପୁର ବନ୍ଦରକୁ ଗଲେ ମଧ୍ୟ ତାହା ଚଣ୍ଡିଖୋଲ ଦେଇ ଯିବାକୁ ପଡ଼ିଥାଏ।
ଜାତୀୟ ରାଜପଥ (ଏନ୍ଏଚ୍) କଡ଼ରେ ଏହି ଚୋରା ଲୁହାପଥର ବ୍ୟବସାୟ ବ୍ୟାପକ ଭାବେ ଚାଲୁଛି। ଗତ ୩ ଦିନ ତଳେ ବଡ଼ଚଣା ଥାନା ଅନ୍ତର୍ଗତ ୧୬ ନମ୍ବର ଜାତୀୟ ରାଜପଥର ବନ୍ଦାଳୋ ଛକ ନିକଟରୁ ବ୍ୟାପକ ଲୁହାପଥର ଗୁଣ୍ଡ ଜବତ ହୋଇଥିଲା। ଏହି କାରବାରରେ ସମ୍ପୃକ୍ତ ଏକ ଟ୍ରକ୍କୁ ମଧ୍ୟ ପୋଲିସ ଜବତ କରିଛି। ତେବେ ଏହି ଘଟଣାରେ ପୋଲିସ କେବଳ ଟ୍ରକ୍ ଚାଳକଙ୍କୁ ଗିରଫ କରିଥିବା ବେଳେ ଅଦ୍ୟାବଧି ଏହି ଚୋରା ଚାଲାଣକାରୀ ମାଷ୍ଟର ମାଇଣ୍ଡକୁ ଧରିବାକୁ ସକ୍ଷମ ହୋଇନାହିଁ। ସେହିଭଳି ଗତ ୬ତାରିଖରେ ଜେନାପୁର ଥାନା ଅନ୍ତର୍ଗତ ନୂଆସାହିଠାରୁ ବ୍ୟାପକ ଲୁହାପଥର ଯାଜପୁର ଏସ୍ପିଙ୍କ ସ୍ବତନ୍ତ୍ର ସ୍କ୍ବାଡ୍ ଧରିଥିଲା। ଘଟଣାରେ ସମ୍ପୃକ୍ତ ଜଣେ ବ୍ୟକ୍ତି ଓ ସେଠାରେ ନିୟୋଜିତ ମେଶିନ୍କୁ ଜବତ କରାଯାଇଛି। ଏହାର ମାଷ୍ଟରମାଇଣ୍ଡ ବଡ଼ଚଣା ଥାନା ଧାନମଣ୍ଡଳ ଅଞ୍ଚଳର ସେକ୍ ମନାନ୍ଙ୍କୁ ଗିରଫ କରି କୋର୍ଟଚାଲାଣ କରାଯାଇଛି। କେବଳ ସେତିକି ନୁହେଁ, ପୂର୍ବରୁ ଏହି ର଼୍ୟାକେଟ୍ କେନ୍ଦ୍ରାପଡ଼ା ଜିଲାର ବଳଭଦ୍ରପୁରଠାରେ ଚୋରା ଲୁହାପଥର ବ୍ୟବସାୟ କରୁଥିବା ବେଳେ ଖଣି ବିଭାଗ ତରଫରୁ ଚଢ଼ାଉ ହେବା ଜାଣିପାରି ତୁରନ୍ତ ସେଠାରୁ ଲୁହାପଥର ସ୍ଥାନାନ୍ତର କରିଦେଇଥିଲା। ଫଳରେ ବିଭାଗୀୟ ଅଧିକାରୀଙ୍କୁ ଖାଲିହାତରେ ଫେରିବାକୁ ପଡ଼ିଥିଲା। ସେହିଭଳି ୫୩ ନମ୍ବର ଜାତୀୟ ରାଜପଥର କଟକ ଜିଲା ମାହାଙ୍ଗା ଥାନା ଅନ୍ତର୍ଗତ କଉଡ଼କୋଲ ନିକଟରେ ଏହି ବ୍ୟବସାୟ ଚାଲୁଥିଲା ବେଳେ ଖଣି ବିଭାଗର ଚଢ଼ାଉ ପୂର୍ବରୁ ଲୁହାପଥରକୁ ସ୍ଥାନାନ୍ତର କରାଯାଇଥିଲା। ୧୬ ଓ ୫୩ ନମ୍ବର ଜାତୀୟ ରାଜପଥର ଡୁବୁରିଠାରୁ ପାରାଦୀପ ମଧ୍ୟରେ ଏହି ଲୁହାପଥର ଚୋରା ବ୍ୟବସାୟୀମାନେ ସକ୍ରିୟ ହୋଇ ଉଠିଥିବା ବେଳେ ପୋଲିସର ନୀରବତାକୁ ନେଇ ପ୍ରଶ୍ନ ଉଠିଛି। ଏହି କାରବାରକୁ ଚଣ୍ଡିଖୋଲଠାରେ ରହୁଥିବା ଏକ ର଼୍ୟାକେଟ୍ ଚଳାଉଥିବା ଜଣାପଡ଼ିଛି। ଏପରି କି ସେମାନେ ଜାଲ୍ କାଗଜପତ୍ର ପ୍ରସ୍ତୁତ କରି ପାରାଦୀପ ବନ୍ଦରକୁ ପଠାଉଥିବା ବିଶେଷ ସୂତ୍ରରୁ ସୂଚନା ମିଳିଛି। ହେଲେ ପୋଲିସ ଏହାର କୌଣସି ଟେର୍ ପାଇପାରୁନାହିଁ। ଏ ସମ୍ପର୍କରେ ପ୍ରତିକ୍ରିୟା ଲାଗି ଯାଜପୁର ରୋଡ୍ ଖଣି ବିଭାଗ ଉପନିର୍ଦ୍ଦେଶକଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ କୌଣସି ଉତ୍ତର ମିଳି ନ ଥିଲା। ଘଟଣା ସମ୍ପର୍କରେ ବଡ଼ଚଣା ଥାନା ଅଧିକାରୀ ସୁଶୀଲ କୁମାର ନାୟକଙ୍କୁ ପଚାରିବାରେ ସେ କହିଛନ୍ତି, ଚୋରା ବ୍ୟବସାୟ ସମ୍ପର୍କରେ ଖବର ମିଳିଲେ ଚଢ଼ାଉ କରାଯାଉଛି। ତେବେ ଆଗକୁ ଏ ଦିଗରେ ପୋଲିସ ଅଧିକ ସଜାଗ ରହିବ।