ପ୍ରତାପଗଡ଼, ୨୫।୮: ରାଜସ୍ଥାନର ପ୍ରତାପଗଡ଼ ଜିଲାରେ ଏକ ଅଜବ ଘଟଣା ଦେଖିବାକୁ ମିଳିଛି। ଜିଲାର ପିପଲଖୁଣ୍ଟ ଅଞ୍ଚଳରେ ଗୋଟିଏ ଗଧ ନଦୀ କୂଳରେ ଘାସ ଚରୁଥିବାବେଳେ ଘାସ ସହିତ ସାପଟିଏ ଭିତରକୁ ପଳାଇଥିଲା। ଏହାପରେ ସାପଟି ଗଧ ପାଟି ଭିତରେ ଅଧା ପର୍ଯ୍ୟନ୍ତ ଲଟକି ରହିଥିଲା। ଉଭୟ ସାପ ଓ ଗଧ ପରସ୍ପରଠାରୁ ଅଲଗା ହେବା ଲାଗି ଅନେକ ସମୟ ପର୍ଯ୍ୟନ୍ତ ସଂଘର୍ଷ କରିଥିଲେ। ସାପଟିକୁ ପାଟିରୁ ବାହାର କରିବା ପାଇଁ ଗଧଟି ଅନେକ ସମୟ ପର୍ଯ୍ୟନ୍ତ ମୁଣ୍ଡକୁ ଜୋରରେ ହଲାଇବାରେ ଲାଗିଥିଲା। କିନ୍ତୁ ସାପଟି ପାଟି ଭିତରେ କାମୁଡ଼ି ଧରିଥିବାରୁ ଗଧର ସବୁ ପ୍ରୟାସ ବିଫଳ ହୋଇଥିଲା। ଗଧଟି ନା ସାପଟିକୁ ବାହାର କରିପାରୁଥିଲା ନା ଭିତରକୁ ଗିଳି ପାରୁଥିଲା। ଅପରପକ୍ଷରେ ସାପଟି ମଧ୍ୟ ଗଧ ପାଟିରୁ ବାହାରି ନ ପାରି ଭିତରରେ ୩-୪ଥର ଦଂଶନ କରିଥିଲା। ଶେଷରେ ଗଧ ପାଟି ଭିତରେ ସାପଟିର ମୃତ୍ୟୁ ହୋଇଥିଲା। ଏହି ସମୟରେ ସେହି ବାଟେ ଯାଉଥିବା କିଛି ଲୋକ ଗଧ ପାଟିରେ ସାପ ଝୁଲିଥିବା ଦେଖି ପାଖକୁ ଆସିଥିଲେ। କିନ୍ତୁ ଭୟରେ କେହି ମଧ୍ୟ ସାହାଯ୍ୟ କରି ନ ଥିଲେ। ଶେଷରେ ସାପ ଦଂଶନର ୨-୩ ଘଣ୍ଟା ପରେ ଗଧଟିର ମଧ୍ୟ ମୃତ୍ୟୁ ହୋଇଥିଲା। ପ୍ରତ୍ୟେକ୍ଷଦର୍ଶୀଙ୍କ କହିବାନୁଯାୟୀ, ଗଧ ଓ ସାପ ମଧ୍ୟରେ ଅନେକ ସମୟ ପର୍ଯ୍ୟନ୍ତ ସଂଘର୍ଷ ଚାଲିଥିଲା। କିନ୍ତୁ ଶେଷରେ ଉଭୟଙ୍କ ମୃତ୍ୟୁ ଘଟିଥିଲା।