ଡେଲାଙ୍ଗ,୨୬।୧୦(ଡି.ଏନ୍.ଏ.): ଏକ ମନ୍ଦିରରୁ ଚୋରି ଘଟଣାରେ ଜଣେ ଯୁବକଙ୍କୁ ଧରିଛି ପୋଲିସ । ଅଭିଯୁକ୍ତ ଜଣକ ହେଲେ ଖୋର୍ଦ୍ଧା ଅଞ୍ଚଳ ପିତାପଲ୍ଲୀର ରଶ୍ମିରଞ୍ଜନ ପ୍ରଧାନ(୨୪)। ସେ ଧରା ପଡ଼ିବା ପରେ କହିଛନ୍ତି , ଚୋରି କଲା ପରେ ତାଙ୍କୁ ନାଗ ସାପ ଭୟ ଘାରିଥିଲା। ସେ ଘରୁ ବାହାରି ପାରି ନଥିଲେ।
ପୁରୀ ଜିଲା ଡେଲାଙ୍ଗ ଥାନା ଅଞ୍ଚଳରେ ଏଭଳି ଘଟଣା ଦେଖିବାକୁ ମିଳିଛି। ଏକ ଶିବ ମନ୍ଦିର ହୁଣ୍ଡିରୁ ଅଭିଯୁକ୍ତ ଟଙ୍କା ଚୋରି କରିଥିଲେ। ଅଭିଯୁକ୍ତ ମନ୍ଦିରରେ ପଶି କମିଟି ସଦସ୍ୟଙ୍କୁ ବାହାରପଟୁ କବାଟ ଦେଇ ପରିସରରେ ଥିବା ହୁଣ୍ଡିରୁ ତାଲା ଭାଙ୍ଗି ଟଙ୍କା ନେଇ ଫେରାର ହୋଇଯାଇଥିଲେ। ପରେ ମନ୍ଦିର ପରିଚାଳନା କମିଟି ପକ୍ଷରୁ ଥାନାରେ ଅଭିଯୋଗ କରାଯାଇଥିଲା। ଅଭିଯୋଗକୁ ଭିତ୍ତି କରି ପୋଲିସ ନଂ.୨୪୪/୨୧ ମାମଲା ରୁଜୁ କରି ତଦନ୍ତ ଚଳାଇଥିଲ। ସିସିଟିଭି ଫୁଟେଜ ଆଧାରରେ ଡେଲାଙ୍ଗ ଥାନା ଆଇଆଇସି ରଶ୍ମିରଞ୍ଜନ ପଟ୍ଟନାୟକ ଘଟଣାସ୍ଥଳରେ ପହଞ୍ଚି ଜଟଣୀ ଥାନା ସହାୟତାରେ ଅଭିଯୁକ୍ତଙ୍କୁ ପିତାପଲ୍ଲୀରୁ ଗିରଫ କରିଥିଲେ। ପଚରାଉଚରା ସମୟରେ ଚୋରି କଥା ମାନିବା ସହ ତାଙ୍କୁ ଏକ ନାଗସାପ ଜଗି ରହିଥିବା କହିବାରୁ ପୋଲିସ କର୍ମଚାରୀମାନେ ଆଶ୍ଚର୍ଯ୍ୟ ହୋଇଥିଲେ।