ଢେଙ୍କାନାଳ ଅଫିସ, ୨୯ା୧୧: ଯବାନଙ୍କୁ କେବେ ବିଶ୍ରାମ ନ ଥାଏ। ସୀମାନ୍ତରେ ହେଉ ଅବା ଆଭ୍ୟନ୍ତରୀଣ ଶାନ୍ତିରକ୍ଷା, ଦେଶମାତୃକାର ସେବାରେ ସେମାନେ ଥାଆନ୍ତି ସର୍ବଦା ତତ୍ପର। ସେମାନଙ୍କ ଦାୟିତ୍ୱ କେବଳ କର୍ମକ୍ଷେତ୍ରରେ ସୀମିତ ନ ଥାଏ, ବର୍ଦ୍ଦିରେ ନ ଥିବା ସମୟରେ ବି ଧନଜୀବନର ସୁରକ୍ଷା ଲାଗି ଆଗେଇ ଆସିଥାନ୍ତି ସେମାନେ। ଢେଙ୍କାନାଳ ଜିଲା ଭୁବନ ଥାନା ନୀଳକଣ୍ଠପୁର ବାଜି ରାଉତ ସେତୁ ଉପରେ ଗତ ଶୁକ୍ରବାର ଘଟିଥିବା ଏକ ଘଟଣା ଏହାକୁ ପ୍ରମାଣିତ କରିଛି। ଶୁକ୍ରବାର ସନ୍ଧ୍ୟା ପ୍ରାୟ ୫ଟା ୨୦। କଟକରୁ ଯାତ୍ରୀଙ୍କୁ ନେଇ ଭୁବନ ବ୍ଲକ ଜୟପୁର ଅଞ୍ଚଳକୁ ଯାଉଥିଲା ଘରୋଇ ବସ୍ ‘ମଲ୍ଲିକ’। ଏହି ସମୟରେ ବସ୍ ଆଗରେ ଏକ ବାଇକ୍ରେ ଯାଉଥିବା ୨ଜଣ ଯୁବକ ଏବଂ ଜଣେ ଯୁବତୀ ହଠାତ୍ ଗାଡ଼ି ଅଟକାଇବା ସହ ବନ୍ଧୁକ ଦେଖାଇ ଆତଙ୍କ ସୃଷ୍ଟି କରିଥିଲେ। ଡ୍ରାଇଭର, କର୍ମଚାରୀ ଏବଂ ଯାତ୍ରୀଙ୍କୁ ଭୟଭୀତ କରାଇଥିଲେ। ବସ୍ରେ ଘରକୁ ଛୁଟିରେ ଯାଉଥିବା କେନ୍ଦୁଝର ସେକେଣ୍ଡ ଏସ୍ଏସ୍ ବାଟାଲିୟନର ଯବାନ ହିମାଂଶୁ ଶେଖର ପାତ୍ରଙ୍କ ପକ୍ଷେ ଏହା ଅସହ୍ୟ ହେଲା। ସେ ସାହସିକତା ପ୍ରଦର୍ଶନ କରି ବନ୍ଧୁକଧାରୀଙ୍କଠାରୁ ପିସ୍ତଲ ଛଡ଼ାଇ ନେଇଥିଲେ। ଏହାପରେ ୩ ଅଭିଯୁକ୍ତଙ୍କ ସହ ଧସ୍ତାଧସ୍ତି ହୋଇଥିଲା। ହିମାଂଶୁଙ୍କ ସମ୍ମୁଖୀନ ହୋଇ ନ ପାରି ସେମାନେ ପିସ୍ତଲ ଛାଡ଼ି ଫେରାର ହୋଇଯାଇଥିଲେ। ଯାଞ୍ଚ ବେଳେ ଉକ୍ତ ପିସ୍ତଲଟି ଖେଳନା ବୋଲି ଜଣାପଡ଼ିଛି। ଏହି ଘଟଣା ଜଣାପଡ଼ିବା ପରେ ହିମାଂଶୁ ସବୁ ମହଲରେ ପ୍ରଶଂସା କରାଯାଇଛି। ଏଭଳି ସାହସିକ କାର୍ଯ୍ୟ ପାଇଁ ଡିଜିପି ଅଭୟଙ୍କ ସମେତ ଉଚ୍ଚପଦସ୍ଥ ଅଧିକାରୀ ତାଙ୍କୁ ଉଚ୍ଚ ପ୍ରଶଂସା କରିଛନ୍ତି। ଅନ୍ୟପଟେ ଏ ସଂକ୍ରାନ୍ତରେ ଡ୍ରାଇଭର ଦୁର୍ଯ୍ୟୋଧନ ସ୍ବାଇଁ (୪୯)ଙ୍କ ଅଭିଯୋଗକ୍ରମେ ଭୁବନ ଥାନାରେ ନଂ. ୩୪୭/୨୦ରେ ଏକ ମାମଲା ରୁଜୁ ହୋଇଛି। ଏ ସଂକ୍ରାନ୍ତରେ ଢେଙ୍କାନାଳ ଦାୟିତ୍ୱରେ ଥିବା ଅନୁଗୋଳ ଏସ୍ପି ଜଗମୋହନ ମୀନା କୁହନ୍ତି, ଜବତ କରାଯାଇଥିବା ପିସ୍ତଲଟି ନକଲି। ଏହା ଅସଲି ଭଳି ଦେଖାଯାଉଥିଲା, ଯାହାକୁ ଦେଖି ବସ୍ କର୍ମଚାରୀ ଏବଂ ଯାତ୍ରୀମାନେ ଆତଙ୍କିତ ହୋଇପଡ଼ିଥିଲେ। ସିପାହି ହିମାଂଶୁଙ୍କ ସାହସିକତା ପ୍ରଶଂସନୀୟ। କାମାକ୍ଷାନଗର ଏସ୍ଡିପିଓଙ୍କ ନେତୃତ୍ୱରେ ଅଭିଯୁକ୍ତଙ୍କୁ ଧରିବା ଲାଗି ଚଢ଼ାଉ ଜାରି ରହିଛି।