କାମାକ୍ଷାନଗର,୨୩।୨(ସୁଧୀର ପରିଡ଼ା): ଢେଙ୍କାନାଳ ଜିଲା କାମାକ୍ଷାନଗର ଥାନା ନୂଆଁ ଆଳତୁମା ଗାଁରେ ଗୁରୁବାର ରାତିରେ ଏକ ଅଭାବନୀୟ ଘଟଣା ଘଟିଯାଇଛି। ପାରିବାରିକ ସମସ୍ୟାକୁ କେନ୍ଦ୍ରକରି ଶ୍ୱଶୁର ଘରେ ଜ୍ୱାଇଁ ନିଆଁ ଲଗାଇ ଦେଇଛନ୍ତି। ଫଳରେ ୪ ବଖରା ଘର ଜଳିଯାଇଛି। ଶୁକ୍ରବାର ଶ୍ୱଶୁର ଘର ଲୋକଙ୍କ ଥାନାରେ ଅଭିଯୋଗକ୍ରମେ ପୋଲିସ ଜ୍ୱାଇଁଙ୍କୁ ଅଟକ ରଖି ତଦନ୍ତ ଚଳାଇଛି।
ଘଟଣାରୁ ଜଣାପଡ଼ିଛି, ଜ୍ୱାଇଁ ଦୁଷ୍ମନ୍ତ ପେଣ୍ଠେଇ କାମାକ୍ଷାନଗର ନୂଆଁ ଆଳତୁମା ଗ୍ରାମର ସୁରେନ୍ଦ୍ର ସାମଲଙ୍କ ଝିଅ ଶକୁନ୍ତଳାଙ୍କୁ ବିବାହ କରିଥିଲେ। ଦୁଷ୍ମନ୍ତ ସବୁବେଳେ ନିଶାଶକ୍ତ ଅବସ୍ଥାରେ ରହି ସ୍ତ୍ରୀ ଏବଂ ପିଲା ଛୁଆଙ୍କୁ ମାଡ଼ ମାରୁଥିବାରୁ ଶକୁନ୍ତଳା ନିଜ ବାପା ଘରେ ଆସି ରହୁଥିଲେ। ଦୁଷ୍ମନ୍ତ ଗୁରୁବାର ସାରେ ଶ୍ୱଶୁର ଘରକୁ ଆସି ପାଟିତୁଣ୍ଡ କରିଥିଲେ। ପରେ ବିଳମ୍ବିତ ରାତିରେ ଶ୍ୱଶୁର ଘରେ ନିଆଁ ଲଗାଇ ସେ ଫେରାର ହୋଇଯାଇଥିଲେ। ଏଥିରେ ୪ ବଖରା ଜଳିଯିବା ସହ ଘରେ ଥିବା ସମସ୍ତ ଆସବାବପତ୍ର ପୋଡିଯାଇଥିବା ଅଭିଯୋଗପତ୍ରରେ ଦର୍ଶାଯାଇଛି।