ଗୋପ,୨୨।୧୨(ଡି.ଏନ୍.ଏ.): କଥାରେ ଅଛି ଓଡ଼ିଆ ଘରେ ଜ୍ବାଇଁର ସମ୍ମାନ ସବୁଠାରୁ ଉଚ୍ଚରେ। ଜ୍ବାଇଁ ଯେବେ ଘରକୁ ଅତିଥି ଭାବରେ ଆସିଥାଏ ସେତେବେଳେ ଶ୍ୱଶୁର ଘର ପକ୍ଷରୁ ଜ୍ବାଇଁ ଝିଅଙ୍କ ଲାଗି ୯ ପ୍ରକାର ଛଅ ଭଜା ହୋଇଥାଏ। ହେଲେ ସୋମବାର ଗୋପ ବ୍ଲକ ଅଧୀନ ନୟାହାଟ ନିକଟ ମଧୁବନ ଗ୍ରାମରେ ଜ୍ବାଇଁଙ୍କ ଲାଗି ୭୫ ପ୍ରକାରର ଓଡ଼ିଆ ଘରର ଖାଦ୍ୟ ପ୍ରସ୍ତୁତ କରାଯାଇଥିଲା। ସୂଚନାଯୋଗ୍ୟ, ଗତ ୧୧ ତାରିଖରେ ନୟାହାଟ ମଧୁବନ ଗ୍ରାମର ବିଶ୍ବଜିତ ସାହୁଙ୍କ କନ୍ୟା ନୀହାରିକା ଭୁବନେଶ୍ବରର ପାଣ୍ତବ ନଗରର ଦେବୀପ୍ରସାଦଙ୍କୁ ବିବାହ କରିଥିଲେ। ଓଡ଼ିଆ ଘରର ପରମ୍ପରା ଅନୁଯାୟୀ ଦଶ ମଙ୍ଗଳାରେ ଜ୍ବାଇଁ ଝିଅ ଶଶୁର ଘରକୁ ବୁଲିବାକୁ ଆସିଥିଲେ। ନୂଆ ଜ୍ବାଇଁ ଆସିବାକୁ ନେଇ ବିଶ୍ବଜିତ ଏକ ସ୍ବତନ୍ତ୍ର ଭାବରେ ୭୫ ପ୍ରକାରର ଓଡ଼ିଆ ଘରର ଖାଦ୍ୟ ପ୍ରସ୍ତୁତ କରିଥିଲେ। ସେହି ଖାଦ୍ୟ ମଧ୍ୟରେ ଅରୁଆ ଅନ୍ନ, ଡାଲ ଫ୍ରାଏ, ମାଛ, ମାଂସ ସହିତ ଅନ୍ୟାନ୍ୟ ଓଡ଼ିଆ ଘରର ଖାଦ୍ୟ ରହିଥିଲା। ଜ୍ବାଇଁ ଝିଅ ଘରେ ପହଞ୍ଚତ୍ବା ପରେ ଜଳଖିଆ ଥଣ୍ଡା ଆପ୍ୟାୟିତ କରାଯାଇଥିଲା। ମଧ୍ୟାହ୍ନରେ ଜ୍ବାଇଁଙ୍କ ଲାଗି ପ୍ରସ୍ତୁତ କରାଯାଇଥିବା ୭୫ ପ୍ରକାର ଖାଦ୍ୟ ପରିବେଷଣ କରାଯାଇଥିଲା। ଏପରି ଏକ ଜ୍ବାଇଁଙ୍କ ଲାଗି ବ୍ୟଞ୍ଜନ ପ୍ରସ୍ତୁତ କରାଯିବାକୁ ନେଇ ନୟାହାଟ ଅଞ୍ଚଳରେ ଚର୍ଚ୍ଚା ହୋଇଛି । ଏ ସମ୍ପର୍କରେ ଶ୍ୱଶୁର ବିଶ୍ବଜିତ କହିଥିଲେ, ଜ୍ବାଇଁ ହେଉଛନ୍ତି ଶ୍ୱଶୁର ଘରର ସମ୍ମାନ । ତେଣୁ ତାଙ୍କ ଲାଗି ଏତେ ପ୍ରକାର ଖାଦ୍ୟ ବଡ଼କଥା ନୁହେଁ।