ମୁମ୍ବାଇ,୨୯।୪:ଆଇପିଏଲ୍ ୨୦୨୨ରେ ଭାରତୀୟ ଯୁବ ଦ୍ରୁତ ବୋଲର ଉମ୍ରାନ ମଲିକଙ୍କ ଚର୍ଚ୍ଚା ସବୁଠି ଚାଲିଛି। ଉମ୍ରାନଙ୍କ ବୋଲିଂ ଗତି ଦେଖି କେବଳ କ୍ରିକେଟ୍ ପ୍ରଶଂସକ ନୁହେଁ,କ୍ରିକେଟ୍ ବିଶେଷଜ୍ଞ ମଧ୍ୟ ଆଶ୍ଚର୍ଯ୍ୟ ହୋଇଛନ୍ତି। କଶ୍ମୀରର ଏହି ଯୁବ ବୋଲର ଭାରତର ଭବିଷ୍ୟତ ବୋଲି କୁହାଯାଉଛି। ନିକଟରେ ସେ ଗୁଜରାଟ ଟଇଟାନ୍ସ ବିପକ୍ଷରେ ୫ଟି ଉଇକେଟ୍ ନେଇଛନ୍ତି।
କଶ୍ମୀରର ଦ୍ରୁତ ବୋଲର ଉମ୍ରାନ ଚଳିତବର୍ଷ ଆଇପିଏଲ୍ର ସବୁଠାରୁ ବିପଜ୍ଜନକ ଦ୍ରୁତ ବୋଲରମାନଙ୍କ ମଧ୍ୟରୁ ଜଣେ। ୧୫୦ କିମିରୁ ଅଧିକ ବେଗରେ ଉମରନ କ୍ରମାଗତ ଭାବରେ ବୋଲିଂ କରିବାର କଳା ରଖିଛନ୍ତି। ଆଇପିଏଲ ୨୦୨୨ରେ ୮ଟି ମ୍ୟାଚରେ ସେ ୧୫ ଉଇକେଟ ନେଇଛନ୍ତି। ପର୍ପଲ କ୍ୟାପ ତାଲିକାରେ ୟୁଜଭେନ୍ଦ୍ର ଚହଲଙ୍କ ପରେ ଦ୍ୱିତୀୟ ସ୍ଥାନରେ ଅଛନ୍ତି।
ଉମରାନଙ୍କୁ ସାରା ଦେଶରେ ପ୍ରଶଂସା କରାଯାଉଥିବାବେଳେ ଏବେ ବି ତାଙ୍କ ପିତା ଅବଦୁଲ ରସିଦ ରାସ୍ତା କଡରେ ଫଳ ବିକୁଛନ୍ତି। ନିକଟରେ ଅବଦୁଲ କହିଥିଲେ, ତାଙ୍କ ପୁଅର ଚମତ୍କାର ପ୍ରଦର୍ଶନ ଦେଖିବା ପରେ ବଜାରର ଲୋକମାନେ ତାଙ୍କୁ ଅଧିକ ସମ୍ମାନ ଦେବା ଆରମ୍ଭ କରି ଦେଇଛନ୍ତି। ପୁଅ ଭାରତ ପାଇଁ ବିଶ୍ୱକପ ଖେଳୁ ଏତିକି ଚାହୁଁଥିବା ସେ କହିଛନ୍ତି।
