ଚୌଦ୍ୱାର,୨୪ା୧୦(ଡି.ଏନ୍.ଏ.): କଠିନ ଅଧ୍ୟବସାୟ ଓ ଦୃଢ଼ ଇକ୍ତାଶକ୍ତି ଥିଲେ ସବୁ ସମ୍ଭବ। ମନରେ ଦୃଢ ସଙ୍କଳ୍ପ ରଖିଲେ ମଣିଷ ଅଭାବ ଅନଟନ ଭିତରେ ବି ସଫଳତା ପାଇପାରେ। ଏହାକୁ ପ୍ରମାଣ କରି ଦେଖାଇଛନ୍ତି ଜଣେ ପାନ ଦୋକାନୀଙ୍କ ପୁଅ। ସେ ହେଲେ କଟକ ଜିଲା ଟାଙ୍ଗୀ-ଚୌଦ୍ୱାର ବ୍ଲକ ଶଙ୍କରପୁର ଗ୍ରାମର ସୁବାଶିଷ ବେହେରା। ରେଭେନ୍ଶା କଲେଜର ସୁବାଶିଷ +୨ ବିଜ୍ଞାନ ପରୀକ୍ଷାରେ ୮୫ ପ୍ରତିଶତ ନମ୍ବର ରଖି ଉତ୍ତୀର୍ଣ୍ଣ ହେବା ସହ ତିରୁପତିସ୍ଥିତ ଇନ୍ଷ୍ଟିଚ୍ୟୁଟ୍ ଫର୍ ସାଇଣ୍ଟିଫିକ୍ ଆଣ୍ଡ୍ ଇଞ୍ଜିନିୟରିଂ ରିସର୍ଚ୍ଚ (ଆଇଜର୍)ରେ ପଢ଼ିବାର ସୁଯୋଗ ହାସଲ କରିଛନ୍ତି। ଏହି ସଫଳତା ତାଙ୍କ ଗ୍ରାମ ଶଙ୍କରପୁର ସହିତ ସମଗ୍ର ଓଡ଼ିଶା ପାଇଁ ଗର୍ବର ବିଷୟ ପାଲଟିଛି। ସୁବାଶିଷଙ୍କ ବାପା ପରମାନନ୍ଦ ବେହେରା ଏକ ଛୋଟିଆ ପାନଦୋକାନ କରି ପରିବାର ପ୍ରତିପୋଷଣ କରୁଥିବାବେଳେ ପୁଅ ଏଭଳି ସଫଳତା ପାଇ ତାଙ୍କ ମାନ ରଖିଛନ୍ତି। ପାନ ଦୋକାନରୁ ଯାହା ରୋଜଗାର ହୁଏ ସେଥିରେ ପରିବାରର ୪ ପ୍ରାଣୀ କୁଟୁମ୍ବ ଚଳିବା କଷ୍ଟସାଧ୍ୟ ହେଉଥିଲେ ହେଁ ପୁଅର ପାଠପଢ଼ା ପାଇଁ ସେ ଅଭାବକୁ ସହି ଯାଉଛନ୍ତି ବୋଲି ପରମାନନ୍ଦ କହିଛନ୍ତି। ସୁବାଶିଷ ୨୦୧୮ରେ ଆଗ୍ରାହାଟସ୍ଥିତ ସରସ୍ବତୀ ଶିଶୁ ମନ୍ଦିରରୁ ମାଟ୍ରିକ ପରୀକ୍ଷାରେ ୯୦ ପ୍ରତିଶତ ମାର୍କ ରଖି ଉତ୍ତୀର୍ଣ୍ଣ ହୋଇଥିଲେ। ଏହାପରେ କଟକ ରେଭେନ୍ଶା କଲେଜରେ ଅଧ୍ୟୟନ କଲେ। ମେଧାବୀ ଛାତ୍ର ଭାବେ ସେ ଶିକ୍ଷକମାନଙ୍କ ପ୍ରିୟ ହୋଇପାରିଥିଲେ। ପରିବାରର ଆର୍ଥିକ ସ୍ଥିତି ଭଲ ନ ଥିବାରୁ ସେ ଭଲ କୋଚିଂ ସେଣ୍ଟରରେ ପଢି ପାରି ନ ଥିଲେ। କିନ୍ତୁ ବୈଜ୍ଞାନିକ ହେବାର ଅଦମ୍ୟ ନିଶା ତାଙ୍କ ମନରୁ ଦୂରେଇ ଯାଇ ନ ଥିଲା। ସେ ଆଇନ୍ଷ୍ଟାଇନ୍ଙ୍କ ଭଳି ଜଣେ ବଡ ବୈଜ୍ଞାନିକ ହେବାକୁ ଆଶା ରଖିଛନ୍ତି। ସେ ତାଙ୍କର ଏହି ସଫଳତାର ଶ୍ରେୟ ମା’, ବାପା ଓ ଶିକ୍ଷକମାନଙ୍କୁ ଦେଇଛନ୍ତି। ପୁଅର ବୈଜ୍ଞାନିକ ହେବା ସ୍ବପ୍ନ ସତ ହେବାକୁ ଯାଉଥିବାରୁ ପରିବାର ଲୋକେ ଖୁସିରେ ଆମତ୍ହରା ହୋଇ ପଡ଼ିଛନ୍ତି। ତିରୁପତିସ୍ଥିତ ଆଇଜର୍ରେ ଅଧ୍ୟୟନ କରିବାର ସୁଯୋଗ ମିଳିଥିବାରୁ ସୁବାଶିଷ ଭଗବାନଙ୍କୁ କୃତଜ୍ଞତା ଜଣାଇଛନ୍ତି।
