ନୂଆଦିଲ୍ଲୀ,୧୫।୯: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଦୁଇ ଦିନ ମଧ୍ୟରେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବାକୁ ଘୋଷଣା କରିଛନ୍ତି। କେଜରିୱାଲଙ୍କ ଏହି ଘୋଷଣା ଉପରେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ନିଜର ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି ଯେ ଅରବିନ୍ଦ କେଜରିୱାଲ ଯେତେ ଶୀଘ୍ର ଇସ୍ତଫା ଦେବେ ସେତେ ଭଲ। ଦିଲ୍ଲୀର ଲୋକମାନେ ଯନ୍ତ୍ରଣା ଭୋଗୁଛନ୍ତି। ସେ ଦୁର୍ନୀତିରେ ବୁଡି ରହିଛନ୍ତି। ସେ କହିଛନ୍ତି, ଅରବିନ୍ଦ କେଜରିୱାଲ ହେଉଛନ୍ତି ଭାରତର ସବୁଠାରୁ ଦୁର୍ନୀତିଗ୍ରସ୍ତ ରାଜନେତା।
ସୂଚନାଯୋଗ୍ୟ, ଦିଲ୍ଲୀ ମୁଖ୍ୟମନ୍ତ୍ରୀ ଶନିବାର ଜେଲରୁ ଜାମିନ ପାଇବା ପରେ ପ୍ରଥମେ କର୍ମୀମାନଙ୍କୁ ଭେଟିଥିଲେ। ତାଙ୍କର ଲେଉଟାଣିକୁ ନେଇ ଆମ ଆଦମୀ ପାର୍ଟି ଯେତିକି ଖୁସି ପ୍ରକାଶ କରିଥିଲା ଏହାକୁ ନେଇ ଭାଜପା ଏଏପିକୁ ଟାର୍ଗେଟ କରିବାରେ ଲାଗିଛି।
ଧର୍ମେନ୍ଦ୍ରଙ୍କ ପୂର୍ବରୁ ଭାଜପା ଏମପି ପ୍ରବୀଣ ଖଣ୍ଡେଲୱାଲ ଦିଲ୍ଲୀ ମୁଖ୍ୟମନ୍ତ୍ରୀଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି, ରଙ୍ଗ ବଦଳାଇବା ପ୍ରସଙ୍ଗରେ ଅରବିନ୍ଦ କେଜରିୱାଲ ମଧ୍ୟ ଏଣ୍ଡୁଅଙ୍କୁ ପରାସ୍ତ କରିଛନ୍ତି। ଭାଜପା ଏମପି ଆହୁରି କହିଛନ୍ତି ଯେ ଅରବିନ୍ଦ କେଜରିୱାଲ ଏବେ ନିଜେ ଦିଲ୍ଲୀର ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦିଅନ୍ତୁ।
ନ୍ୟୁଜ ଏଜେନ୍ସି ଏଏନଆଇ ସହ ବାର୍ତ୍ତାଳାପ ବେଳେ ଭାଜପା ନେତା ହରିଶ ଖୁରାନା ମୁଖ୍ୟମନ୍ତ୍ରୀ କେଜରିୱାଲଙ୍କ ବିବୃତ୍ତିରେ କହିଛନ୍ତି, ‘ଯଦି ତାଙ୍କୁ ଇସ୍ତଫା ଦେବାକୁ ପଡିବ ତେବେ ଆଜି କାହିଁକି ନୁହେଁ? ଏହା ଏକ ଡ୍ରାମା ଯାହା ସେ ଲୋକଙ୍କୁ ପଚାରିବେ। ଯଦି କୋର୍ଟ ଆପଣଙ୍କୁ କହିଛନ୍ତି ଆପଣ ସଚିବାଳୟକୁ ଯାଇପାରିବେ ନାହିଁ, ଆପଣ କୌଣସି ଫାଇଲରେ ଦସ୍ତଖତ କରିପାରିବେ ନାହିଁ, ତେବେ ମୁଖ୍ୟମନ୍ତ୍ରୀ ପଦବରେ ରହିବା ପାଇଁ ଆପଣଙ୍କର ଯଥାର୍ଥତା କ’ଣ ରହିଛି ବୋଲି ଭାଜପା ନେତା ପ୍ରଶ୍ନ କରିଛନ୍ତି।