ଇସ୍ଲାମାବାଦ, ୧୭ା୧ (ଏପି)- ପାଖାପାଖି ଦୀର୍ଘ ୧୪ ବର୍ଷ ବ୍ୟବଧାନରେ ଦକ୍ଷିଣ ଆଫ୍ରିକା କ୍ରିକେଟ ଦଳ ଟେଷ୍ଟ ମ୍ୟାଚ ଖେଳିବା ଲାଗି ପାକିସ୍ତାନରେ ପହଞ୍ଚିଛି। ଖେଳାଳିମାନେ ବିମାନ ଯୋଗେ ଦକ୍ଷିଣାଞ୍ଚଳ ବନ୍ଦର ସହର କରାଚୀରେ ଓହ୍ଲାଇଛନ୍ତି। ଦକ୍ଷିଣ ଆଫ୍ରିକା ଦଳ ଶେଷଥର ପାଇଁ ୨୦୦୭ରେ ପାକିସ୍ତାନ ଟୁର୍ରେ ଯାଇଥିଲା। ସେତେବେଳେ ଦଳ ୨ମ୍ୟାଚବିଶିଷ୍ଟ ଟେଷ୍ଟ ସିରିଜ ୧-୦ରେ ଜିତିଥିଲା। ଏହାପରେ ପାକିସ୍ତାନ ଦୁଇଥର ଦକ୍ଷିଣ ଆଫ୍ରିକା ବିପକ୍ଷ ଘରୋଇ ଟେଷ୍ଟ ସିରିଜ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ୨୦୧୦ ଓ ୨୦୧୩ରେ ଆୟୋଜନ କରିଥିଲା। ୨୦୦୯ରେ ଲାହୋରଠାରେ ଶ୍ରୀଲଙ୍କା ଦଳ ଉପରେ ଆତଙ୍କବାଦୀ ଆକ୍ରମଣ ପରେ ପାକିସ୍ତାନ ୟୁଏଇକୁ ଏହାର ହୋମ୍ ଭେନ୍ୟୁ ଭାବେ ବ୍ୟବହାର କରିଆସୁଛି। ବର୍ତ୍ତମାନ ଟୁର୍ରେ ଦୁଇଟି ଟେଷ୍ଟ ମ୍ୟାଚ କରାଚୀ (ଜାନୁୟାରୀ ୨୬ରୁ ୩୦) ଏବଂ ରାଓ୍ବଲପିଣ୍ଡି (ଫେବୃୟାରୀ ୪ରୁ୮)ରେ ଖେଳାଯିବ। ପରେ ଲାହୋରରେ ୩ ମ୍ୟାଚ ବିଶିଷ୍ଟ ଟି୨୦ ସିରିଜ ଫେବୃୟାରୀ ୧୧ରୁ ଖେଳାଯିବ।
ଦକ୍ଷିଣ ଆଫ୍ରିକା ଦଳ: କ୍ୱିଣ୍ଟନ ଡି’କକ୍ (ଅଧିନାୟକ), ଏଡେନ ମାରକ୍ରାମ, ଡିନ୍ ଏଲ୍ଗାର, ଫାଫ୍ ଡୁ’ପ୍ଲେସି, ଟେମ୍ବା ବାଭୁମା, କାଗିସୋ ରାବାଡା, ଡ୍ବେନ ପ୍ରିଟୋରିଅସ୍, କେଶବ ମହାରାଜ, ଲୁଙ୍ଗି ଏନ୍ଗିଡି, ରସି ଭାନ୍ଡର ଡୁସେନ, ଏନ୍ଣଇଛ୍ ନୋର୍ଜେ, ଓ୍ବିଆନ ମଲ୍ଡର, ଲୁଥୋ ସିପାମ୍ଲା, ବେଉରାନ ହେଣ୍ଡ୍ରିକ୍ସ, କାଇଲ୍ ଭେରିନି, ସାରେଲ ଏରଓ୍ବି, କିଗାନ ପିଟରସନ, ଟାବ୍ରେଜ୍ ଶାମ୍ସି, ଜର୍ଜ ଲିଣ୍ଡେ, ଡେରିନ୍ ଡୁପାଭିଲନ, ମାର୍କୋ ଜାନ୍ସେନ୍।
