ସମ୍ବଲପୁର,୧୯।୪(ବ୍ୟୁରୋ): ୨୦ ଲକ୍ଷ ଟଙ୍କାର ସୁନା ଭର୍ତ୍ତି ବ୍ୟାଗ୍ ପାଇ ଫେରାଇ ଦେଲେ ବ୍ୟକ୍ତି। ଏଭଳି ମାନବିକତା ଦେଖିବାକୁ ମିଳିଥିଲା ସମ୍ବଲପୁର ଏସଆରଆଇଟି କଲୋନୀରେ। ସମ୍ବଲପୁର ଏସ୍ଆରଆଇଟି କଲୋନୀର ସୌଦାମିନୀ ପତି ସହର ବାହାରକୁ ଯିବାକୁ ଥିବା ବେଳେ କଲ୍ୟାଣ ନଗରରେ ରହୁଥିବା ଝିଅ କଳ୍ପନା ସାହୁଙ୍କୁ ଡାକି ସବୁ ଅଳଙ୍କାର ନେଇଯିବାକୁ କହିଥିଲେ। ଫୋନ ପାଇ କଳ୍ପନା ଆସି ଗୋଟିଏ ବ୍ୟାଗ ସାହାଯ୍ୟରେ ତାହା ନେବା ବେଳେ ବାଟରେ ପଡିଯାଇଥିଲା। ତେବେ ସନ୍ଧ୍ୟା ଭ୍ରମଣ ସମୟରେ ଯାଉଥିବା ଏସ୍ଆରଆଇଟି କଲୋନୀର ତାପସ ସ୍ବାଇଁ ଏହାକୁ ପାଇ ସବୁ ସୁନା ଗହଣା ଅଇଁଠାପାଲି ଥାନା ଜିମା ଦେଇଥିଲେ। ଥାନା ଅଧିକାରୀ ଯୋଗେଶ ପଣ୍ଡା ମା’ ଝିଅଙ୍କୁ ଡାକି ସବୁ ସୁନାଗହଣା ଫେରାଇ ଦେଇଥିଲେ। ଏହି ଘଟଣା ପରେ ତାପସଙ୍କୁ ପ୍ରଶଂସାର ସୁଅ ଛୁଟୁଥିବା ବେଳେ ମଙ୍ଗଳବାର ପୁରସ୍କୃତ କରାଯାଇଛି। ଏହିପରି ସଚ୍ଚୋଟତା କାର୍ଯ୍ୟ ସମାଜକୁ ପ୍ରେରଣା ଦେଇଥାଏ । ତାପସଙ୍କ ଏହି ମହତ୍ୱପୂର୍ଣ୍ଣ କାର୍ଯ୍ୟପାଇଁ ତାଙ୍କୁ ସମ୍ବଲପୁର ଏସ୍ପି ବାତ୍ତୁଲା ଗଙ୍ଗାଧର ନଗଦ ୧୦୦୦ ଟଙ୍କା ପୁରସ୍କାର ରାଶି ପ୍ରଦାନ କରିଛନ୍ତି।
