ନାପଲ୍ସ, ୬ା୧୨ (ଏପି)-ଇଟାଲିଆନ କ୍ଲବ ନାପୋଲି ଏହାର ପୂର୍ବତନ ଅଧିନାୟକ ଡଏଗୋ ମାରାଡୋନାଙ୍କୁ ସମ୍ମାନିତ କରିବାକୁ ଯାଇ ନିଜ ଷ୍ଟାଡିୟମର ନାମ ବଦଳାଇ ଦେଇଛି। ନାପଲ୍ସ ସିଟି କାଉନ୍ସିଲର ସର୍ବସମ୍ମତି ନିଷ୍ପତ୍ତିକ୍ରମେ ଷ୍ଟାଡିଓ ସାନ୍ ପାଓଲୋର ନାମ ପରିବର୍ତ୍ତନ କରାଯାଇ ଷ୍ଟାଡିଓ ଡିଏଗୋ ଆର୍ମାଣ୍ଡୋ ମାରାଡୋନା ରଖାଯାଇଛି। ଗତ ସପ୍ତାହରେ ମାରାଡୋନାଙ୍କର ୬୦ବର୍ଷ ବୟସରେ ନିଜ ଦେଶ ଆର୍ଜେଣ୍ଟିନାରେ ଦେହାନ୍ତ ହୋଇଯାଇଛି। ଏହି ଅବସରରେ ନାପୋଲି ଷ୍ଟାଡିୟମରେ ତାଙ୍କର ହଜାର ହଜାର ସଂଖ୍ୟା ପ୍ରଶଂସକ ଏକାଠି ହୋଇ ଶୋକ ପ୍ରକାଶ କରିଥିଲେ। ସେମାନେ କିମ୍ବଦନ୍ତୀ ଖେଳାଳିଙ୍କ ଫଟୋରେ ପୁଷ୍ପମାଲ୍ୟ ଅର୍ପଣ କରିଥିଲେ। ମହମବତି ଜାଳିବା ସହ ସେମାନଙ୍କ ଲିଖିତ ମତ ଉପସ୍ଥାପନ କରିଥିଲେ। ମାରାଡୋନା ୧୯୮୪ରୁ ୧୯୯୧ ପର୍ଯ୍ୟନ୍ତ ୭ବର୍ଷ ଧରି ନାପୋଲିର ନେତୃତ୍ୱ ନେଇଥିଲେ। ସେ ଏହି କ୍ଲବକୁ ୧୯୮୭ ଓ ୧୯୯୦ରେ ସିରି ଏ’ ଟାଇଟଲ, ୧୯୮୭ରେ ଇଟାଲିଆନ କପ୍ ଏବଂ ୧୯୮୯ରେ ଏକମାତ୍ର ପ୍ରମୁଖ ଟାଇଟଲ ଇରୋପିଆନ ଟାଇଟଲ ୟୁଫା କପ୍ ଜିତାଇଥିଲେ। ସୂଚନାଯୋଗ୍ୟ, ମାରାଡୋନାଙ୍କ ଦେହାନ୍ତର ଦିନକ ପରେ ନାପୋଲି ଏଚ୍ଏନ୍କେ ରିଜେକା ବିପକ୍ଷ ଏହାର ୟୁରୋପା ଲିଗ୍ ମ୍ୟାଚ ଖେଳିଥିଲା। ମାରାଡୋନାଙ୍କୁ ସମ୍ମାନ ଜଣାଇ ଏହି ମ୍ୟାଚରେ ନାପୋଲି କ୍ଲବର ସମସ୍ତ ଖେଳାଳି ‘ମାରାଡୋନା ୧୦.’ ଲେଖାଥିବା ଶାର୍ଟ ପରିଧାନ କରିଥିଲେ।