ଗାଁ ଗାଁରେ ପୁଷ୍ଟିସାର ଖାଦ୍ୟ ଖାଇବା ଲାଗି ସଚେତନତା, ତାଲିମ ପାଉଛନ୍ତି ଅଙ୍ଗନଓ୍ବାଡି-ଓ୍ବାର୍ଡ ସଭ୍ୟାସଭ୍ୟ

ଦାରିଙ୍ଗବାଡି, ୨୮।୩ (ଅରୁଣ ସାହୁ): ରାଜ୍ୟରେ ଅପପୁଷ୍ଟି ରୋକିବା ସହ ସାଧାରଣ ଲୋକ କିଭଳି ସୁସ୍ଥ ଜୀବନଯାପନ କରିପାରିବେ ସେନେଇ ରାଜ୍ୟସରକାର ପ୍ରୟାସ ଜୋରଦାର କରିଛନ୍ତି। ସମସ୍ତେ ସୁସ୍ଥ ରହିଲେ ଲୋକଙ୍କ ଆର୍ଥିକ ପରିସ୍ଥିତିରେ ମଧ୍ୟ ସୁଧାର ଆସିବ। ଏଥିପାଇଁ ସମସ୍ତେ ଗାଁ ଗାଁ ରେ କିଭଳି କ୍ଷୁଦ୍ରଦାନା ଶସ୍ୟ ଯଥା ମାଣ୍ଡିଆ, କାଙ୍ଗୁ, କୁଏରୀ ଆଦି ଶସ୍ୟରେ ଖାଦ୍ୟ ପ୍ରସ୍ତୁତିକରି ଖାଇଲେ ଲୋକ ରକ୍ତଚାପ, ମଧୂମେହ ଭଳି ରୋଗରୁ ମୁକ୍ତ ହୋଇପାରିବେ ଏଥିପାଇଁ ୨ ଦିନିଆ କର୍ମଶାଳା ଅନୁଷ୍ଠିତ ହୋଇଯାଇଛି। ଏଥିରେ ଦାରିଙ୍ଗବାଡି ବ୍ଲକରେ କାର୍ଯ୍ୟରତ ଅଙ୍ଗନାୱାଡି କର୍ମୀ ଏବଂ ୱାର୍ଡ ସଭ୍ୟାସଭ୍ୟମାନଙ୍କୁ ତାଲିମ ପ୍ରଦାନ କରାଯାଉଛ। ତାଲିମଦାତା ଭାବେ ପାହାଡି ପ୍ରଡ୍ୟୁସର ଗ୍ରୁପର ଅଧ୍ୟକ୍ଷ ଶରତ ଚନ୍ଦ୍ର ପ୍ରଧାନ, ଆଞ୍ଚଳିକ ରିସର୍ସ ପର୍ସନ ପ୍ରଫୁଲ୍ଲ ଚନ୍ଦ୍ର ମହାପାତ୍ର ପ୍ରମୁଖ ଏହି ତାଲିମ ପ୍ରଦାନ କରିଥିଲେ। ସେହିପରି ଏହାକୁ ଲୋକାଭିମୁଖୀ କରିବା ପାଇଁ ଶ୍ରୀଅର୍ଣ୍ଣ ଅଭିଯାନ ପକ୍ଷରୁ କ୍ଷୁଦ୍ରଦାନା ଶସ୍ୟରୁ ପ୍ରସ୍ତୁତ କରାଯାଇଥିବା କାଙ୍ଗୁ ଖିରି, ମାଣ୍ଡିଆ ସୁପ, ଲଡ଼ୁ, ପିଆଜି, କାକେରା, ଗୁଲୁଗୁଲା, ପକୋଡ଼ା ଆଦି କରାଯାଇ ଲୋକଙ୍କୁ ଖାଇବାକୁ ଦିଆଯିବା ସହ ନିୟମିତ ଖାଇବାକୁ ପରାମର୍ଶ ଦିଆଯାଇଥିଲା । ଏହି କ୍ଷୁଦ୍ରଦାନାରେ ଖାଦ୍ୟ ପ୍ରସ୍ତୁତୀ ମେଳାକୁ ଜାଗୃତି ସମ୍ପାଦକ କୈଳାଶ ଚନ୍ଦ୍ର ଦଣ୍ଡପାଟ ଓ ଅନ୍ୟ ଉପସ୍ଥିତ ଅତିଥିମାନେ ଉଦ୍‌ଘାଟନ କରିଥିଲେ । କାର୍ଯ୍ୟକ୍ରମକୁ ସଦାନନ୍ଦ ସିଂ ଙ୍କ ସମେତ ଶ୍ରୀଅର୍ଣ୍ଣ ଅଭିଯାନର ପ୍ରକଳ୍ପ ସଂଯୋଜକ ଦେବାନନ୍ଦ ଦାସ,ସହ ସଂଯୋଜକ ବିମଳ ନାୟକ, ଆଞ୍ଚଳିକ ସଂଯୋଜକ ପ୍ରଫୁଲ ମହାପାତ୍ର,ଜିଳେଶ୍ୱର ପ୍ରଧାନ,ଅଶୋକ ବେହେରା,ପ୍ରେମାନନ୍ଦ ସିଂ ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।