ଚେନ୍ନାଇ,୨୬ା୪:ରାଜ୍ୟର ୧୩ଟି ବିଶ୍ୱବିଦ୍ୟାଳୟରେ କୁଳପତି ଚୟନ ଏବେ ରାଜ୍ୟପାଳଙ୍କ ପରିବର୍ତ୍ତେ ରାଜ୍ୟ ସରକାର କରିବେ। ଏନେଇ ତାମିଲନାଡୁ ସରକାର ସୋମବାର ବିଧାନସଭାରେ ଦୁଇଟି ବିଲ୍ ଗୃହୀତ କରାଇଛନ୍ତିି। ରାଜ୍ୟପାଳଙ୍କ କୁଳପତି ନିଯୁକ୍ତି କ୍ଷମତା ଉଚ୍ଛେଦ କରିବା ଏହି ବିଲ୍ର ଉଦ୍ଦେଶ୍ୟ। ରାଜ୍ୟପାଳ ଆର୍.ଏନ୍. ରବି କେବଳ ରାଜ୍ୟ, କେନ୍ଦ୍ରୀୟ ଏବଂ ଘରୋଇ ବିଶ୍ୱବିଦ୍ୟାଳୟଗୁଡ଼ିକର କୁଳପତିମାନଙ୍କର ଦୁଇଟି ସମ୍ମିଳନୀରେ ଅଧ୍ୟକ୍ଷତା କରିବେ। ନିର୍ବାଚନ ପ୍ରଚାର ବେଳେ ମୁଖ୍ୟମନ୍ତ୍ରୀ ଏମ୍.କେ. ଷ୍ଟାଲିନ୍ ଦେଇଥିବା ପ୍ରତିଶ୍ରୁତି କାର୍ଯ୍ୟକାରୀ କରିବା ଲାଗି ଏଭଳି ବିଲ୍ ଅଣାଯାଇଛି। ଏଆଇଏଡିଏମ୍କେ ପ୍ରଥମେ ବିଲ୍କୁ ବିରୋଧ କରିଥିବାବେଳେ ଭାଜପା କକ୍ଷତ୍ୟାଗ କରିଥିଲା। ତାମିଲନାଡୁ ୟୁନିଭର୍ସିଟି ଲ (ସଂଶୋଧନ) ବିଲ୍ ଏବଂ ଚେନ୍ନାଇ ୟୁନିଭର୍ସିଟି ଆକ୍ଟ ଧ୍ୱନି ମତରେ ଗୃହୀତ ହୋଇଛି। ମୁଖ୍ୟମନ୍ତ୍ରୀ ଷ୍ଟାଲିନ୍ କହିଛନ୍ତି, ପୂର୍ବରୁ ରାଜ୍ୟ ସରକାରଙ୍କ ପରାମର୍ଶକ୍ରମେ ରାଜ୍ୟପାଳ କୁଳପତିମାନଙ୍କୁ ନିଯୁକ୍ତି ଦେଉଥିଲେ। ହେଲେ ନିକଟ ଅତୀତରେ ରାଜ୍ୟପାଳ ଏକତରଫା ଭାବେ କୁଳପତି ନିଯୁକ୍ତ କରୁଛନ୍ତି।
ନିର୍ବାଚିତ ସରକାର ସେମାନଙ୍କୁ ନିଯୁକ୍ତି ଦେଇପାରୁ ନାହିଁ। ଏହା ଗଣତାନ୍ତ୍ରିକ ନୀତିର ବିରୋଧ। କୁଳପତି ନିଯୁକ୍ତି କ୍ଷମତା ରାଜ୍ୟପାଳଙ୍କୁ ଦିଆଯିବା ଉଚିତ ନୁହେଁ ବୋଲି ଆନ୍ତଃରାଜ୍ୟ ସମ୍ପର୍କ ଉପରେ ଗଠିତ ପୁଞ୍ଛି କମିଶନ ସୁପାରିସ କରିଥିଲେ। କମିଶନଙ୍କ ମତାମତ ଉପରେ ୧୯ଟି ରାଜ୍ୟ ସହମତ ଥିଲେ। ଏପରିକି ଇ.କେ. ପଲାନିସ୍ବାମୀଙ୍କ ନେତୃତ୍ୱାଧୀନ ଏଆଇଏଡିଏମ୍କେ ସରକାର ମଧ୍ୟ ରାଜ୍ୟପାଳଙ୍କ ହାତରେ କୁଳପତି ନିଯୁକ୍ତି କ୍ଷମତା ରହିବା ଉଚିତ ନୁହେଁ ବୋଲି ସେତେବେଳେ ମତ ଦେଇଥିଲା ବୋଲି ଷ୍ଟାଲିନ କହିଛନ୍ତି।