ଭୁବନେଶ୍ୱର,୧୯।୧(ବ୍ୟୁରୋ) : କରୋନା ପରିସ୍ଥିତି ପାଇଁ ୧୦ ମାସ ଧରି ବନ୍ଦ ରହିବା ପରେ ମଙ୍ଗଳବାରଠାରୁ ସର୍ବସାଧାରଣଙ୍କ ପାଇଁ ଖୋଲିବ ଭୁବନେଶ୍ୱରସ୍ଥିତ ରାଜ୍ୟ ସଂଗ୍ରହାଳୟ ଓ କଟକସ୍ଥିତ ଆନନ୍ଦଭବନ ସଂଗ୍ରହାଳୟ। ସଂଗ୍ରହାଳୟ ପରିସରରେ କୋଭିଡ୍ ଗାଇଡ୍ଲାଇନ୍କୁ କଡ଼ାକଡ଼ି ପାଳନ କରାଯିବ। ସମସ୍ତଙ୍କ ପାଇଁ ମାସ୍କ ଓ ସାନିଟାଇଜର୍ ବାଧ୍ୟତାମୂଳକ କରାଯାଇଥିବାବେଳେ ସଂଗ୍ରହାଳୟକୁ ପ୍ରବେଶ ପୂର୍ବରୁ ଥର୍ମାଲ୍ ସ୍କ୍ରିନିଂ କରାଯିବ। ଆଗାମୀ କିଛିଦିନ ପର୍ଯ୍ୟନ୍ତ ଦିନକୁ ୨୦୦ ଲୋକଙ୍କ ପାଇଁ ଟିକେଟ୍ର ବ୍ୟବସ୍ଥା କରାଯାଇଛି। ବର୍ତ୍ତମାନ ଅଫ୍ଲାଇନ୍ ମାଧ୍ୟମରେ ଟିକେଟ୍ କରାଯାଇ ଲୋକଙ୍କୁ ପ୍ରବେଶ ଅନୁମତି ମିଳିବ। ଆଗାମୀ ସ୍ଥିତିକୁ ଦୃଷ୍ଟିରେ ରଖି ପର୍ଯ୍ୟଟକ ଓ ଦର୍ଶକଙ୍କ ସଂଖ୍ୟାକୁ ବୃଦ୍ଧି କରାଯିବ ବୋଲି ରାଜ୍ୟ ସଂଗ୍ରହାଳୟ ଅଧିକ୍ଷକ ଭାଗ୍ୟଲିପି ମଲ୍ଲ ସୂଚନା ଦେଇଛନ୍ତି।
ତେବେ ଖୋଲିବା ପୂର୍ବରୁ ସଂଗ୍ରହାଳୟ ପରିସରକୁ ସମ୍ପୂର୍ଣ୍ଣ ସାନିଟାଇଜ୍ କରାଯାଇଛି। ଦୀର୍ଘଦିନ ଧରି ବନ୍ଦ ହୋଇ ରହିଥିବା ସଂଗ୍ରହାଳୟରେ ପର୍ଯ୍ୟଟକ ଏବେ ନୂତନ ଅନୁଭୂତି ପାଇପାରିବେ। ଗ୍ୟାଲେରୀର ଆଲୋକୀକରଣ ସହିତ ମନଛୁଆଁ ସଙ୍ଗୀତର ମଜା ନେବେ। ଖୁବ୍ଶୀଘ୍ର ରାଜ୍ୟ ସଂଗ୍ରହାଳୟ ପରିସରକୁ ବ୍ୟାପକ କରାଯାଇ ଆହୁରି ୫ଟି ନୂଆ ଗ୍ୟାଲେରୀ ଖୋଲାଯିବ। ଏହାମଧ୍ୟରେ କ୍ରିଏଟିଭ୍ ଆର୍ଟ ଗ୍ୟାଲେରୀ, ଇନ୍ଟାଞ୍ଜିବଲ୍ ଐତିହ୍ୟ, ସ୍ବାଧୀନତା ସଂଗ୍ରାମୀ ଗ୍ୟାଲେରୀ, ମହାତ୍ମାଗାନ୍ଧୀ ଗ୍ୟାଲେରୀ ଓ ପଟ୍ଟଚିତ୍ର ଗ୍ୟାଲେରୀ ରହିଛି। ଏସବୁର କାମ ଖୁବ୍ଶୀଘ୍ର ଶେଷ ହେବ। ଅନ୍ୟ ଆଞ୍ଚଳିକ ସଂଗ୍ରହାଳୟଗୁଡ଼ିକୁ ଧିରେ ଧିରେ ଖୋଲାଯିବ। ଏହାସହିତ ଖୁବ୍ଶୀଘ୍ର ଅନ୍ଲାଇନ୍ ଏବଂ ଅଫ୍ଲାଇନ୍ ମାଧ୍ୟମରେ ଟିକେଟ୍ର ବ୍ୟବସ୍ଥା କରାଯିବ ବୋଲି ଅଧୀକ୍ଷକ ମଲ୍ଲ କହିଛନ୍ତି।