ଭୁବନେଶ୍ୱର,୨୨।୧: କେନ୍ଦ୍ର ସରକାର କରୋନା ମହାମାରୀର ମୁକାବିଲା ପାଇଁ ରାଜ୍ୟଗୁଡ଼ିକୁ ଆର୍ଥିକ ସହାୟତା ଦେବାକୁ ଏକ ବଡ଼ ପଦକ୍ଷେପ ଗ୍ରହଣ କରିଛନ୍ତି। ଫଳରେ କେନ୍ଦ୍ର ସରକାର ରାଜ୍ୟଗୁଡ଼ିକୁ ଟିକସ ବାବଦର ଅଗ୍ରିମ କିସ୍ତି ବଣ୍ଟନ କରିବାକୁ ନିକଟରେ ଆବଶ୍ୟକ ମଞ୍ଜୁରୀ ପ୍ରଦାନ କରିଛନ୍ତି। ରାଜ୍ୟଗୁଡ଼ିକୁୁ ଟିକସ ଭାଗର ୨ୟ ଅଗ୍ରିମ କିସ୍ତି ପ୍ରଦାନ ପାଇଁ ଅର୍ଥମନ୍ତ୍ରୀ ନିର୍ମଳା ସୀତାରାମନ ମନ୍ତ୍ରଣାଳୟକୁ ନିର୍ଦ୍ଦେଶ ଦେଇଛନ୍ତି। ଫଳରେ ୨ୟ ଅଗ୍ରିମ କିସ୍ତିରେ ରାଜ୍ୟଗୁଡ଼ିକୁୁ ମୋଟ ୪୭,୫୪୧ କୋଟି ଟଙ୍କା ପ୍ରଦାନ କରାଯିବ। ଜାନୁୟାରୀରେ ମିଳିବାକୁ ଥିବା ୪୭,୫୪୧ କୋଟିର ନିୟମିତ ଟିକସ ଭାଗ ସହ ଅତିରିକ୍ତ ଭାବେ ଏହି ଅଗ୍ରିମ ରାଶି ମିଶାଇ ମୋଟ ୯୫ ହଜାର କୋଟି ଟଙ୍କା ପ୍ରଦାନ କରାଯିବ। ଏହି ନିୟମିତ କିସ୍ତି ଓ ଅଗ୍ରିମ କିସ୍ତି ବାବଦରେ ଓଡ଼ିଶା ପ୍ରାୟ ୨୧୫୨.୬୬ କୋଟି ଟଙ୍କା ପାଇବ। ଏଣୁ ନିୟମିତ ଓ ଅଗ୍ରିମ କିସ୍ତିକୁ ମିଶାଇ ଚଳିତ ମାସରେ ଓଡ଼ିଶା ମୋଟ ୪୩୦୫.୩୨ କୋଟି ଟଙ୍କା ପାଇବ। କେନ୍ଦ୍ର ସରକାର ଗତ ନଭେମ୍ବର ୨୨ରେ ଟିକସ ଭାଗର ପ୍ରଥମ ଅଗ୍ରିମ କିସ୍ତି ରାଜ୍ୟଗୁଡ଼ିକୁୁ ପ୍ରଦାନ କରିଥିଲେ। ଏହି ୨ କିସ୍ତିକୁ ମିଶାଇ ରାଜ୍ୟଗୁଡ଼ିକ ଜାନୁୟାରୀ ସୁଦ୍ଧା ଅତିରିକ୍ତ ୯୦,୦୮୨ କୋଟି ଟଙ୍କା ପାଇସାରିଲେଣି ବୋଲି ମନ୍ତ୍ରଣାଳୟ ପକ୍ଷରୁ କୁହାଯାଇଛି। ଅନ୍ୟପକ୍ଷରେ ଜିଏସ୍ଟି କ୍ଷତିପୂରଣ ବାବଦରେ କେନ୍ଦ୍ର ସରକାର ରାଜ୍ୟଗୁଡ଼ିକୁ ଋଣ ଆକାରରେ ୧.୫୯ ଲକ୍ଷ କୋଟି ଟଙ୍କା ପ୍ରଦାନ କରିସାରିଛନ୍ତି। ଟିକସ ସଂଗ୍ରହର ୪୧% ଅଂଶ ରାଜ୍ୟଗୁଡିକୁ ମିଳିଥାଏ ବୋଲି ଅର୍ଥ ମନ୍ତ୍ରଣାଳୟ ପକ୍ଷରୁ କୁହାଯାଇଛି।