ବାହାନଗା, ୩ା୧୧(ଡି.ଏନ.ଏ.): ବାଲେଶ୍ୱର ଜିଲା ବାହାନଗା ବ୍ଲକ ପରିସରରେ ଥିବା ଏକ ପରିସଂଖ୍ୟାନ କାର୍ଯ୍ୟାଳୟ ଭୂତକୋଠି ପାଲଟିଛି। କାର୍ଯ୍ୟାଳୟକୁ କୌଣସି କର୍ମଚାରୀ ଆସନ୍ତି ନାହିଁ । ଫଳରେ ବର୍ଷ ବର୍ଷ ଧରି କାର୍ଯ୍ୟାଳୟ ଗୃହରେ ତାଲା ପଡିରହିଛି । ଏହି ବିଭାଗ ସରକାରଙ୍କ ମୁଖ୍ୟ ବିଭାଗ ଥିବା ବେଳେ ସେଥିରେ କୌଣସି ଲୋକମାନେ ଉପକୃତ ହୋଇପାରୁନାହାନ୍ତି। ଏହି ବିଭାଗ ଦ୍ୱାରା ଚାଷୀମାନେ ଉପକୃତ ହୋଇଥାନ୍ତି।
ପରିସଂଖ୍ୟାନ ବିଭାଗ ସରକାରଙ୍କୁ ବିଭିନ୍ନ ବିଭାଗର ତଥ୍ୟ ପ୍ରଦାନ କରିଥାଏ। ସେହି ତଥ୍ୟ ଅନୁଯାୟୀ ସରକାରଙ୍କ ବିଭିନ୍ନ ବିଭାଗର ସଫଳତା ଓ ଚାଷୀଙ୍କ ପାଇଁ ରିହାତି ଆଦି ଘୋଷଣା କରିଥାନ୍ତି ା ପରିସଂଖ୍ୟାନ ବିଭାଗ ମରୁଡି ସମୟରେ ମୁଖ୍ୟ ଭୂମିକା ତୁଲାଇଥାଏ। ତେବେ ଚାଷ ସମୟରେ କ୍ରପ୍ଟ କଟିଂ ରିପୋର୍ଟ ଅନୁଯାୟୀ ସରକାର ଯେକୌଣସି ନିଷ୍ପତ୍ତି ନେଇଥାନ୍ତି। ସ୍ବାସ୍ଥ୍ୟବିଭାଗ ହେଉ କିମ୍ବା ବଜାର ଦର ହେଉ ଅଥବା ବିଭିନ୍ନ ବିଭାଗର ପରିସଂଖ୍ୟାନ ତଥ୍ୟ ସରକାରଙ୍କୁ ପ୍ରଦାନ କରିଥାନ୍ତି। ଏଭଳି ଏକ ବିଭାଗ ବ୍ଲକ ପରିସରରେ ତାର କାର୍ଯ୍ୟାଳୟ ଥିଲେ ମଧ୍ୟ କେବେ କେତେବେଳେ କାର୍ଯ୍ୟାଳୟ ଖୋଲିବାର ଦେଖିବାକୁ ମିଳେନାହିଁ। ବିଭାଗରେ କେତେଜଣ କର୍ମଚାରୀ ଅଛନ୍ତି ସେ ବାବଦରେ କେହି ଜାଣି ନ ଥିବା ବେଳେ ବ୍ଲକର ମୁଖ୍ୟ ହିସାବରେ ବିଡିଓ ମଧ୍ୟ ଜାଣିନାହାନ୍ତି ସେ ବିଭାଗରେ କେତେଜଣ କର୍ମଚାରୀ ଅଛନ୍ତି କି ନାହାନ୍ତି ା ତେବେ ବ୍ଲକ ପରିସରରେ ଥିବା ଏହି ବିଭାଗର କାର୍ଯ୍ୟାଳୟ ଭୂତକୋଠି ପାଲଟିଥିବା ଦେଖାଯାଇଛି। ଏ ବାବଦରେ ବିଡିଓ ଗୌରାଙ୍ଗ ଘୋଷ କହନ୍ତି ବିଭାଗର କାର୍ଯ୍ୟାଳୟ ଅଛି କିନ୍ତୁ ସେଠାକୁ କେବେ କୌଣସି କର୍ମଚାରୀ ଆସିବାର ମୁଁ ଜାଣିନାହିଁ। ମାତ୍ର ଭୋଟ ସମୟରେ ସେହି କାର୍ଯ୍ୟାଳୟ ଖୋଲି ଅନ୍ୟ କାମରେ ଲଗାଯାଇଥାଏ। ଯଦି ପରିସଂଖ୍ୟାନ କାର୍ଯ୍ୟାଳୟ ସେଠାରେ ଚାଲନ୍ତା ତା’ହେଲେ ସେ ଘର ଭିତରେ କ’ଣ ପାଇଁ ଅନ୍ୟ କାମ କରାଯାନ୍ତା ବୋଲି ମତବ୍ୟକ୍ତ କରିଥିଲେ।