କେନ୍ଦୁଝର, ୮।୧୦ (ସ୍ବ.ପ୍ର.): କୋଭିଡ୍ ସମୟରେ ରୋଜଗାର ସମ୍ପୂର୍ଣ୍ଣ ଠପ୍ ହୋଇଯାଇଥିଲା। କଣ କରିବେ କିଛି ମୁଣ୍ଡକୁ ଢୁକୁ ନ ଥିଲା। ଅର୍ଥ ରୋଜଗାର ଚିନ୍ତାରେ ପଡିଥିବା କେନ୍ଦୁଝର ଜିଲା ହରିଚନ୍ଦନପୁର ବ୍ଲକ ଓସ୍ତପଙ୍ଗା ଗ୍ରାମର ନିତ୍ୟାନନ୍ଦ ନାୟକ ଶେଷରେ ନିଜର ନିଶାକୁ ପେଶାରେ ପରିବର୍ତ୍ତନ କରିବାକୁ ଉଦ୍ୟମ କରିଥିଲେ। ସେ ମହାମାରୀ ସମୟରେ ବର୍ଷତମାମ ମୂର୍ତ୍ତି ଗଢିବା ସହ ଚିତ୍ର କରି ରୋଜଗାରକ୍ଷମ ହୋଇପାରିଛନ୍ତି। ବିଶେଷ କରି ପାର୍ବଣ ଋତୁରେ ଅନ୍ୟ ଯୁବଗୋଷ୍ଠୀଙ୍କ ସହ ମିଶି ଦେବାଦେବୀ ମୂର୍ତ୍ତି ନିର୍ମାଣ କରି ସ୍ବାବଲମ୍ବୀ ହୋଇପାରିଛନ୍ତି। ବିଶ୍ୱକର୍ମା, ଗଣେଶ ପୂଜା ପାଇଁ ମୂର୍ତ୍ତି ଗଢିବା ପରେ ଏବେ ଲକ୍ଷ୍ମୀ ମୂର୍ତ୍ତି ଗଢିବାରେ ମନୋନିବେଶ କରିଛନ୍ତି। ତାଙ୍କର ୪ ଜଣ ସାଙ୍ଗ ମିଶି ଏହି କାମରେ ଲାଗିଛନ୍ତି। ବ୍ୟବସାୟ ମାନ୍ଦା ରହୁଥିଲେ ହେଁ ଜୀବନଶୈଳୀରେ କିଛିଟା ପରିବର୍ତ୍ତନ ହୋଇଥିବା ନିତ୍ୟାନନ୍ଦ କହିଛନ୍ତି।
ବାଲେଶ୍ୱର ଆର୍ଟ କଲେଜରେ ଯୁକ୍ତ ଦୁଇ ପାଠ ପଢିବା ପରେ ନିତ୍ୟାନନ୍ଦ କେନ୍ଦୁଝର ଆର୍ଟ କଲେଜରେ ୩ମାସ ତାଲିମ ନେଇଛନ୍ତି। କେଲ ମାଟିରେ ସେ ମୂର୍ତ୍ତି ଗଢିଥାନ୍ତି। ରଙ୍ଗ, କନା ଆଦି ବାହାରୁ କିଣି ଆଣିଥାନ୍ତି। ଟେରାକୋଟା କାମରୁ ଆରମ୍ଭ କରି ସେ ଏବେ ମୂର୍ତ୍ତି ଗଢିବା କାମ ସହ ଜରି ମେଢ କାମ କରୁଛନ୍ତି। ମାଟି ମୂର୍ତ୍ତି ବ୍ୟତୀତ ବରାଦ ଆସିଲେ ସିମେଣ୍ଟର ମୂର୍ତ୍ତି ସମେତ ଅଶୋକ ସ୍ତମ୍ଭ ଆଦି କାମ କରିଥାନ୍ତି।ଏଥିରେ ଯାହା ମିଳେ ସେଥିରେ ଚଳିଯାଆନ୍ତି।
ଦୀର୍ଘ ୫ ବର୍ଷ ହେଲା ସେ ଏହି କାମ କରିଆସୁଛନ୍ତି। ଏବେ ଆଖପାଖ ଗ୍ରାମର ଗ୍ରାମର ଛବି ନାୟକ, ଚକ୍ରଧର ନାୟକ, ଦୀପକ ଓରାମ ତାଙ୍କ ସହିତ ସାମିଲ ହୋଇଛନ୍ତି। ଅନ୍ୟ ସମୟରେ ଚାଷବାସ କାମରେ ଲାଗିଥାନ୍ତି। ଆଜିକାଲି ମେଶିନ ଦ୍ୱାରା ରଙ୍ଗ ଦେବା ତଥା ଅନ୍ୟାନ୍ୟ କାମ କରାଯାଉଛି। ଯାହାକି ଅଧିକ ସୁନ୍ଦର ମୂର୍ତ୍ତି ଗଢାଯାଇ ପାରୁଛି।ଅଧିକ ସୁନ୍ଦର ମୂର୍ତ୍ତି ହେଲେ ଚାହିଦା ବଢିବ। ଏଣୁ ଆର୍ଥିକ ସହାୟତା ମିଳିଲେ ମେଶିନ ଆଣି କାମ କରିପାରନ୍ତେ ବୋଲି ସେ କୁହନ୍ତି।ସେହିପରି ମୂର୍ତ୍ତି ସାଇତି ରଖିବା ପାଇଁ ଘର ଦରକାର। ବିକ୍ରିବଟା ପାଇଁ ଦୋକାନ ଘର ମିଳିଲେ ଅଧିକ ଲାଭବାନ ହୋଇପାରନ୍ତେ। ଚଳିତବର୍ଷ ଉଚ୍ଚତା କଟକଣା ଯୋଗୁ କମ୍ ଉଚ୍ଚତା ମୂର୍ତ୍ତି ଗଢାଯାଉଥିବାରୁ ଦାମ ସାଢେ ୩ ହଜାର ଟଙ୍କା ରହିଛି। ଆଗରୁ ଏହା ୫/୬ ହଜାର ଟଙ୍କାରେ ବିକ୍ରି ହେଉଥିଲା। ଲକ୍ଷ୍ମୀପୂଜା ପାଇଁ ଆଗରୁ ୬୦ରୁ ଅଧିକ ମୂର୍ତ୍ତି ନିର୍ମାଣ କରୁଥିଲୁ। କିନ୍ତୁ ଏବେ ମାତ୍ର ୨୦ଟି ମୂର୍ତ୍ତି କରୁଛୁ।