ନୟାଗଡ଼ ଅଫିସ/ଦଶପଲ୍ଲା, ୨୦ା୨(ଡି.ଏନ୍.ଏ.): ନୟାଗଡ ଜିଲା ଦଶପଲ୍ଲା ଥାନା ଶିମିଳିସାହି ଗାଁରେ ଜଣେ ଭିନ୍ନକ୍ଷମ ଯୁବକଙ୍କୁ ତାଙ୍କ ସାବତ ମା’ ସମ୍ପତ୍ତି ଲୋଭରେ ମାଡ଼ ମାରିବା ସହ ବିଷ ପିଆଇ ହତ୍ୟା କରିଥିବା ଅଭିଯୋଗ ହୋଇଛି। ଏପରି କି ବିଷ ଖାଇଛି ଦର୍ଶାଇ ଘଟଣାକୁ ଚାପି ଦେବାକୁ ଉଦ୍ୟମ କରାଯାଇଛି ବୋଲି ମୃତ ଯୁବକଙ୍କ ମାଈଁ କହିଥିଲେ ମଧ୍ୟ ଏନେଇ ଥାନାରେ କୌଣସି ଅଭିଯୋଗ ହୋଇନାହିଁ।
ମୃତ ଯୁବକଙ୍କୁ ହତ୍ୟା କରାଯାଇଥିବା ତାଙ୍କ ମାମୁ, ମାଈଁ, ପିଇସା, ସମ୍ପର୍କୀୟ ଭାଇ ଏବଂ କେତେଜଣ ଗାଁ ଲୋକ କହିଛନ୍ତି। ସେମାନଙ୍କ ସୂଚନା ଅନୁଯାୟୀ, ମୃତ ଭିନ୍ନକ୍ଷମ ଯୁବକ ଓ ତାଙ୍କ ବଡ଼ ଭାଇଙ୍କୁ ଯଥାକ୍ରମେ ୮ ଓ ୧୦ ବର୍ଷ ହୋଇଥିବାବେଳେ ସେମାନଙ୍କ ମା’ଙ୍କ ପରଲୋକ ଘଟିଥିଲା। ଏହାପରେ ବାପା ଦ୍ୱିତୀୟ ବିବାହ କରିଥିଲେ। ଏହାପରେ ସାବତ ମା’ ଦୁଇ ପୁଅଙ୍କୁ ନିର୍ଯାତନା ଦେବା ଆରମ୍ଭ କରିଥିଲେ। ଏପରି କି ସେମାନଙ୍କୁ ଖାଇବାକୁ ଦେଇ ନ ଥିଲେ। ବାପା ସବୁ ଜାଣି ଚୁପଚାପ ରହୁଥିଲେ। କିଛି ଦିନ ଏପରି ଚାଲିବା ପରେ ବଡ଼ ପୁଅ ଆତ୍ମହତ୍ୟା କରିଥିଲେ। ଏନେଇ ଗାଁରେ ଚାରିଆଡ଼େ ନିନ୍ଦା କରାଯିବା ସତ୍ତ୍ୱେ ସାବତ ମା’ ଓ ବାପା ମଧ୍ୟ ବଦଳି ନ ଥିଲେ। ନାନା ନିର୍ଯାତନା ଭିତରେ ଭିନ୍ନକ୍ଷମ ପୁଅ ବଡ଼ ହୋଇଥିଲେ। ସେ ଭିନ୍ନକ୍ଷମ ସତ୍ତ୍ୱେ ଅଟୋ ଚଳାଇ ରୋଜଗାର କରୁଥିଲେ। ବିବାହ କରିବାକୁ ସେ ମାମୁଁ ମାଈଁ, ବାପା ଓ ସାବତ ମା’ଙ୍କୁ କହିଥିଲେ। ମାମୁ, ମାଈଁ ବିବାହକୁ ହଁ କରିଥିଲେ। କିନ୍ତୁ ସାବତ ମା’ ଏହାକୁ ବିରୋଧ କରି ୫ ବର୍ଷ ପରେ ବିବାହ କରିବାକୁ କହିଥିଲେ। ସାବତ ମା’ ତାଙ୍କର ଦୁଇ ସନ୍ତାନ ସମ୍ପତ୍ତି ପାଇବାରେ ଅସୁବିଧା ହେବ ଜାଣି ବିବାହ ଭାଙ୍ଗିବାକୁ ଉଦ୍ୟମ କରିଥିଲେ। ଏହାପରେ ଭିନ୍ନକ୍ଷମ ଯୁବକ ତାଙ୍କ ମାମୁ ଘରକୁ ଚାଲି ଯାଇଥିଲେ। ମାମୁ ମାଈଁଙ୍କ ସହ ଝିଅ ଦେଖା ଶେଷ ହୋଇ ବିବାହ ସ୍ଥିର ହୋଇଥିଲା। ହେଲେ ବିବାହ ହେଉଥିବା ଖବର ଶୁଣି ଭିନ୍ନକ୍ଷମ ପୁଅକୁ ଚତୁରତାର ସହ ସାବତ ମା ଓ ବାପା ଘରକୁ ଡକାଇ ନେଇଥିଲେ। ବିବାହ ବାବଦ ଖର୍ଚ୍ଚ ପାଇଁ ଭିନ୍ନକ୍ଷମ ଯୁବକଙ୍କ ମା’ଙ୍କ ନାଁରେ ଥିବା ୩ ଏକର ଜମିରୁ ୧ ଏକର ଜମି ରେଜେଷ୍ଟ୍ରି କରିବାକୁ କହିଥିଲେ। ଏହାକୁ ନେଇ ସେମାନଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଏହାପରେ ଭିନ୍ନକ୍ଷମ ଯୁବକଙ୍କୁ ଘରେ ୪ଦିନ ଅଟକି ରଖାଯାଇଥିଲା। ହେଲେ ଗତ ୧୫ ତାରିଖରେ ତାଙ୍କୁ ମାରପିଟ୍ କରାଯାଇ ବିଷ ପିଆଇ ଦେବାରୁ ସେ ଗୁରୁତର ହୋଇପଡ଼ିଥିଲେ। ତାଙ୍କୁ ପ୍ରଥମେ ଦଶପଲ୍ଲା ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ହେଲେ ଡାକ୍ତରଖାନା ନେବାବେଳେ ଭିନ୍ନକ୍ଷମ ଯୁବକ ବିଷ ପିଇଥିବା କୁହାଯାଇଥିଲା। ସ୍ବାସ୍ଥ୍ୟାବସ୍ଥାରେ ଉନ୍ନତି ନ ଆସିବାରୁ ତାଙ୍କୁ ନୟାଗଡ ଜିଲା ମୁଖ୍ୟ ଚିକିତ୍ସାଳୟ ଓ ଭୁବନେଶ୍ୱର କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ପରେ କଟକ ବଡ଼ ମେଡିକାଲ ଓ ଭୁବନେଶ୍ୱରର ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ଶନିବାର ଭୁବନେଶ୍ୱରରେ ଭିନ୍ନକ୍ଷମ ଯୁବକଙ୍କ ମୃତ୍ୟୁ ହୋଇଥିଲା। ସାବତ ମା’ ଓ ବାପା ପୁଅର ମୃତଦେହକୁ ଧରି ଶନିବାର ବିଳମ୍ବିତ ରାତିରେ ଗାଁ ରେ ପହଞ୍ଚିଥିଲେ। ମୃତଦେହକୁ ସତ୍କାର କରିବାକୁ ଗାଁ ଲୋକ ଓ ସାହି ଭାଇଙ୍କୁ କହିଥିଲେ। ହେଲେ ହତ୍ୟାକାଣ୍ଡ କହି କେହି ମୃତଦେହକୁ ଦାହ କରି ନ ଥିଲେ। ଏହାପରେ ତରବର ହୋଇ ବାପା ଓ ସାବତ ମା’ଙ୍କର ଦୁଇ ପୁଅ ମିଶି ମୃତଦେହ ଦାହ କରିଥିଲେ। ମୃତଦେହ ଦାହ କଥା ଜଣାପଡ଼ିବା ପରେ ଗାଁରେ ଉତ୍ତେଜନା ପ୍ରକାଶ ପାଇଥିଲା। ଏନେଇ ସାବତ ମା’ କୁହନ୍ତି, ମୋ ପୁଅକୁ ମୁଁ ହତ୍ୟା କରିନି। ମୋତେ ବଦନାମ କରିବାକୁ ଷଡଯନ୍ତ୍ର କରାଯାଇ ଏଭଳି ଅଭିଯୋଗ ଅଣାଯାଇଛି। ଦଶପଲ୍ଲା ଥାନା ଅଧିକାରୀ ବସନ୍ତ ସାହୁ କୁହନ୍ତି, ହତ୍ୟା କି କ’ଣ ଜଣା ପଡୁନି। ଏନେଇ ଅଭିଯୋଗ ନାହିଁ। ମୃତଦେହ ସତ୍କାର ହୋଇ ସାରିଲାଣି। ଅଭିଯୋଗ ନ ଥିବାରୁ ପଦକ୍ଷେପ ନେଇ ହେଉ ନାହିଁ ବୋଲିି ସେ କହିଛନ୍ତି।