ନୂଆଦିଲ୍ଲୀ: ଗତ ୬ଦିନ ହେବ ଦେଶର ପୁଞ୍ଜିବଜାରରେ ହ୍ରାସ ଧାରା ଲାଗି ରହିଥିଲା। ଏହି ସମୟ ମଧ୍ୟରେ ନିବେଶକମାନେ ପ୍ରାୟ ୧୧ ଲକ୍ଷ କୋଟି ଟଙ୍କାରୁ ଊର୍ଦ୍ଧ୍ୱ କ୍ଷତି ସହିଛନ୍ତି। ଶୁକ୍ରବାର ଶେୟାର ବଜାର ଟ୍ରାକ୍କୁ ଫେରିଥିବା ଜଣାପଡିଛି। ଏହି ସମୟରେ ନିବେଶକଙ୍କୁ ୩.୫୨ ଲକ୍ଷ କୋଟି ଟଙ୍କା ଲାଭ ହୋଇଛି। ଶୁକ୍ରବାର ସେନ୍ସେକ୍ସ ୮୩୫.୦୬ ପଏଣ୍ଟ ବା ୨.୨୮% ଉଚ୍ଚରେ ରହି ୩୭,୨୮୮ ପଏଣ୍ଟରେ କାରବାର ବନ୍ଦ ହୋଇଛି। ଏହା ପୂର୍ବରୁ ଗୁରୁବାର ସେନ୍ସେକ୍ସ ୧,୧୧୪ ପଏଣ୍ଟ ଖସି ୩୬,୫୫୩ ପଏଣ୍ଟରେ ବନ୍ଦ ହୋଇଥିଲା। ସାରା ଦେଶରେ ଶେୟାର କାରବାର ଉନ୍ନତ ହେବାରୁ ବଜାରରେ ଏଭଳି ସ୍ଥିତି ଦେଖିବାକୁ ମିଳିଥିବା ଚଏସ୍ ବ୍ରୋକିଂ କମ୍ପାନୀର କାର୍ଯ୍ୟନିର୍ବାହୀ ନିର୍ଦ୍ଦେଶକ ସୁମିତ ବାଗାଡିଆ ସୂଚନା ଦେଇଛନ୍ତି।
ଭାରତୀ ଏୟାରଟେଲ, ବଜାଜ ଫିନସର୍ଭ, ଏଚ୍ସିଏଲ୍, ଇଣ୍ଡସଇଣ୍ଡ ବ୍ୟାଙ୍କ, ଟିସିଏସ୍, ଏଲ୍ଆଣ୍ଡଟି, ଆଇସିଆଇସିଆଇ ବ୍ୟାଙ୍କ, ଓଏନ୍ଜିସି ଭଳି କମ୍ପାନୀର ଶେୟାର କାରବାର ଉନ୍ନତ ରହିଛି। ବମ୍ବେ ଷ୍ଟକ୍ ଏକ୍ସଚେଞ୍ଜର ମିଡ୍ କ୍ୟାପ ଏବଂ ସ୍ମଲ କ୍ୟାପ ସୂଚୀ ଏହି ସମୟରେ ୨.୯୦ ପଏଣ୍ଟ ଉଚ୍ଚରେ ରହିଛି। କରୋନା ମହାମାରୀ ଏବଂ ବିଶ୍ୱ ବଜାର ଚାପ ଭାରତ ଶେୟାର ବଜାର ଉପରେ ପଡିଥିଲା। ଫଳରେ ସେନ୍ସେକ୍ସରେ ଗତ ୬ ଦିନ ହେବ ଲଗାତର ହ୍ରାସ ଧାରା ଲାଗି ରହିଥିଲା। ଏହାର ପ୍ରଭାବ ଶୁକ୍ରବାର ବଜାର ଉପରେ ପ୍ରାୟ ନାହିଁ। ଫଳରେ କାରବାର ଟ୍ରାକ୍କୁ ଫେରିଥିବା ବିଶେଷଜ୍ଞ କହିଛନ୍ତି।