କେନ୍ଦୁଝର,୧୯ା୧(ସ୍ବ.ପ୍ର.): କେନ୍ଦୁଝର ସଦର ବ୍ଲକ ଅଧୀନ କଣ୍ଡରାପଶି ଗ୍ରାମରେ ରହୁଛନ୍ତି ଦିବ୍ୟାଙ୍ଗ ସରସ୍ବତୀ ମୁଣ୍ଡା। ପିଲା ଦିନରୁ ସେ ପୋଲିଓରେ ଆକ୍ରାନ୍ତ । କାମ ଧନ୍ଦା କରିବାକୁ ଅକ୍ଷମ। ବାଡ଼ି ଧରି ବହୁ କଷ୍ଟରେ ଚଲାବୁଲା କରନ୍ତି। ୪ ବର୍ଷ ତଳେ ସେହି ଗ୍ରାମର ମୁନା ମୁଣ୍ଡାଙ୍କୁ ବିବାହ କରିଥିଲେ। ମୂଲ ମଜୁରୀରେ ସେମାନଙ୍କ ସଂସାର ଚଳୁଥିଲା। ପରେ ତାଙ୍କ ଅଭାବୀ ସଂସାରରେ ପାଦ ଦେଇଥିଲା ଏକ ଶିଶୁ କନ୍ୟା। ସରସ୍ବତୀ ମା’ ହେବାର ୫ ମାସ ପରେ ମୁନା ରୋଗରେ ପଡ଼ିଲେ। ଅର୍ଥାଭାବରୁ ତାଙ୍କ ଚିକିତ୍ସା ହୋଇପାରିଲା ନାହିଁ । ଶେଷରେ ସେ ଆଖି ବୁଜିଲେ। ସ୍ବାମୀଙ୍କ ମୃତ୍ୟୁ ପରେ ୫ ମାସର ଶିଶୁକନ୍ୟାକୁ ଧରି ପୁଣି ଥରେ ଅସହାୟ ହୋଇ ପଡ଼ିଲେ ସରସ୍ବତୀ । ଘାରିଥିଲା ତାଙ୍କୁ ପେଟ ପୋଷିବା ଚିନ୍ତା। ଅନ୍ୟର ସହାୟତା ଓ ସହାନୁଭୂତି ପାଇବାକୁ ଝିଅକୁୁ ସାଙ୍ଗରେ ଧରି ସେ ବାର ଦୁଆର ବୁଲି ଚାଲିଛନ୍ତି।
ଘର ଭାଙ୍ଗିଯାଇଥିବାରୁ ବେସାହାରା ହୋଇ ସରସ୍ବତୀ ଏବେ ତାଙ୍କ ଭଉଣୀ ଘରେ ଆଶ୍ରୟ ନେଇଛନ୍ତି। ଘର ଖଣ୍ଡେ ପାଇଁ ବ୍ଲକ କାର୍ଯ୍ୟାଳୟ, ଜିଲାପାଳଙ୍କ ଅଫିସ ଧାଇଁ ଧାଇଁ ନୟାନ୍ତ ହେଲେଣି। ୪ ଡିସିମିଲ ଘର ଡିହ ମିଳିବ ବୋଲି କୁହାଯାଇଥିଲେ ହେଁ ତାହା ତାଙ୍କୁ ମିଳି ନ ଥିବା ସରସ୍ବତୀ କହିଛନ୍ତି। ବିଧବା ଭତ୍ତା ମଧ୍ୟ ମିଳିନାହିଁ। ମହିଳା ଓ କନ୍ୟା ସନ୍ତାନଙ୍କ ପାଇଁ ସରକାର ବହୁ ଯୋଜନା କାର୍ଯ୍ୟକାରୀ କରିଥିବା ବେଳେ ସରସ୍ବତୀଙ୍କ ପାଇଁ ସେସବୁ ପ୍ରହସନ ପାଲଟିଛି। ଦିବ୍ୟାଙ୍ଗ ଭତ୍ତା ଟଙ୍କାରେ ଚଳିବା କଷ୍ଟକର ହୋଇଥିବା ବେଳେ ଏଥିପାଇଁ ମାଗି ଯାଚି ଚଳୁଛନ୍ତି ବୋଲି ସେ କୁହନ୍ତି। ନା ମିଳିଲା ଆଶା ବାଡି ନା ମିଳିଲା ଟ୍ରାଇସାଇକେଲ। ଯେଉଁ ବୟସରେ କୁନି ଝିଅ ଖେଳି ବୁଲି ଖୁସି ମନାଇବା କଥା ସେହି ବୟସରେ ମା’ ସହ କୁନି କୁନି ପାଦରେ ପେଟପାଟଣା ପାଇଁ ଘୁରି ବୁଲୁଛି। କେନ୍ଦୁଝର ଜିଲାପାଳ ଏଥିପ୍ରତି ପଦକ୍ଷେପ ନେବାକୁ ସ୍ଥାନୀୟ ଲୋକେ ଦାବି କରିଛନ୍ତି।