ନାଉଗାଁ,୯।୪(ସ୍ବ.ପ୍ର.): ନାଉଗାଁ ବ୍ଲକରେ ପ୍ରବାହିତ ଦେବୀ ନଦୀର ଦୁର୍ବଳ ସ୍ଥାନକୁ ପ୍ରଶସାନ ପକ୍ଷରୁ ଚିହ୍ନଟ କରାଯାଇ ପଥର ପ୍ୟାକିଂ କରାଯାଉଛି। ଏଥିସହ ନଦୀବନ୍ଧ ପ୍ରଶସ୍ତୀକରଣ କାର୍ଯ୍ୟ ଚାଲିଛି। ଜଳ ସମ୍ପଦ ବିଭାଗ ଅଧୀନରେ ଚାଲିଥିବା ଏହି କାର୍ଯ୍ୟ ନିମ୍ନମାନର ହୋଇଥିବା ନେଇ ସାଧାରଣରେ ଅଭିଯୋଗ ହୋଇଛି।
ଏହି ବ୍ଲକ ଅଧୀନ ଶିଖର ପଞ୍ଚାୟତର ବିଲିପଡ଼ାଠାରୁ ପୁରୀ ଜିଲା କାକଟପୁର ବ୍ଲକ ଭଣ୍ଡିସାହିର ମୁତୁଣିଆ ପର୍ଯ୍ୟନ୍ତ ରହିଥିବା ନଦୀବନ୍ଧ ଅଲଣାହାଟ ଜଳ ସମ୍ପଦ ବିଭାଗ ଅଧୀନରେ ରହିଛି। ସେହିପରି ବିଲିପଡ଼ାଠାରୁ ଗଜରାଜପୁର ପଞ୍ଚାୟତର ତୁମ୍ବେଶ୍ୱର ପର୍ଯ୍ୟନ୍ତ ବନ୍ଧ ଆଳିପିଙ୍ଗଳ ଜଳ ସମ୍ପଦ ବିଭାଗ ଅଧୀନରେ ରହିଛି। ତୁମ୍ବେଶ୍ୱରଠାରୁ ମୁତୁଣିଆ ପର୍ଯ୍ୟନ୍ତ ଥିବା ନଦୀବନ୍ଧର ୧୫ରୁ ଊର୍ଦ୍ଧ୍ୱ ସ୍ଥାନରେ ପଥର ପ୍ୟାକିଂ କରାଯାଇଛି। ତେବେ ବନ୍ଧରେ ଯେଉଁ ସାଇଜର ପଥର ପକାଯିବା କଥା ତା’ଠାରୁ ଛୋଟ ପଥର ପକାଯାଇଛି। ସେହିପରି ମାଟି ଖୋଳା ନ ଯାଇ ପଥରକୁ ବନ୍ଧ ଉପରେ ରଖାଯାଇଛି। ଫଳରେ ପ୍ରବଳ ବର୍ଷା ହେଲେ ପଥର ଖସି ନଦୀ ମଧ୍ୟରେ ପଡ଼ିଯିବାର ଆଶଙ୍କା ରହିଛି। ସେହିପରି ପ୍ରଶସ୍ତୀକରଣ କାର୍ଯ୍ୟ ନିମନ୍ତେ ଅନେକ ସ୍ଥାନରେ ବନ୍ଧ ନିକଟରୁ ମାଟି ଖୋଳାଯାଇ ତାଉପରେ ପକାଯାଇଛି। କେତେକ ସ୍ଥାନରେ କେବଳ ବନ୍ଧ ଦୁଇ ପାର୍ଶ୍ୱ କୁ ସଫାକରି ନାମକୁ ମାତ୍ର ପ୍ରଶସ୍ତୀକରଣ କାର୍ଯ୍ୟ କରାଯାଉଛି। ଲକ୍ଷାଧିକ ଟଙ୍କାର ଏହି କାର୍ଯ୍ୟ ଚାଲୁ ରହିଥିବା ବେଳେ ଗୋଟିଏ କିମ୍ବା ୨ଟି ସ୍ଥାନକୁ ଛାଡ଼ିିଦେଲେ ଅନ୍ୟ କେଉଁଠି ସୂଚନାଫଳକ ଦେଖିବାକୁ ମିଳିନାହିଁ। ଯାହା ଫଳରେ କାର୍ଯ୍ୟର ସବିଶେଷ ବିବରଣୀ ବିଷୟରେ ଜନସାଧାରଣ ଅବଗତ ହୋଇପାରୁନାହାନ୍ତି। କାର୍ଯ୍ୟ ସମୟରେ ବିଭାଗୀୟ ଯନ୍ତ୍ରୀ ଅନୁପସ୍ଥିତ ରହୁଥିବା ବେଳେ ଠିକାଦାର ମନଇଚ୍ଛା କାର୍ଯ୍ୟ କରୁଛି। ବନ୍ୟାରୁ ନଦୀବନ୍ଧକୁ ସୁରକ୍ଷା ଦେବା ପାଇଁ ଏସବୁ କାର୍ଯ୍ୟ କରାଯାଉଥିବା ବେଳେ ନିମ୍ନମାନର କାର୍ଯ୍ୟ ଯୋଗୁ ଏହାର ସ୍ଥାୟିତ୍ୱ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ଏ ସମ୍ପର୍କରେ ବିଭାଗୀୟ ନିର୍ବାହୀ ଯନ୍ତ୍ରୀ ଫକୀର ଚରଣ ସେଠ କୁହନ୍ତି, ନଦୀ ବନ୍ଧ କାର୍ଯ୍ୟ ବିଭାଗୀୟ ଯନ୍ତ୍ରୀଙ୍କ ଦ୍ୱାରା ତଦାରଖ କରାଯାଉଛି। ଯେଉଁଠାରେ ସୂଚନା ଫଳକ ଲାଗିନାହିଁ,ସେଠାରେ ଖୁବ୍ଶୀଘ୍ର ଏହାକୁ ଲଗାଯିବ।