ରାୟଗଡ଼ା,୮।୪(ଆଶିଷ ରଞ୍ଜନ ପଣ୍ଡା): ଗ୍ରୀଷ୍ମଋତୁ ଆରମ୍ଭରୁ ରାୟଗଡ଼ା ଜିଲାରେ ପାନୀୟ ଜଳ ସଙ୍କଟ ଉତ୍କଟ ହେବାରେ ଲାଗିଛି। ସ୍ବାଧୀନତାର ୭୫ ବର୍ଷ ପରେ ଆଜି ବି ରାୟଗଡ଼ା ଜିଲାର ଅନେକ ଗ୍ରାମରେ ଲୋକେ ବିଶୁଦ୍ଧ ପାନୀୟ ଜଳ ପାଇପାରୁନାହାନ୍ତି। ଏପରିକି ଜାତୀୟ ରାଜପଥ କଡ଼ରେ ରହିଥିବା ପଞ୍ଚାୟତ ମହକୁମାର ଗ୍ରାମଗୁଡ଼ିକରେ ମଧ୍ୟ ପହଞ୍ଚତ୍ ପାରୁନି ପାନୀୟ ଜଳର ବ୍ୟବସ୍ଥା। ଫଳରେ ଗ୍ରାମବାସୀ ନିକଟରେ ଥିବା ଝରଣା ପାଣି ବ୍ୟବହାର କରିବାକୁ ବାଧ୍ୟ ହେଉଛନ୍ତି। ଦୂଷିତ ପାଣି ବ୍ୟବହାର କରି ବିଭିନ୍ନ ରୋଗରେ ପୀଡ଼ିତ ହେଉଥିବା ଗ୍ରାମର ଲୋକେ ଅଭିଯୋଗ କରିଛନ୍ତି। ପାନୀୟ ଜଳ ସମସ୍ୟା ନେଇ ବହୁବାର ପଞ୍ଚାୟତସ୍ତରରୁ ଆରମ୍ଭ କରି ପ୍ରଶାସନିକ ଅଧିକାରୀ ଓ ଲୋକ ପ୍ରତିନିଧିଙ୍କୁ ଜଣାଇଥିଲେ ମଧ୍ୟ କିଛି ସୁଫଳ ମିଳୁ ନ ଥିବା ଗ୍ରାମବାସୀ କହିଛନ୍ତି। ଏଭଳିକି ବିଦ୍ୟୁତ୍ ଯୋଗାଣ ବ୍ୟବସ୍ଥା ନେଇ ଗତ ଦିନରେ ଉକ୍ତ ପଞ୍ଚାୟତର ଜଣେ ହିତାଧିକାରୀଙ୍କ ସହିତ ଭର୍ଚୁଆଲ ମାଧ୍ୟମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଲୋଚନା କରିଥିଲେ। ତେବେ ପ୍ରଶାସନିକ ଅଧିକାରୀଙ୍କ ଅବହେଳା ଯୋଗୁ ଅଞ୍ଚଳର ବିକାଶ କେବଳ କାଗଜକଲମରେ ସୀମିତ ରହିଯାଉଥିବା ଅଭିଯୋଗ ହୋଇଛି। ଏଭଳି ଦୃଶ୍ୟ ଦେଖିବାକୁ ମିଳିଛି ରାୟଗଡ଼ା ଜିଲା ସଦର ବ୍ଲକ ଗୁମ୍ମା ପଞ୍ଚାୟତ ଅନ୍ତର୍ଗତ କଲୋନୀ ସାହିରେ। ରାୟଗଡ଼ା ଦେଇ କୋରାପୁଟ ଯାଇଥିବା ୩୨୬ନଂ ଜାତୀୟ ରାଜପଥ କଡ଼ର ଏହି ପଞ୍ଚାୟତରେ ପହଞ୍ଚତ୍ପାରୁନି ବ୍ୟବସ୍ଥିତ ପାନୀୟ ଜଳ ଯୋଗାଣ। ଯଦି ଗ୍ରାମରେ ପାନୀୟ ଜଳ ସମସ୍ୟାର ସ୍ଥାୟୀ ସମାଧାନ ନ ହୁଏ ଆଗାମୀ ନିର୍ବାଚନରେ ଭୋଟ ବର୍ଜନ କରିବେ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି।
ଗୁମ୍ମା ପଞ୍ଚାୟତର କଲୋନୀ ସାହିରେ ପ୍ରାୟ ୩୦ ପରିବାର ବସବାସ କରନ୍ତି। ଗାଁରେ ଜନସଂଖ୍ୟା ୧୫୦ରୁ ଊର୍ଦ୍ଧ୍ୱ ହେବ। ପାନୀୟ ଜଳ ନିମନ୍ତେ ଗାଁରେ ରହିଛି ମାତ୍ର ଗୋଟିଏ ନଳକୂପ। ଉକ୍ତ ନଳକୂପରୁ ଗୋଳିଆ ଦୂଷିତ ପାଣି ବାହାରୁଥିବାରୁ ଲୋକେ ଏହାକୁ ବ୍ୟବହାର କରିପାରୁନାହାନ୍ତି। ଅନ୍ୟପଟେ ବର୍ତ୍ତମାନ ଗ୍ରୀଷ୍ମ ପ୍ରବାହରେ ଉକ୍ତ ନଳକୂପରୁ ପାଣି ମଧ୍ୟ ଠିକ୍ରେ ବାହାରୁ ନାହିଁ। ଫଳରେ ଗ୍ରାମବାସୀ ନିକଟରେ ବୋହି ଯାଉଥିବା ଝରଣା ପାଣି ଉପରେ ନିର୍ଭର କରୁିବାକୁ ବାଧ୍ୟ ହେଉଛନ୍ତି। ଦୂଷିତ ଜଳ ଓ ଝରଣା ପାଣି ବ୍ୟବହାର କରି ବିଭିନ୍ନ ରୋଗରେ ପୀଡ଼ିତ ହେଉଥିବା ଲୋକେ କହୁଛନ୍ତି। ଦୂଷିତ ପାଣି ବ୍ୟବହାର ଯୋଗୁଁ ଗାଁରେ ସିକଲିନ୍ ରୋଗାକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି। ଏ ନେଇ ରାୟଗଡ଼ା ବିଡିଓ ଅମୂଲ୍ୟ କୁମାର ସାହୁଙ୍କୁ ପଚାରିବାରୁ କଲୋନୀ ସାହିରେ ୨ଟି ନଳକୂପ ରହିଛି ଏବଂ ଖବର ମିଳିବା ପରେ ସେଗୁଡ଼ିକର ମରାମତି କରାଯାଇଛି ବୋଲି କହିଛନ୍ତି। ଯଦି ଆବଶ୍ୟକ ପଡ଼େ ନୂତନ ନଳକୂପ ଖନନ କରାଯିବ। ତେବେ ଗ୍ରୀଷ୍ମ ପ୍ରବାହକୁ ଦେଖି ବ୍ଲକସ୍ତରରେ ବିଭିନ୍ନ ଗ୍ରାମରେ ନଳକୂପ ମରାମତି ସହିତ ଜଳଛତ୍ର ମଧ୍ୟ ଖୋଲାଯାଇଥିବା ବିଡିଓ ସାହୁ କହିଛନ୍ତି କହିଛନ୍ତି।