ଟେନ୍ସା,୨୨।୮(ଡି.ଏନ୍.ଏ.): ସୁନ୍ଦରଗଡ଼ ଜିଲା କୋଇଡ଼ା ବ୍ଲକ ମାଲଦା ଗ୍ରାମପଞ୍ଚାୟତର ପାରମସାହି ଗ୍ରାମରୁ ବାହାରକୁ ପାଠପଢିବାକୁ ଯାଇଥିବା ଛାତ୍ରୀଛାତ୍ର ୧୦ଦିନ ହେବ ଘରକୁ ଫେରିପାରୁ ନାହାନ୍ତି। ଗ୍ରାମକୁ ଯିବା ଆସିବା କରିବାକୁ ହେଲେ ଏକ ନାଳ ପାରି ହେବାକୁ ପଡ଼ିଥାଏ। ବର୍ଷା ଯୋଗୁ ନାଳରେ ଅଧିକ ପାଣି ଆସିବା ସହ ପ୍ରଖର ସ୍ରୋତ ଯୋଗୁ ନାଳରେ ଯାଇ ଆସି ହେଉନାହିଁ। ନାଳ ପାରିହୋଇ କୋଇଡାକୁ ଆସିଥିବା ଲୋକେ ଓ ଛାତ୍ରୀଛାତ୍ର ଘରକୁ ଯାଇପାରୁ ନାହାନ୍ତି । ପାରମସାହିରେ ୧୫ ପରିବାରର ୧୦୦ରୁ ଅଧିକ ଲୋକ ବାସକରନ୍ତି। ବର୍ଷା ଆସିଲେ ଉକ୍ତ ଗ୍ରାମର ଲୋକଙ୍କ ଦୁଃଖ ବଢିଯାଏ। ନାଳରେ ହଠାତ୍ ବର୍ଷା ଜଳ ଆସିଯିବାରୁ କଲେଜ ଆସିଥିବା ଛାତ୍ରୀଛାତ୍ରଙ୍କ ସହ କାର୍ଯ୍ୟ କରିବାକୁ ଆସିଥିବା ଲୋକେ ଘରକୁ ଫେରି ନ ପାରି ଫସି ରହିଛନ୍ତି। ସେମାନେ ନିଜର ବନ୍ଧୁବାନ୍ଧବ, ସମ୍ପର୍କୀୟଙ୍କ ଘରେ ଆଶ୍ରୟ ନେଇଛନ୍ତି। ସେପଟେ ୧୦ଦିନ ହେବ ନାଳ ପାରିହୋଇ ଗାଁ ଲୋକେ ଆସିପାରୁ ନ ଥିବାରୁ ଏବେ ପନ୍ଦର ପରିବାରଙ୍କ ପାଖରେ ଖାଦ୍ୟ ସାମଗ୍ରୀ ମଧ୍ୟ ସାରିଗଲାଣି। ଫଳରେ ଭୋକଉପାସରେ ପନ୍ଦର ପରିବାର ଦିନ କାଟୁଛନ୍ତି। ବିପନ୍ନଙ୍କ ପାଖରେ ସ୍ଥାନୀୟ ପ୍ରଶାସନ ପହଞ୍ଚି ନ ଥିବାବେଳେ ଅଞ୍ଚଳର କେତେଜଣ ଯୁବକ ମାଲଦା ସରପଞ୍ଚଙ୍କ ସହାୟତାରେ ଶୁଖିଲା ଖାଦ୍ୟ ସାମଗ୍ରୀ ପହଞ୍ଚାଇବା ପାଇଁ ଚେଷ୍ଟା କରୁଥିଲେ। କିନ୍ତୁ ନାଳର ପ୍ରଖର ସ୍ରୋତରେ ବିପନ୍ନଙ୍କ ପାଖରେ ପହଞ୍ଚିବା ସମ୍ଭବ ହେଉନାହିଁ।