ପାଟଣା,୨୬ା୯(ସ୍ବ.ପ୍ର.): ପ୍ରଧାନ ଶିକ୍ଷୟିତ୍ରୀ ଶ୍ରେଣୀ ଗୃହରେ ତାଲା ପକାଇ ରଖି ଦେଉଛନ୍ତି। ପରିସ୍ରା କରିବାକୁ ବି ଛାଡୁ ନାହାନ୍ତି। କବାଟ ବାଡ଼େଇଲେ ମାଡ଼ ମାରୁଛନ୍ତି। ଏଭଳି ଅଭିଯୋଗ କରିଛନ୍ତି କେନ୍ଦୁଝର ଜିଲା ପାଟଣା ବ୍ଲକ୍ ଉପାନ୍ତ ଅଞ୍ଚଳ ଚିନାମାଳି ପଶି ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ଅଧ୍ୟୟନ କରୁଥିବା ୮ମ ଶ୍ରେଣୀର ୫ ଛାତ୍ରୀ। ଶୁକ୍ରବାର ଶିକ୍ଷୟିତ୍ରୀ ଜଣଙ୍କ ମାଡ଼ ମାରିଥିବା ବେଳେ ଶନିବାର ମାଡ଼ ଭୟରେ ଛାତ୍ରୀମାନେ ସ୍କୁଲ ଯିବାକୁ ଡରିିଥିଲେ। ଘଟଣା ସମ୍ପର୍କରେ ଅଭିଭାବକ ଜାଣିବା ପରେ ଶିକ୍ଷୟିତ୍ରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ସରକାର ସମସ୍ତ ବିଦ୍ୟାଳୟକୁ ଦଣ୍ଡମୁକ୍ତ ଅଞ୍ଚଳ ଭାବେ ଘୋଷଣା କରିଥିବା ବେଳେ ଶିକ୍ଷୟିତ୍ରୀଙ୍କ ଏଭଳି ଆଚରଣ ଶିକ୍ଷା ବିଭାଗକୁ ଅଡ଼ୁଆରେ ପକାଇଛି।
ଅଭିଯୋଗ ଅନୁଯାୟୀ, ଶୁକ୍ରବାର ଅପରାହ୍ନ ୨ଟା ସମୟରେ ଅଷ୍ଟମ ଶ୍ରେଣୀ ଛାତ୍ରୀଛାତ୍ରଙ୍କୁ ଗୋଟିଏ ପ୍ରକୋଷ୍ଠରେ ଭର୍ତ୍ତିକରି ପ୍ରଧାନ ଶିକ୍ଷୟିତ୍ରୀ ନିରୁପମା ସାହୁ ବାହାର ପାର୍ଶ୍ୱରୁ କବାଟର ଶିକୁଳି ଦେଇ ଚାଲିଯାଇଥିଲେ। ପିଲାମାନଙ୍କୁ ପରିସ୍ରା ଲାଗିବାରୁ ୪ଟା ସମୟରେ କେତେ ଜଣ କବାଟ ବାଡ଼େଇଥିଲେ। ଏତିକିରେ ଶିକ୍ଷୟିତ୍ରୀ ଉତ୍କ୍ଷିପ୍ତ ହୋଇ ଏକ ଅମରି ବାଡ଼ିରେ ଅଷ୍ଟମ ଶ୍ରେଣୀର ୫ ଛାତ୍ରୀଙ୍କୁ ନିର୍ଧୂମ ପିଟିବା ସହ ଜାତିଆଣ ଅକ୍ଷେପ କରିଥିଲେ। ମାଡ଼ରେ ପାଲାଣ ଘାଟି ପଞ୍ଚାୟତ କୁମୁଳାବାହାଳ ଗ୍ରାମର ଲୁସି ମହାନ୍ତ, ଲିସା ମହାନ୍ତ, କୁମୁଳାବାହାଳି ଖଇରନ୍ଧା ସାହିର ପୂଜା ମହାନ୍ତ, ପଲାଣଘାଟି ପଞ୍ଚାୟତ ଚିନାମାଳି ପଶି ତଣ୍ଡିଆ ସାହିର ତ୍ରିଶକ୍ତି ନାଏକ ଓ ନୂଆପଡ଼ାର ମିତାଲି ନାଏକ ଆହତ ହୋଇଥିଲେ। ଲୁସି ମହାନ୍ତଙ୍କ ଡାହାଣ ହାତ ଫୁଲି ଯାଇଥିବା ବେଳେ ଲିସା ଓ ତ୍ରିଶକ୍ତିଙ୍କ ପିଠିରେ ଦାଗ ପଡ଼ିଯାଇଥିବା ଦେଖିବାକୁ ମିଳିଛି। ଶିକ୍ଷୟିତ୍ରୀଙ୍କ ମାଡ଼ ଭୟରେ ଛାତ୍ରୀମାନେ ଶନିବାର ସ୍କୁଲ୍ ଯିବାକୁ ମନା କରିଥିଲେ ବୋଲି ଅଭିଭାବକ ଫୁଲମଣି ମହାନ୍ତ ଓ ଫୁଲମଣି ନାଏକ କହିଛନ୍ତି। ଘଟଣା ସମ୍ପର୍କରେ ବୁଝିବାକୁ ଅଭିଭାବକ ସ୍କୁଲ୍ ଯାଇଥିବା ବେଳେ ଶିକ୍ଷୟିତ୍ରୀ ଶନିବାର ବିଦ୍ୟାଳୟ ଆସି ନ ଥିବା ଜଣାପଡ଼ିଛି। ଅନ୍ୟପକ୍ଷେ ଶିକ୍ଷୟିତ୍ରୀଙ୍କୁ ସମର୍ଥନ ଯୋଗାଇ ଘଟଣାଟିକୁ ଚପାଇ ଦେବାକୁ ଉଦ୍ୟମ ହେଉଛି। ଜିଲା ଶିକ୍ଷାଧିକାରୀ ପୂଣ୍ଣର୍ର୍ଚନ୍ଦ୍ର ସେଠୀ ଓ ବିଇଓ ପୂର୍ଣ୍ଣଚନ୍ଦ୍ର ଅମାନ୍ତ ଘଟଣାର ନିରପେକ୍ଷ ତଦନ୍ତ କରି ସମ୍ପୃକ୍ତ ଶିକ୍ଷୟିତ୍ରୀଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଅଭିଭାବକ ଦାବି କରିଛନ୍ତି।
ଏ ନେଇ ବ୍ଲକ୍ ଗୋଷ୍ଠୀ ଶିକ୍ଷା ଅଧିକାରୀ ଅମାନ୍ତ କହିଛନ୍ତି ଯେ, ଅଭିଯୋଗ ଆସିଲେ ତଦନ୍ତ କରି ବିଚାର କରାଯିବ। ଏ ନେଇ ସମ୍ପୃକ୍ତ ଶିକ୍ଷୟିତ୍ରୀ କୁହନ୍ତି, ପିଲାଙ୍କୁ ଚାବି ପକାଇବା ଓ ମାଡ଼ ମାରିବା କଥା ମିଛ। ବଡ଼ବଡ଼ ପିଲା ସେମାନେ, ଭିତର ପଟୁ ନିଜେ କବାଟ ଦେଇଥିଲେ। ମୋର ୨୬ ବର୍ଷର ଅଭିଜ୍ଞତା, ମୁଁ ମଣିଷ ନା ପଶୁ ଯେ ଏଭଳି ପିଟିବି। ପିଲାମାନେ କ’ଣ କହିଛନ୍ତି ମୁଁ ଜାଣିନାହିଁ। ଶନିବାର ଜ୍ୱର ହୋଇଥିବାରୁ ମୁଁ ଛୁଟିରେ ଥିଲି। ଆସନ୍ତାକାଲି ସରପଞ୍ଚଙ୍କ ଉପସ୍ଥିତିରେ ବିଦ୍ୟାଳୟରେ ମିଟିଂ ହେବାର ଅଛି ସେଠି ସବୁ କଥା ଆଲୋଚନା ହେବ ବୋଲି ପ୍ରଧାନଶିକ୍ଷୟିତ୍ରୀ ସାହୁ କହିଛନ୍ତି।