ହିଞ୍ଜିଳିକାଟୁ,୨୫ା୧(ଡି.ଏନ୍.ଏ.): ଗଞ୍ଜାମ ଜିଲା ହିଞ୍ଜିଳିକାଟୁ ବ୍ଲକ ଗଣ୍ଡଳା ପଞ୍ଚାୟତର ପଳାସୀ ସରକାରୀ ପ୍ରାଥମିକ ବିଦ୍ୟାଳୟରେ ଜଣେ ୫ମ ଶ୍ରେଣୀ ଛାତ୍ରଙ୍କୁ ପାଇଖାନାରେ ୫ ଘଣ୍ଟା ବନ୍ଦ ହୋଇ ରହିଥିଲେ। ସ୍କୁଲ ଶିକ୍ଷୟତ୍ରୀ ଓ କର୍ମଚାରୀ କୌଣସି ଛାତ୍ରୀଛାତ୍ର ସ୍କୁଲ ଭିତରେ ଅଛନ୍ତି କି ନାହିଁ ଯାଞ୍ଚ ନ କରି ଘରକୁ ପଳାଇ ଯାଇଥିବା ଅଭିଯୋଗ ହୋଇଛି। ମଙ୍ଗଳବାର ସନ୍ଧ୍ୟାରେ ଉକ୍ତ ରାସ୍ତା ଦେଇ ଯାଉଥିବା କିଛି ବ୍ୟକ୍ତି ଛାତ୍ରଙ୍କ ପାଟି ଶୁଣି ତାଙ୍କୁ ବାହାରପଟୁ ବନ୍ଦ ପାଇଖାନାରୁ ଉଦ୍ଧାର କରିଥିବା ଜଣାପଡ଼ିଛି। ଅନ୍ୟପକ୍ଷରେ ଏହି ସମ୍ବେଦନଶୀଳ ଖବର ପରେ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି।
ପ୍ରକାଶ ଯେ,ପଳାସୀ ସରକାରୀ ପ୍ରାଥମିକ ବିଦ୍ୟାଳୟରେ ୫ମ ଶ୍ରେଣୀ ଛାତ୍ର ଓମ୍ ସେଠୀ ମଙ୍ଗଳବାର ମଧ୍ୟାହ୍ନରେ ପାଇଖାନାକୁ ଶୌଚ ଯାଇଥିଲେ । ତାଙ୍କ ସହ ଯାଇଥିବା ଅନ୍ୟ ଜଣେ ଛାତ୍ର ପାଇଖାନାର ବାହାର ପଟୁ କବାଟ କିଳି ଶ୍ରେଣୀକୁ ପଳାଇ ଯାଇଥିଲେ। ଏ ବିଷୟ ନେଇ ଅନ୍ୟମାନେ କିଛି ଜାଣି ପାରି ନ ଥିଲେ। ସ୍କୁଲରେ ପ୍ରଧାନଶିକ୍ଷୟିତ୍ରୀଙ୍କୁ ମିଶାଇ ୨ଜଣ ଶିକ୍ଷୟିତ୍ରୀ ଥିଲେ। ଅପରାହ୍ନ ୪ଟାରେ ସ୍କୁଲ ଛୁଟି ବେଳେ ଶ୍ରେଣୀରେ ଓମ୍ଙ୍କ ବହି ବସ୍ତାନୀ ଥିବା ସତ୍ତ୍ୱେ କେହି ଏଥି ପ୍ରତି ଗୁରୁତ୍ୱ ଦେଇ ନ ଥିଲେ। ସ୍କୁଲ ବନ୍ଦ କରି ଶିକ୍ଷୟିତ୍ରୀ ଚାଲି ଯାଇଥିଲେ। ସ୍କୁଲ ଛୁଟି ପରେ ଅନ୍ୟ ଛାତ୍ରୀଛାତ୍ର ଘରକୁ ଫେରିଥିବା ବେଳେ ଓମ୍ ସ୍କୁଲରୁ ଘରକୁ ନ ଫେରିବାରୁ ଘର ଲୋକ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ। ସନ୍ଧ୍ୟାରେ ଉକ୍ତ ରାସ୍ତା ଦେଇ ଯାଉଥିବା ଜଣେ ବ୍ୟକ୍ତି ଛାତ୍ରଙ୍କ ପାଟି ଶୁଣି ତାଙ୍କୁ ବାହାରପଟୁ ବନ୍ଦ ପାଇଖାନାରୁ ଉଦ୍ଧାର କରିଥିବା ଜଣାଡ଼ିଛି। ଖବର ପ୍ରକାଶ ପରେ ଘଟଣା ନେଇ ହିଞ୍ଜିଳିକାଟୁ ବିଇଓ ଏସ୍ ଗିରିଧର ସ୍କୁଲର ପ୍ରଧାନଶିକ୍ଷୟିତ୍ରୀ ସବିତା ଶତପଥୀଙ୍କୁ ରିପୋର୍ଟ ପ୍ରଦାନ କରିବାକୁ ନିର୍ଦ୍ଦେଶ କରିଛନ୍ତି। ଅନ୍ୟପକ୍ଷରେ ଏପରି ଘଟଣାକୁ ଉକ୍ତ ସ୍କୁଲର ପ୍ରଧାନ ଶିକ୍ଷୟିତ୍ରୀ ଓ ଅନ୍ୟମାନେ ମୌଖିକ ଭାବେ ଅସ୍ବୀକାର କରିଥିବା ବିଇଓ ଗିରିଧର କହିଛନ୍ତି। ତେବେ ଖବର ଲେଖା ସୁଦ୍ଧା ଘଟଣା ନେଇ ପ୍ରଧାନଶିକ୍ଷୟିତ୍ରୀ କୌଣସି ଲିଖିତ ରିପୋର୍ଟ ପ୍ରଦାନ କରି ନ ଥିବା ବିଇଓଙ୍କଠାରୁ ପ୍ରକାଶ।