ଖୁଣ୍ଟୁଣୀ,୨୪।୯( ସଚ୍ଚିଦାନନ୍ଦ ପଣ୍ଡା ): ଖୁଣ୍ଟୁଣୀ ଥାନା ଘଣ୍ଟିଖାଲସ୍ଥିତ ନୋଡାଲ ଉପ୍ରା ବିଦ୍ୟାଳୟର ସହକାରୀ ଶିକ୍ଷକ ସୁକାନ୍ତ କୁମାର ସାହୁଙ୍କ ବଦଳିକୁ ନେଇ ଶନିବାର ଅଭାବନୀୟ ପରିବେଶ ସୃଷ୍ଟି ହୋଇଥିଲା। ତାଙ୍କ ବଦଳିକୁ ସହଜରେ ଗ୍ରହଣ କରିପାରି ନ ଥିଲେ ଛାତ୍ରୀଛାତ୍ର। ପିୟ ସାର୍ଙ୍କୁ ଛାଡ଼ିବୁ ନାହିଁ ବୋଲି କହି ସୁକାନ୍ତଙ୍କ ଆଗରେ ବସି ବାଟ ଓଗାଳିଥିଲେ। ଏଥିସହ ମଧ୍ୟାହ୍ନ ଭୋଜନ ବର୍ଜନ କରିଥିଲେ। ଏହି ଖବର ପ୍ରଚାରିତ ହେବାମାତ୍ରେ ଅଭିଭାବକମାନେ ମଧ୍ୟ ପିଲାଙ୍କ ଦାବିକୁ ସମର୍ଥନ ଜଣାଇଥିଲେ।
ସୂଚନା ମୁତାବକ, ଶିକ୍ଷକ ସୁକାନ୍ତ ୨୦୦୮ରୁ ଦୀର୍ଘ ୧୫ ବର୍ଷ ହେବ ଘଣ୍ଟିଖାଲ ନୋଡାଲ ଉପ୍ରା ବିଦ୍ୟାଳୟରେ ଗଣିତ ଓ ବିଜ୍ଞାନରେ ଶିକ୍ଷକତା କରୁଛନ୍ତି । ଶନିବାର ସକାଳେ ତାଙ୍କ ବଦଳି ଆଦେଶ ଆସିଥିଲା। ଏହାକୁ ଛାତ୍ରୀଛାତ୍ରମାନେ ବିରୋଧ କରିଥିଲେ। ଶେଷରେ ପିଲାଙ୍କୁ ବୁଝାଶୁଝା କରି ସୁକାନ୍ତ ବଦଳି ହୋଇଥିବା ବିଦ୍ୟାଳୟକୁ ଚାଲିଯାଇଥିଲେ। ଅପରପକ୍ଷେ ଶିକ୍ଷକଙ୍କ ବଦଳି ବାତିଲ ନ ହେଲେ ସୋମବାର ଛାତ୍ରୀଛାତ୍ର ଓ ଅଭିଭାବକମାନେ ସ୍କୁଲ ଗେଟରେ ତାଲା ପକାଇବାକୁ ଧମକ ଦେଇଛନ୍ତି। ଏହି ଘଟଣା ଏବେ ଆଠଗଡ଼ରେ ଆଲୋଚନାର ବିଷୟ ପାଲଟିଛି।
