ପାପଡ଼ାହାଣ୍ଡି,୧ା୯(ଡି.ଏନ୍.ଏ.): ନବରଙ୍ଗପୁର ଜିଲା ପାପଡ଼ାହାଣ୍ଡି ବ୍ଲକ ଡେଙ୍ଗାଗୁଡ଼ା ପଞ୍ଚାୟତ ଖର୍କି ସରକାରୀ ଆଶ୍ରମ ବିଦ୍ୟାଳୟର ପ୍ରଧାନଶିକ୍ଷକ ଫ୍ରାନ୍ସସିସ୍ ନାଗଙ୍କ ବଦଳି ପ୍ରତିବାଦରେ ଗୁରୁବାର ବିଦ୍ୟାଳୟ ଆଗରେ ଧାରଣା ଦେଇଛନ୍ତି ଛାତ୍ରୀଛାତ୍ରଙ୍କ ସହ ଅଭିଭାବକ। ଯେ ପର୍ଯ୍ୟନ୍ତ ପ୍ରଧାନଶିକ୍ଷକଙ୍କ ବଦଳି ପ୍ରତ୍ୟାହାର ନ ହୋଇଛି ସେମାନେ ବିଦ୍ୟାଳୟକୁ ଫେରିବେ ନାହିଁ ବୋଲି ଛାତ୍ରୀଛାତ୍ର କହିଥିବା ବେଳେ ଅଭିଭାବକମାନେ ବିଦ୍ୟାଳୟରେ ତାଲା ପକାଇବେ ବୋଲି ଚେତାବନୀ ଦେଇଛନ୍ତି।
ସୂଚନା ମୁତାବକ ବିଦ୍ୟାଳୟରେ ଗତ ୪ ବର୍ଷରୁ ଊର୍ଦ୍ଧ୍ୱ ହେଲା ପ୍ରଧାନଶିକ୍ଷକ ଦାୟିତ୍ୱରେ ରହି ଆସୁଥିଲେ। ଇତି ମଧ୍ୟରେ ତାଙ୍କର ଅନ୍ୟତ୍ର ବଦଳି ହୋଇଯାଇଛି। ଯାହାକୁ ସାଧାରଣରେ ବିଦ୍ୟାଳୟର ଛାତ୍ରୀଛାତ୍ର ଓ ଅଭିଭାବକମାନେ ଗ୍ରହଣ କରି ପାରି ନ ଥିଲେ। ନାଗଙ୍କ ସମୟରେ ବିଦ୍ୟାଳୟର ଅନେକ ଉନ୍ନତିକରଣ କାର୍ଯ୍ୟ ସହ ଛାତ୍ରୀଛାତ୍ର ହଷ୍ଟେଲ ସୁବିଧା ଭଲ ଭାବରେ ପାଉଥିଲେ। ପାଠପଢ଼ାରେ ମଧ୍ୟ ବହୁତ ଉନ୍ନତି ହୋଇଥିଲା। ବିଦ୍ୟାଳୟ ପରିବେଶ ସଫାସୁତରା ରହିଥିଲା। ଯଦି ସେ ବଦଳି ହୋଇ ଚାଲିଯିବେ ତା’ ହେଲେ ଛାତ୍ରୀଛାତ୍ରଙ୍କ ବିଦ୍ୟାଳୟ ପ୍ରତି ଯିବାକୁ ମନ ହେବ ନାହିଁ ବୋଲି ଅଭିଭାବକ କହିଛନ୍ତି। ଯଦି ବଦଳି ପ୍ରତ୍ୟାହାର କରା ନ ଯାଏ ତେବେ ଛାତ୍ରୀଛାତ୍ର ବିଦ୍ୟାଳୟ ଛାଡ଼ିବା ସହ ଅଭିଭାବକ ବିଦ୍ୟାଳୟରେ ତାଲା ପକାଇବେ ବୋଲି ଚେତାବନୀ ଦେଇଛନ୍ତି। ଖବର ଲେଖା ଶେଷ ସୁଦ୍ଧା ଧାରଣା ଜାରି ରହିଛି। ପ୍ରଶାସନ ପକ୍ଷରୁ କେହି ପହଞ୍ଚି ନାହାନ୍ତି।