କୋଣାର୍କ,୨ା୮(ଡି.ଏନ୍.ଏ.): ଦୀର୍ଘ ୩ମାସ ବନ୍ଦ ପରେ ସୋମବାର ଠାରୁ ପର୍ଯ୍ୟଟକଙ୍କ ପାଇଁ ଖୋଲିବ କୋଣାର୍କ ସୂର୍ଯ୍ୟମନ୍ଦିର। ଏନେଇ ପର୍ଯ୍ୟଟନ ବିଭାଗ ପକ୍ଷରୁ କୋଣାର୍କ ମନ୍ଦିର ଦାୟିତ୍ୱରେ ରହିଥିବା ଅଧିକାରୀ ନୀରଜ ସିଂ ସୂଚନା ଦେଇଛନ୍ତି। କୋଭିଡ୍ ଗାଇଡଲାଇନ ଅନୁଯାୟୀ ମନ୍ଦିର ଖୋଲାଯିବାକୁ ନିଷ୍ପତ୍ତି ହୋଇଥିବା ବେଳେ ପ୍ରତି ଶନିବାର ଓ ରବିବାର ମନ୍ଦିର ବନ୍ଦ ରହିବ। ମନ୍ଦିରକୁ ପ୍ରବେଶ କରିବା ପାଇଁ ଅନ୍ଲାଇନରେ ଦୈନିକ ୨ହଜାର ପର୍ଯ୍ୟଟକଙ୍କ ପାଇଁ ଟିକେଟ ମିଳିବ। ପରେ ଅଫଲାଇନରେ ଟିକେଟ ମିଳିପାରିବ। ମନ୍ଦିର ମୁଖ୍ୟ ପ୍ରବେଶ ପଥରେ ଏଏସଆଇ ପକ୍ଷରୁ ବୋର୍ଡ ଲଗାଯାଇଛି। ପର୍ଯ୍ୟଟକମାନେ ଏହି ବୋର୍ଡରେ ରହିଥିବା କ୍ୟୁଆର କୋଡ୍କୁ ସ୍ମାର୍ଟଫୋନରେ ସ୍କାନ କରି ସାମାଜିକ ଦୂରତ୍ୱ ରକ୍ଷା କରି ମନ୍ଦିର ଭିତରକୁ ପ୍ରବେଶ କରିବେ। ମାସ୍କ ପରିଧାନ ବାଧ୍ୟତାମୂଳକ କରାଯାଇଛି। ସୂଚନାଥାଉ କି, କରୋନାର ଦ୍ୱିତୀୟ ଲହର ପାଇଁ ଗତ ଏପ୍ରିଲ ୧୬ରୁ ପର୍ଯ୍ୟଟକଙ୍କ ପାଇଁ ସୂର୍ଯ୍ୟମନ୍ଦିର ବନ୍ଦ ରହିଥିଲା।
