ନୂଆଦିଲ୍ଲୀ,୧୭ା୧: ଓଡ଼ିଶାରେ ଚିଟ୍ଫଣ୍ଡ କମ୍ପାନୀଗୁଡ଼ିକ ଜମାକାରୀଙ୍କଠାରୁ ବହୁ କୋଟି ଟଙ୍କା ଠକି ନେଇଛନ୍ତି। ଠକାମିର ଶିକାର ଜମାକାରୀ କିପରି ସେମାନଙ୍କ ଟଙ୍କା ଫେରିପାଇବେ ସେଥିପାଇଁ ସୁପ୍ରିମକୋର୍ଟ ସୋମବାର କେନ୍ଦ୍ର ସରକାର, ଓଡ଼ିଶା ସରକାର ଏବଂ ଚିଟ୍ଫଣ୍ଡ ଦୁର୍ନୀତିର ଅନ୍ୟାନ୍ୟ ପକ୍ଷଙ୍କଠାରୁ ପ୍ରସ୍ତାବ ମାଗିଛନ୍ତି। ଚିଟ୍ଫଣ୍ଡ ଦୁର୍ନୀତି ମାମଲାର ତଦନ୍ତରେ ବିଳମ୍ବ ଯୋଗୁ ସାଧାରଣ ଲୋକେ ହଇରାଣ ହେଉଥିବା ଜଷ୍ଟିସ୍ ଏମ୍.ଆର୍. ଶାହା ଏବଂ ସି.ଟି. ରବିକୁମାରଙ୍କ ଖଣ୍ଡପୀଠ କହିଥିଲେ। କେତେଜଣ ଜମାକାରୀ ବର୍ତ୍ତମାନ ସୁଦ୍ଧା ଟଙ୍କା ଫେରିପାଇଛନ୍ତି ଜଣାଇବା ଲାଗି ଖଣ୍ଡପୀଠ ସଲିସିଟର ଜେନେରାଲ ତୁଷାର ମେହେଟ୍ଟାଙ୍କୁ ନିର୍ଦ୍ଦେଶ ଦେଇଥିଲେ। ଚିଟ୍ଫଣ୍ଡ ମାମଲାଗୁଡ଼ିକର ତଦନ୍ତ ସେବି, ଇଡି ଆଦି ବିଭିନ୍ନ ସଂସ୍ଥା କରୁଥିବାରୁ ସର୍ବୋଚ୍ଚ ଅଦାଲତ ଏକ କମିଟି ଗଠନ କରନ୍ତୁ ବୋଲି ମେହେଟ୍ଟା ପୂର୍ବରୁ ପ୍ରସ୍ତାବ ଦେଇଥିଲେ। ମାମଲାର ପରବର୍ତ୍ତୀ ଶୁଣାଣି ଫେବୃୟାରୀ ୨୦କୁ ଧାର୍ଯ୍ୟ କରାଯାଇଛି। ଓଡ଼ିଶାରେ ଚିଟ୍ଫଣ୍ଡ କମ୍ପାନୀ ବହୁକୋଟି ଟଙ୍କା ଠକି ନେଇଥିବାରୁ ଏହାର ଉପଯୁକ୍ତ ତଦନ୍ତ ସହ ଜମାକାରୀଙ୍କୁ କ୍ଷତିପୂରଣ ପ୍ରଦାନ ଲାଗି ଦାଏର ପିଟିଶନ ଉପରେ କେନ୍ଦ୍ର ସହଯୋଗ ମନ୍ତ୍ରଣାଳୟ ପୂର୍ବରୁ ଷ୍ଟାଟସ୍ ରିପୋର୍ଟ ଦାଖଲ କରିଥିଲା। ଏଥିସହ ମାମଲାରେ ନିଜକୁ ପକ୍ଷଭୁକ୍ତ କରିବା ଲାଗି ମନ୍ତ୍ରଣାଳୟ ଆବେଦନ କରିଥିଲା।