ନୂଆଦିଲ୍ଲୀ,୧୭ା୧୦:କିନ୍ନରମାନଙ୍କୁ ଅଲଗା ଜାତି ଭାବେ ବିବେଚନା କରାଯାଇପାରିବ ନାହିଁ ବୋଲି ସୁପ୍ରିମକୋର୍ଟ ସୋମବାର କହିଛନ୍ତି। ବିହାର ସରକାର କିନ୍ନର ସମ୍ପ୍ରଦାୟଙ୍କୁ ସ୍ବତନ୍ତ୍ର ଜାତି ନୁହେଁ ବରଂ ଜାତି ତାଲିକାରେ ଏକ ସ୍ବତନ୍ତ୍ର ବର୍ଗ ଭାବେ ସାମିଲ କରିବାକୁ ନେଇଥିବା ନିଷ୍ପତ୍ତି ବିରୋଧରେ ଆଗତ ପିଟିଶନ୍ର ଶୁଣାଣି ବେଳେ ସର୍ବୋଚ୍ଚ ଅଦାଲତ ଉପରୋକ୍ତ ରାୟ ଦେଇଛନ୍ତି। ଜଷ୍ଟିସ୍ ସଞ୍ଜୀବ ଖାନ୍ନାଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ କହିଛନ୍ତି, ବିହାର ସରକାର ଜାତି ତାଲିକାରେ କିନ୍ନରମାନଙ୍କୁ ଏକ ଅଲଗା ସ୍ତମ୍ଭ ଦେଇଛନ୍ତି, ଯେପରି ସେମାନଙ୍କ ତଥ୍ୟ ରାଜ୍ୟରେ ଉପଲବ୍ଧ ହେବ। କିନ୍ନର ଆଦୌ ଏକ ଜାତି ନୁହେଁ। ଏବେ ୩ଟି ବର୍ଗ- ପୁରୁଷ, ମହିଳା ଓ କିନ୍ନର ରହିଛି, ଯାହାର ତଥ୍ୟ ଉପଲବ୍ଧ ବୋଲି ଖଣ୍ଡପୀଠ କହିଛନ୍ତି।
କିନ୍ନରମାନଙ୍କୁ ତୃତୀୟ ଲିଙ୍ଗ ଭାବେ କେତେକ ସୁବିଧା ସୁଯୋଗ ଦିଆଯାଇପାରିବ, କିନ୍ତୁ ସ୍ବତନ୍ତ୍ର ଜାତି ଭାବେ ନୁହେଁ ବୋଲି ସୁପ୍ରିମକୋର୍ଟ ସ୍ପଷ୍ଟ କରିଦେଇଛନ୍ତି। କିନ୍ନର ସମ୍ପ୍ରଦାୟ ବିଭିନ୍ନ ଜାତିର ଥାଇପାରନ୍ତି। ତେଣୁ ସେମାନଙ୍କୁ ଗୋଟିଏ ସ୍ବତନ୍ତ୍ର ଜାତିର ପରିଚୟ ଦେବା ସମ୍ଭବପର ହୋଇ ନ ପାରେ। ବିହାର ପ୍ରଥମ ରାଜ୍ୟ ଯିଏ ଜାତି ଆଧାରିତ ସର୍ଭେ ତଥ୍ୟ ପ୍ରକାଶ କରିଛି। ଉକ୍ତ ରିପୋର୍ଟ ଅନୁଯାୟୀ ଜନସଂଖ୍ୟାର ୩୬ ପ୍ରତିଶତ ଅତ୍ୟନ୍ତ ପଛୁଆ ବର୍ଗର ହୋଇଥିବାବେଳେ ୨୭.୧ ପ୍ରତିଶତ ପଛୁଆ ବର୍ଗ, ୧୯.୭ ପ୍ରତିଶତ ଅନୁସୂଚିତ ଜାତି ଏବଂ ସାଧାରଣ ବର୍ଗ ୧୫.୫ ପ୍ରତିଶତ ରହିଛନ୍ତି। ବିହାରର ମୋଟ ଜନସଂଖ୍ୟା ୧୩.୧ କୋଟିରୁ ଅଧିକ। ଗତ ଅଗଷ୍ଟରେ ବିହାର ସରକାର ଜାତି ଜନଗଣନା ସମ୍ପୂର୍ଣ୍ଣ କରିଥିଲେ। ଏହି ସର୍ଭେ ସମସ୍ତଙ୍କ ପାଇଁ ଲାଭଦାୟକ ହେବ ବୋଲି ମୁଖ୍ୟମନ୍ତ୍ରୀ ନୀତୀଶ କୁମାର ଜୋର୍ ଦେଇଥିଲେ। ଏଥିସହିତ ଅବହେଳିତଙ୍କ ସମେତ ସମାଜର ବିଭିନ୍ନ ବର୍ଗର ବିକାଶରେ ଏହା ସହାୟକ ହେବ ବୋଲି ସେ କହିଥିଲେ।