ନୂଆଦିଲ୍ଲୀ,୩।୩(ପି.ଟି.): ନାଗରିକମାନଙ୍କ ସ୍ବାଧୀନତା ସର୍ବୋପରି ଗୁରୁତ୍ୱପୂର୍ଣ୍ଣ ହୋଇଥିବାରୁ ଅନୁଚ୍ଛେଦ ୨୧ ସମ୍ବିଧାନର ଆତ୍ମା ବୋଲି ସୁପ୍ରିମକୋର୍ଟ କହିଛନ୍ତି। ଏ ସମ୍ପର୍କିତ ମାମଲାରେ ହାଇକୋର୍ଟ ତ୍ୱରିତ୍ ନିଷ୍ପତ୍ତି ନେଇ ଜଣେ ବ୍ୟକ୍ତିଙ୍କୁ ତାଙ୍କର ମୂଲ୍ୟବାନ ଅଧିକାରରୁ ବଞ୍ଚିତ କରିପାରିବେ ନାହିଁ ବୋଲି ଜଷ୍ଟିସ୍ ବି.ଆର୍. ଗଭାଇ ଏବଂ ସନ୍ଦୀପ ମେହେଟ୍ଟାଙ୍କ ଖଣ୍ଡପୀଠ ଟିପ୍ପଣୀ ଦେଇଛନ୍ତି।
ଗତ ଜାନୁଆରୀ ୨୯ରେ ସୁପ୍ରିମକୋର୍ଟଙ୍କ ଭର୍ତ୍ସନା ପରେ ମହାରାଷ୍ଟ୍ରର ଜଣେ କର୍ପୋରେଟରଙ୍କୁ ହତ୍ୟା ମାମଲାର ମୁଖ୍ୟ ଅଭିଯୁକ୍ତ ଅମୋଲ ବିଠଲ ବାହିଲଙ୍କୁ ବମ୍ବେ ହାଇକୋର୍ଟ ଜାମିନ ପ୍ରଦାନ କରିଥିବା ଖଣ୍ଡପୀଠ କହିଛନ୍ତି। ତେବେ ଜାନୁଆରୀ ୨୯ରେ ସର୍ବୋଚ୍ଚ ଅଦାଲତଙ୍କ ନିର୍ଦ୍ଦେଶନାମା ପୂର୍ବରୁ ହାଇକୋର୍ଟ ଜାମିନ ଆବେଦନକୁ ବିଚାର କରିବା ପରିବର୍ତ୍ତେ ବିଭିନ୍ନ କାରଣ ଦର୍ଶାଇ ଏହାକୁ ଘୁଞ୍ଚାଇ ଚାଲିଥିଲେ।
ନାଗରିକଙ୍କ ସ୍ବାଧୀନତା ସହ ଜଡ଼ିତ ମାମଲାକୁ ତୁରନ୍ତ ବିଚାର ନ କରି ଗଡ଼ାଇ ଚାଲିବା ଦ୍ୱାରା ସମ୍ପୃକ୍ତ ପକ୍ଷଙ୍କୁ ତାଙ୍କ ମୂଲ୍ୟବାନ ଅଧିକାରରୁ ବଞ୍ଚତ୍ତ କରୁଛି। ସମ୍ବିଧାନର ଅନୁଚ୍ଛେଦ ୨୧ ନାଗରିକମାନଙ୍କ ଏହି ଅଧିକାରକୁ ସୁନିଶ୍ଚିତ କରୁଥିବା ଖଣ୍ଡପୀଠ କହିଛନ୍ତି। ବମ୍ବେ ହାଇକୋର୍ଟରେ ବିଭିନ୍ନ ମାମଲାରେ ଜାମିନ ଏବଂ ଅନ୍ତରୀଣ ଜାମିନ ଆବେଦନର ତ୍ୱରିତ୍ ନିଷ୍ପତ୍ତି ନିଆଯାଉ ନ ଥିବା ସର୍ବୋଚ୍ଚ ଅଦାଲତ ଜାଣିବାକୁ ପାଇଥିଲେ। ଏଭଳି ଏକ ମାମଲାରେ ଅନ୍ତରୀଣ ଜାମିନ ଆବେଦନକୁ ୪ ବର୍ଷରୁ ଊର୍ଦ୍ଧ୍ୱ ସମୟ ଝୁଲାଇ ରଖାଯାଇଥିଲା ବୋଲି ଖଣ୍ଡପୀଠ କହିଛନ୍ତି। ବିଚାରପତିମାନେ ମାମଲାର ଗୁରୁତ୍ୱକୁ ବିଚାରକୁ ନ ନେଇ ବିଭିନ୍ନ ବାହାନା କରି ସମୟ ଗଡ଼ାଇ ଚାଲୁଛନ୍ତି। ତେଣୁ ଆପରାଧିକ ମାମଲାର ବିଚାର କରୁଥିବା ସମସ୍ତ ବିଚାରପତିଙ୍କୁ ଜାମିନ କିମ୍ବା ଅନ୍ତରୀଣ ଜାମିନ ସମ୍ପର୍କିତ ମାମଲାଗୁଡ଼ିକର ବିଚାର ଯଥାସମ୍ଭବ ଶୀଘ୍ର କରିବା ନିମନ୍ତେ ସୁପ୍ରିମକୋର୍ଟଙ୍କ ଅନୁରୋଧ ଜଣାଇଦେବାକୁ ଖଣ୍ଡପୀଠ ବମ୍ବେ ହାଇକୋର୍ଟର ମୁଖ୍ୟ ବିଚାରପତିଙ୍କୁ କହିଛନ୍ତି। ହାଇକୋର୍ଟର ରେଜିଷ୍ଟ୍ରାରଙ୍କୁ ଉପରୋକ୍ତ ନିର୍ଦ୍ଦେଶନାମା ଜଣାଇଦେବାକୁ ଖଣ୍ଡପୀଠ ସର୍ବୋଚ୍ଚ ଅଦାଲତଙ୍କ ରେଜିଷ୍ଟ୍ରାର (ଜୁଡିସିଆଲ୍)ଙ୍କୁ କହିଛନ୍ତି।
ସୂଚନାଯୋଗ୍ୟ, ଅଭିଯୁକ୍ତ ବାହିଲ ୭.୫ ବର୍ଷ ଜେଲରେ ବିତାଇବା ପରେ ନିୟମିତ ଜାମିନ ପାଇଁ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। କିନ୍ତୁ ହାଇକୋର୍ଟ ଆବେଦନକୁ ବିଚାରକୁ ନ ନେଇ ତଳକୋର୍ଟକୁ ଯିବା ପାଇଁ ଗତବର୍ଷ ମାର୍ଚ୍ଚ ୩୦ରେ ନିର୍ଦ୍ଦେଶ ଦେଇଥିଲେ। ଜାମିନର ଗୁରୁତ୍ୱକୁ ବିଚାରକୁ ନ ନେବା ନ୍ୟାୟପାଳିକା ଉପରେ ନ୍ୟସ୍ତ ଦାୟିତ୍ୱ ସମ୍ପାଦନ ନ କରିବା ସହ ସମାନ ବୋଲି ଖଣ୍ଡପୀଠ ମତ ଦେଇଛନ୍ତି।