ମହାକାଳପଡ଼ା, ୧୨ା୩ (ଡିଏନ୍ଏ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକରେ ଆରସେଲର ମିତ୍ତଲ ମେଗା ଷ୍ଟିଲ ପ୍ଲାଣ୍ଟ ପ୍ରତିଷ୍ଠା ପାଇଁ ସରକାରଙ୍କ ସହ ଚୁକ୍ତି କରିଥିଲା। ପରେ ସରକାରଙ୍କ ପକ୍ଷରୁ ବ୍ଲକର ଉପକୂଳ ଅଞ୍ଚଳରେ ପ୍ରକଳ୍ପ ପାଇଁ ସ୍ଥାନ ଚିହ୍ନଟ କରାଯାଇଥିଲା। ଶୁକ୍ରବାର କୋଲକାତାର ଏକ ସର୍ବେକ୍ଷଣ ସଂସ୍ଥା ପକ୍ଷରୁ ବ୍ଲକର ମହାନଦୀ ତ୍ରିକୋଣ ଭୂମି ଅଞ୍ଚଳରେ ଏଗାର ଜଣିଆ ପ୍ରତିନିଧି ପହଞ୍ଚତ୍ ଜିପିଏସ୍ ସିଷ୍ଟମ୍ ମାଧ୍ୟମରେ ସର୍ଭେ କାର୍ଯ୍ୟ ଆରମ୍ଭ କରିଛନ୍ତି। ଏହି ସର୍ଭେ କାର୍ଯ୍ୟ ଜିପିଏସ୍ ମାଧ୍ୟମରେ ଭୌଗୋଳିକ ସ୍ଥିତି ପରଖିବା ସହ ସିଧାସଳଖ କୋଲକାତା ସର୍ଭେ ସଂସ୍ଥା ମୁଖ୍ୟ କାର୍ଯ୍ୟାଳୟକୁ ପ୍ରେରିତ କରାଯାଉଥିବା ଏହି ସଂସ୍ଥା କର୍ମଚାରୀ ଅଜୟ ସାମନ୍ତ ସୂଚନା ଦେଇଛନ୍ତି। ଏହି ସର୍ଭେ କାର୍ଯ୍ୟ ମାସେ ଧରି ପ୍ରକଳ୍ପ ଅଞ୍ଚଳଗୁଡ଼ିକରେ କରାଯିବ ବୋଲି ସେ କହିଛନ୍ତି। ବ୍ଲକର ପେଟଛେଲା ପଞ୍ଚାୟତର ମଧୁବନ, ରାଜେନ୍ଦ୍ରନଗର, ସାବିନୀ, ମନ୍ତ୍ରୀଘେରି, ଦଳେଇକନ୍ଧା, ହରିଶ, ଅଳାପାହି, ଜୁଣକନ୍ଧା, କଣ୍ଟିଜୋର, ବାରାଖିଆ ଆଦି ବିସ୍ତୃତ ଚାଷ ଜମିଗୁଡିକରେ ସର୍ବେକ୍ଷଣ ଟିମ୍ ଅତ୍ୟାଧୁନିକ ଯନ୍ତ୍ରପାତି ଦ୍ୱାରା ତଥ୍ୟ ସଂଗ୍ରହ କରୁଛନ୍ତି। ସୂଚନା ଅନୁଯାୟୀ, ଏହି ଅଞ୍ଚଳଗୁଡିକରେ ବ୍ୟାପକ ପରିମାଣରେ ସରକାରୀ ଜମି ରହିଛି ବୋଲି କୁହାଯାଇଛି।