ଖମାର,୧୮ା୩(ଡି.ଏନ.ଏ.) ୨ବର୍ଷ ହେଲା କୋଭିଡ୍ କାରଣରୁ ଦୋଳ ଓ ହୋଲି ପର୍ବ ଫିକା ପଡ଼ିଯାଇଥିଲା। ହେଲେ ଏବେ ସ୍ଥିତି ନିୟନ୍ତ୍ରଣରେ ଥିବାରୁ ଚଳିତବର୍ଷ ଧୁମ୍ଧାମରେ ଦୋଳ ଉତ୍ସବ ପାଳନ ହେବ। ସମ୍ବଲପୁରୀ ଲୋକବାଦ୍ୟ ଦୁଲ୍ଦୁଲିରେ କମ୍ପିବ ଅନୁଗୋଳ ଜିଲା ପାଲଲହଡ଼ା ବ୍ଲକର ଶଙ୍ଖମୁର ଗ୍ରାମ। ଗଁା ସ୍ଥାପନ ପରଠାରୁ ପ୍ରତିବର୍ଷ ନିଆରା ଢଙ୍ଗରେ ପାଳନ ହେଉଥିବା ଏହି ପର୍ବ ୨୦୨ ବର୍ଷରେ ପହଞ୍ଚିଛି। ତେଣୁ ଏଥର ରଙ୍ଗାରଙ୍ଗ କାର୍ଯ୍ୟକ୍ରମ ବ୍ୟବସ୍ଥା କରାଯାଇଛି। ମେଲୋଡ଼ି ସହ ନାଟକ ପରିବେଷଣ ପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି।
ଗ୍ରାମବାସୀଙ୍କ କହିବା ଅନୁଯାୟୀ, ଶଙ୍ଖମୁର ଗଁା ସ୍ଥାପନ ପରେ ପୁରୀ ମୁକ୍ତିମଣ୍ଡପରେ ପୂଜାର୍ଚ୍ଚନା କରି ରାଧାକୃଷ୍ଣଙ୍କ ପ୍ରତିମାଙ୍କୁ ମନ୍ଦିରରେ ସ୍ଥାପନ ପରଠାରୁ ଏଠାରେ ଦୋଳ ମହୋତ୍ସବ ପାଳନ ହୋଇଆସୁଛି। ଫାଲ୍ଗୁନ ମାସ ଶୁକ୍ଳପକ୍ଷ ଦଶମୀରୁ ଆରମ୍ଭ ହୋଇ ଏହା ପୂର୍ଣ୍ଣିମା ପର୍ଯ୍ୟନ୍ତ ଚାଲିଥାଏ। ପରଦିନ ହୋଲି ଉତ୍ସବ ପାଳନ ହୋଇଥାଏ। ଦଶମୀ ଦିନ ରାଧାକୃଷ୍ଣଙ୍କ ଚଳନ୍ତି ପ୍ରତିମାକୁ ମନ୍ଦିର ବାହାରକୁ ଅଣାଯାଇ ୪ ଦିନ ପର୍ଯ୍ୟନ୍ତ ପରିକ୍ରମା କରାଯାଇଥାଏ। ପ୍ରଥମେ ମାଉସୀ ଘର, ଦ୍ୱିତୀୟ ଦିନ ଗ୍ରାମ ପ୍ରଧାନଙ୍କ ଘର, ତୃତୀୟ ଦିନ ପଡୋଶୀ ଗ୍ରାମ ଓ ଚତୁର୍ଥ ଦିନ ଶଙ୍ଖମୁର ଗ୍ରାମ ପରିକ୍ରମା ହୋଇଥାଏ। ପୂର୍ଣ୍ଣିମା ପୂର୍ବ ଦିନ ଅର୍ଥାତ ଚତୁର୍ଦ୍ଦଶୀ ତିଥିରେ ହୋଲିକା ଦହନ ହୋଇଥାଏ। ଦୋଳ କାର୍ଯ୍ୟକ୍ରମକୁ ୩ ଭାଗ ଅର୍ଥାତ୍ ଦିନ ପହଣ୍ଡି, ରାତି ପହଣ୍ଡି ଓ ମନୋରଞ୍ଜନ କାର୍ଯ୍ୟକ୍ରମ ମାଧ୍ୟମରେ ପାଳନ କରାଯାଏ। ଦିବା ପହଣ୍ଡିରେ ଦହଲା, ନଦିଆ ସଂକୀର୍ତ୍ତନ, ଗୋପାଳମାନଙ୍କ ବାଡ଼ି ଖେଳ, ସମ୍ବଲପୁରୀ ଦୁଲଦୁଲି ବାଦ୍ୟ ଓ ଜନ ସମାଗମ ମଧ୍ୟମରେ ରାଧାକୃଷ୍ଣଙ୍କୁ ଦୋଳ ମଣ୍ଡପ ଯାଏ ପହଣ୍ଡି କରି ନିଆଯାଇଥାଏ। ସେଠାରେ ରାଧାକୃଷ୍ଣଙ୍କୁ ଦୋଳିରେ ବିରାଜମାନ କରାଇ ବର୍ଷର ପ୍ରଥମ ପଞ୍ଜିକା ପାଠ କରାଯାଇଥାଏ। ରାତି ୧୦ଟା ପର୍ଯ୍ୟନ୍ତ ଠାକୁରଙ୍କ ଦର୍ଶନ କାର୍ଯ୍ୟ ଚାଲେ। ରାତି ପହଣ୍ଡି ମାଧ୍ୟମରେ ରାଧାକୃଷ୍ଣଙ୍କୁ ମନ୍ଦିର ବେଢ଼ାରେ ରଖାଯାଇଥାଏ ଓ ରାତି ୨ଟା ପରେ ମନୋରଞ୍ଜନ କାର୍ଯ୍ୟକ୍ରମ ଅନୁଷ୍ଠିତ ହୋଇଥାଏ। ପରଦିନ ସକାଳେ ୧୦ରୁ୧୫ ଦଳ ଦହଲା ବାଦକଙ୍କ ମଧ୍ୟରେ ପ୍ରତିଯୋଗିତା ଅନୁଷ୍ଠିତ ହୋଇଥାଏ। ଯୁବକମାନେ ହୋଲି ଖେଳର ମଜା ନେଇଥାନ୍ତି। ସାରେ ରାଧାକୃଷ୍ଣଙ୍କୁ ସ୍ନାନ କରାଇ ମନ୍ଦିରରେ ପ୍ରବେଶ ସହ ଦୋଳ ଯାତ୍ରା ସମ୍ପୂର୍ଣ୍ଣ ହୋଇଥାଏ।