ଚେନ୍ନାଇ: ଲୋକେ ନିଜ ଭଲ ପାଇବାକୁ ଅମର ରଖିବାକୁ ବହୁତ କିଛି କରିଥା’ନ୍ତି। ଯେପରି ମୋଗଲର ବାଦ୍ଶାହା ଶାହାଜାହାନ୍ ତାଙ୍କ ପ୍ରିୟ ସ୍ତ୍ରୀ ମମ୍ତାଜ୍ଙ୍କ ସ୍ମୃତିରେ ତାଜମହଲ ତିଆରି କରିଥିଲେ, ଯାହା ଏବେ ବିଶ୍ୱଦରବାରରେ ପ୍ରସିଦ୍ଧି ଲାଭ କରିଛି। ନିକଟରେ ଜଣେ ବ୍ୟକ୍ତି ତାଜମହଲର ପ୍ରତିକୃତି ନିର୍ମାଣ କରିଛନ୍ତି, ହେଲେ ସେ ଏହା ତାଙ୍କ ମା’ଙ୍କ ପାଇଁ କରିଛନ୍ତି। ଏପରି ଘଟଣା ତାମିଲନାଡୁର ତିରୁଭରୁର୍ ଜିଲାରେ ଘଟିଛି। ଅମୃଦିନ୍ ଶୈଖ୍ ଦଉଡ୍ ତାଙ୍କ ମା’ଙ୍କ ସ୍ମୃତିକୁ ଜୀବିତ ରଖିବାକୁ ଏକ ଅବିକଳ ତାଜମହଲ ପ୍ରସ୍ତୁତ କରିଛନ୍ତି। ଏହି ପ୍ରତିକୃତି ତାଜମହଲର ଦୃଶ୍ୟ ଦେଖି ଲୋକେ ଚକିତ ହୋଇଯାଇଛନ୍ତି। ରିପୋର୍ଟ ମୁତାବକ, ଅମୃଦିନ୍ଙ୍କ ମା’ ଜେଲାନି ବିବିଙ୍କ ଦେହାନ୍ତ ୨୦୨୦ରେ ହୋଇଥିଲା। ଏହା ପୂର୍ବରୁ ଏକ କାର୍ ଦୁର୍ଘଟଣାରେ ୧୯୮୯ରେ ସେ ତାଙ୍କ ବାପାଙ୍କୁ ହରାଇଥିଲେ। ତା’ ପରଠାରୁ ମା’ ଜେଲାନିଙ୍କ ପାଇଁ ୫ ପିଲାଙ୍କର ଲାଳନପାଳନ ସହଜ ନ ଥିଲା। ସେତେବେଳେ ସେ ଅନ୍ୟତ୍ର ବିବାହ ନ କରିବାକୁ ନିଷ୍ପତ୍ତି ନେଇଥିଲେ। ପରିବାରର ସୁରକ୍ଷା ପାଇଁ ତାଙ୍କ ଅବଦାନ ବେଶ୍ ମହତ୍ତ୍ୱପୂର୍ଣ୍ଣ ଥିଲା। ସେ ଉଭୟ ମା’-ବାପାଙ୍କ ଦାୟିତ୍ୱ ତୁଲାଉଥିଲେ। ମା’ଙ୍କ ଏପରି ଭଲପାଇବା ଓ କୃତଜ୍ଞତାର ପ୍ରତୀକ ସ୍ବରୂପ ଅମୃଦିନ୍ ଏକ ସ୍ମାରକୀ ନିର୍ମାଣ କରିବାକୁ ପରିବାର ସହ ଆଲୋଚନା କଲେ। ମା’ ଜେଲାନିଙ୍କ ମୃତ୍ୟୁ ପରେ ଅମୃଦିନ୍ ମା’ଙ୍କୁ କବର ନ ଦେଇ ନିଜ ଜାଗାରେ ପୋତି ଦେଇଥିଲେ। ପରେ ତାଙ୍କ ସ୍ମୃତିରେ ଏକ ସ୍ମାରକୀ ଭାବେ ଡ୍ରିମ୍ ବିଲ୍ଡର ସାହାଯ୍ୟରେ ସେ ଏକ ପ୍ରତିକୃତି ତାଜମହଲ ନିର୍ମାଣ କଲେ। ଏଥିସହ ସେ ସ୍ଥାନୀୟ ମୁସଲମାନ୍ମାନଙ୍କ ପାଇଁ ନମାଜ ପଢ଼ିବାର ଏକ ସ୍ଥାନ ନିର୍ମାଣ କଲେ। ଖୁବ୍ଶୀଘ୍ର ସେ ସେଠାରେ ଏକ ଭୋଜନା ବ୍ୟବସ୍ଥା କରିବାକୁ ଲକ୍ଷ୍ୟ ରଖିଥିବାବେଳେ ସବୁ ଧର୍ମ ଓ ବର୍ଗର ଲୋକେ ଏଠାକୁ ଆସିପାରିବେ ବୋଲି ଅମୃଦିନ୍ କହିଛନ୍ତି।