କାଳିଆପାଣି,୨୯ା୪(ଡି.ଏନ.ଏ.): ଟମକା-ମଙ୍ଗଳପୁର ରାସ୍ତା ନିର୍ମାଣ କାର୍ଯ୍ୟ ନିମ୍ନମାନର କରାଯାଉଛି। ଠିକାଦାର ଅଧିକାରୀଙ୍କ ଛତ୍ରଛାୟା ତଳେ ରହି ଏପରି କାର୍ଯ୍ୟ କରୁଛନ୍ତି ବୋଲି ଅଭିଯୋଗ ହୋଇଛି। ଉକ୍ତ ରାସ୍ତା ପାଇଁ ପ୍ରତିବର୍ଷ କୋଟିକୋଟି ଟଙ୍କା ବ୍ୟୟ ବରାଦ କରାଯାଉଛି। ହେଲେ ବିଭାଗୀୟ ଅଧିକାରୀ ଓ ଠିକାଦାରଙ୍କ ମଧ୍ୟରେ ଭାଗବଣ୍ଟା ଯୋଗୁ କାର୍ଯ୍ୟ ଠିକ୍ରେ ହୋଇ ପାରୁନାହିଁ। ଚଳିତ ବର୍ଷ କୁହିକାଠାରୁ ଟାଟା ଜଗନ୍ନାଥ ମନ୍ଦିର ପର୍ଯ୍ୟନ୍ତ ମରାମତି କାର୍ଯ୍ୟ ଚାଲିଛି। କୁହିକାଠାରୁ ଏକ ନମ୍ବର ଛକ ପର୍ଯ୍ୟନ୍ତ ପିଚୁ କାର୍ଯ୍ୟ ର-ଠ କରାଯାଇଛି। ଫଳରେ ରାସ୍ତାରୁ ପିଚୁ ଉଠିବା ଆରମ୍ଭ ହେଲାଣି। ସେହିପରି ଟାଟା ସିରିଏଲ ଗେଟ୍ଠାରୁ ଟାଟା ଜଗନ୍ନାଥ ମନ୍ଦିର ପର୍ଯ୍ୟନ୍ତ କଂକ୍ରିଟ ରାସ୍ତା ନିର୍ମାଣ କାର୍ଯ୍ୟ ଚାଲୁ ରହିଛି। ଯାଜପୁର ଜିଲା ପୂର୍ତ୍ତ ବିଭାଗ ଏହି କାର୍ଯ୍ୟ ସମ୍ପାଦନା କରୁଥିବା ବେଳେ କାର୍ଯ୍ୟର ସୂଚନା ଫଳକ ଲଗାଯାଇନାହଁ। ସୂଚନା ଫଳକ ନ ଥିବାରୁ କେତେ ଟଙ୍କାର କାମ, କେଉଁ ଠିକାଦାରଙ୍କ ନାମରେ ୱାର୍କ ଅର୍ଡର ରହିଛି ଓ ରାସ୍ତା ନିର୍ମାଣର ଭାଗ ମାପ କ’ଣ ରହିଛି ସେ ସମ୍ପର୍କରେ ଲୋକେ କିଛି ଜାଣି ପାରୁନାହାନ୍ତି। ଠିକାଦାର ନିଜ ଇଚ୍ଛା ଅନୁସାରେ କାର୍ଯ୍ୟ କରୁଥିବା ଲୋକେ ଅଭିଯୋଗ କରିଛନ୍ତି। ଲୋକଙ୍କ କହିବା ଅନୁସାରେ, ଗୋଟିଏ ସିମେଣ୍ଟରେ ବଡ଼ ଝୁଡିରେ ୪ ଝୁଡି ବାଲି ସହ ୬ ଝୁଡି ଗୋଡି (ଚିପ୍ସ) ମିଶାଇ ରାସ୍ତା ନିର୍ମାଣ କରାଯାଇଛି। ପ୍ରକୃତରେ କଂକ୍ରିଟ ରାସ୍ତା ନିର୍ମାଣ କାର୍ଯ୍ୟ ୧ଟି ସିମେଣ୍ଟ, ଦେଢ଼ଟା ବାଲି ଓ ୩ଟା ଚିପ୍ସ ଭାଗରେ କରିବା କଥା। କାର୍ଯ୍ୟ ଆରମ୍ଭ ହେବା ଦିନରୁ ବିଭାଗୀୟ ଅଧିକାରୀ ପରିଦର୍ଶନରେ ଆସୁନାହାନ୍ତି। ସରକାର ବିନା ଟେଣ୍ଡରରେ କେଟୁ ମାଧ୍ୟମରେ କୋଟିକୋଟି ଟଙ୍କା ଏହି ରାସ୍ତା ଉପରେ ଦୀର୍ଘ ବର୍ଷ ହେଲା ଅପବ୍ୟୟ କରି ଚାଲିଥିବା ବେଳେ ଚଳିତ ବର୍ଷ ଏହି ପୁରୁଣା ପ୍ରଥା ଆପଣେଇ ଥିବା ଶୁଣିବାକୁ ମିଳୁଛି। ଏ ସମ୍ପର୍କରେ ବିଭାଗୀୟ କନିଷ୍ଠ ଯନ୍ତ୍ରୀ ମନୋଜ ମାଝିଙ୍କୁ ପଚାରିବାରୁ ସେ କହିଛନ୍ତି, ଆମେ କ’ଣ କରିପାରିବୁ। ଠିକାଦାର ଜଣକ ନେତାଙ୍କ ପାଖ ଲୋକ। ତେବେ ବିଭାଗୀୟ ଅଧିକାରୀ ଦେଉଥିବା ଏଭଳି ମନ୍ତବ୍ୟକୁ ସ୍ଥାନୀୟ ଲୋକେ ସହଜରେ ଗ୍ରହଣ କରିପାରିନାହାନ୍ତି। ଏ ଦିଗରେ ଉଚ୍ଚ କର୍ତ୍ତୃପକ୍ଷ ଦୃଷ୍ଟିଦେବାକୁ ଦାବି ହୋଇଛି।