ଭୁବନେଶ୍ୱର, ୧୪।୧(ବ୍ୟୁରୋ): କରୋନା ସଂକ୍ରମଣରୁ ରକ୍ଷା ପାଇବା ପାଇଁ କୋଭିଡ୍ ଗାଇଡ୍ଲାଇନ୍ ଓ ଟିକାକରଣକୁ ଗୁରୁତ୍ୱ ଦିଆଯାଉଛି। ମହାମାରୀର ପ୍ରଥମ ଲହରରୁ ଟିକାକରଣକୁ ପ୍ରାଧାନ୍ୟ ଦିଆଯାଉଥିଲେ ବି ଏବେ ସୁଦ୍ଧା ରାଜ୍ୟର ଅନେକ ଲୋକ ଟିକା ନେଇ ନାହାନ୍ତି। ଏହା ମଧ୍ୟରେ କରୋନା ଓ ଏହାର ନୂଆ ଭାରିଆଣ୍ଟ ଓମିକ୍ରନ ତା’ର କାୟା ବିସ୍ତାର କରିଚାଲିଛି। ଏହାର ମୁକାବିଲା ପାଇଁ ଟିକାକରଣକୁ ବଢାଯିବ। ଏନେଇ ରାଜ୍ୟ ସରକାରଙ୍କ ପକ୍ଷରୁ ନିର୍ଦ୍ଦେଶ ରହିଛି। ପ୍ରଥମ ଡୋଜ ନେଇ ନ ଥିବା ଲୋକଙ୍କୁ ଚିହ୍ନଟ କରି ଘରକୁ ଯାଇ ଟିକା ଦିଆଯାଉଛି। ଚଳିତ ମାସ ଶେଷ ସୁଦ୍ଧା ଦ୍ୱିତୀୟ ଡୋଜ ଟିକାକରଣ ସାରିବାକୁ ଲକ୍ଷ୍ୟ ରଖାଯାଇଛି ବୋଲି ପରିବାର କଲ୍ୟାଣ ନିର୍ଦ୍ଦେଶକ ବିଜୟ ପାଣିଗ୍ରାହୀ ସୂଚନା ଦେଇଛନ୍ତି। ଅପରପକ୍ଷେ ଅନୁଗୋଳ, ମୟୂରଭଞ୍ଜ, ଗଜପତି, କଟକ, ସୁନ୍ଦରଗଡ଼ ଆଦି ୫ଟି ଜିଲାରେ ଟିକାକରଣ କମ ରହିଛି। ସେହିପରି ଅନୁଗୁଳ, ଗଜପତି, କଟକ, ସୁନ୍ଦରଗଡ଼ ଜିଲାରେ ଅଧିକ ଲୋକ ପ୍ରଥମ ଡୋଜ ନେଇ ନ ଥିବାବେଳେ ମୟୁରଭଞ୍ଜରେ ଦିତୀୟ ଡୋଜ ନେବା ପାଇଁ ଅଧିକ ଲୋକ ବାକି ଅଛନ୍ତି। ଏହି ସବୁ ଜିଲାଗୁଡ଼ିକରେ ପ୍ରତି ବ୍ଲକରେ ୧୨ଟି ଲେଖାଏ ମୋବାଇଲ ଭ୍ୟାନ ବୁଲି ଟିକା ଦିଆଯାଉଛି। ଅନ୍ୟପକ୍ଷରେ ଅନ୍ୟ ଜିଲାର ବ୍ଳକରେ ୧୦ଟି ମୋବାଇଲ ଭ୍ୟାନ ଜରିଆରେ ଟିକା ଦିଆଯାଉଛି। ୯୨ପ୍ରତିଶତ ଲୋକ ପ୍ରଥମ ଡୋଜ ନେଇସାରିଥିବାବେଳେ ଆଉ ୮ ପ୍ରତିଶତ ବାକି ଅଛନ୍ତି। ଏହାକୁ ଚଳିତ ମାସରେ ହିଁ ପୂରଣ କରାଯିବ ବୋଲି ପରିବାର କଲ୍ୟାଣ ନିର୍ଦ୍ଦେଶକ କହିଛନ୍ତି।
