ବୌଦ୍ଧ,୩ା୨(ସ୍ବ.ପ୍ର.): ବୌଦ୍ଧ ଜିଲା ହରଭଙ୍ଗା ବ୍ଲକ ରାମଗଡ ପଞ୍ଚାୟତର ଉଆଁଲ ବିଦ୍ୟାଳୟରେ ଶିକ୍ଷୟିତ୍ରୀ ବଦଳି ନେଇ ଗୁରୁବାର ଦିନ ଅଚଳାବସ୍ଥା ଦେଖାଯିବା ସହ ଅଭିଭାବକମାନେ ବିଦ୍ୟାଳୟ ଗେଟରେ ତାଲା ପକାଇ ଦେଇଛନ୍ତି। ମିଳିଥିବା ସୂଚନା ମୁତାବକ, ଉକ୍ତ ବିଦ୍ୟାଳୟରେ ପ୍ରଥମ ଶ୍ରେଣୀରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଥିବା ବେଳେ ୭୦ରୁ ଊର୍ଦ୍ଧ୍ୱ ଛାତ୍ରୀଛାତ୍ର ପାଠ ପଢୁଛନ୍ତି। ୮ ଗୋଟି ଶ୍ରେଣୀ ପାଇଁ ମାତ୍ର ୪ ଗୋଟି ଶ୍ରେଣୀ ଗୃହ ରହିଛି। ଫଳରେ ବହୁ ଅସୁବିଧାରେ ଛାତ୍ରୀଛାତ୍ର ପାଠ ପଢୁଛନ୍ତି। ସେହିପରି ଆଠ ଗୋଟି ଶ୍ରେଣୀ ପାଇଁ ୪ ଜଣ ଶିକ୍ଷକ ଓ ଜଣେ ଶିକ୍ଷୟିତ୍ରୀ ଥିଲେ। ବିଦ୍ୟାଳୟ ଠିକ ଭାବେ ଚାଲୁଥିବା ବେଳେ ଜିଲା ଶିକ୍ଷା ବିଭାଗ ପକ୍ଷରୁ ଜଣେ ନୂତନ ଶିକ୍ଷକଙ୍କୁ ନିଯୁକ୍ତି ଦିଆଯାଇଥିଲା। ନୂତନ ଶିକ୍ଷକଙ୍କୁ ନିଯୁକ୍ତି ପରେ ବିଦ୍ୟାଳୟରେ ଥିବା ଜଣେ ମାତ୍ର ଶିକ୍ଷୟିତ୍ରୀ ଶାରଲା ବେହେରାଙ୍କୁ ଅନ୍ୟତ୍ର ବଦଳି କରାଯାଇଥିଲା। ଗୁରୁବାର ଦିନ ଶିକ୍ଷୟିତ୍ରୀଙ୍କ ବଦଳି ହେବା ଜାଣି ଛାତ୍ରୀମାନେ ଅସନ୍ତୋଷ ବ୍ୟକ୍ତ କରିଥିଲେ। ଛାତ୍ରୀମାନେ ସେମାନଙ୍କର କିଛି ଅସୁବିଧା ହେଲେ ଶିକ୍ଷୟିତ୍ରୀଙ୍କୁ ଜଣାଇଥାନ୍ତି ବୋଲି ଅଭିଭାବକମାନେ କହିଛନ୍ତି। ଶିକ୍ଷୟିତ୍ରୀଙ୍କ ବଦଳି ଯୋଗୁ ଗୁରୁବାର ଦିନ ଛାତ୍ରୀଛାତ୍ରମାନେ ମଧ୍ୟାହ୍ନ ଭୋଜନ ନ ଖାଇ ଶ୍ରେଣୀ ବର୍ଜନ କରି ଘରକୁ ଚାଲି ଯାଇଥିଲେ। ପରେ ବିଦ୍ୟାଳୟ ପରିଚାଳନା କମିଟି ସଦସ୍ୟ ଓ ଅଭିଭାବକମାନେ ବିଦ୍ୟାଳୟକୁ ଆସି ଶିକ୍ଷୟିତ୍ରୀଙ୍କ ବଦଳି ପ୍ରତିବାଦର ତାଲା ପକାଇଥିବା ଜଣାପଡିଛି। ଏନେଇ ବିଦ୍ୟାଳୟ ପରିଚାଳନା କମିଟିର ସଭାପତି ବିରେନ୍ଦ୍ର ବିଶିଙ୍କୁ ପଚାରିବାରେ ବିଦ୍ୟାଳୟରେ ଠିକ ଭାବେ ଶିକ୍ଷାଦାନ ଚାଲୁଥିଲା। ଶିକ୍ଷା ବିଭାଗ ଜଣେମାତ୍ର ଶିକ୍ଷୟିତ୍ରୀଙ୍କୁ କାହିଁକି ବଦଳି କଲେ ଜଣାପଡୁନାହିଁ। ବଦଳି ବାତିଲ କରି ପୁଣି ଉକ୍ତ ବିଦ୍ୟାଳୟରେ ନିଯୁକ୍ତି ନ ଦେବା ପର୍ଯ୍ୟନ୍ତ ତାଲା ପଡିବ ବୋଲି କହିଥିଲେ।