ଶେରଗଡ଼,୧୨ା୭(ଡି.ଏନ୍.ଏ.) : ଦିନକୁ ଦିନ ଗଞ୍ଜାମ ଜିଲା ଶେରଗଡ଼ରେ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିଚାଲିଛି। ଅଦ୍ୟାବଧି ବ୍ଲକର ୨୦ରୁ ଅଧିକ ଗ୍ରାମରେ ୪୫ଜଣ ଆକ୍ରାନ୍ତ ଚିହ୍ନଟ ହୋଇସାରିଲେଣି।
ବ୍ଲକ ସୂତ୍ରରୁ ପ୍ରକାଶ, ଏହି ଆକ୍ରାନ୍ତଙ୍କ ମଧ୍ୟରୁ ୨୦ଜଣ ସୁସ୍ଥ ହୋଇ ଫେରିଲେଣି। ତଥାପି ପ୍ରତିଦିନ ରୋଗୀ ସଂଖ୍ୟା ବାହାରିବା ପ୍ରଶାସନ ପାଇଁ ମୁଣ୍ଡବ୍ୟଥାର କାରଣ ପାଲଟିଛି। ରବିବାର ସକାଳେ ତହସିଲଦାର ବିଭିନ୍ନ ଚା’ଦୋକାନରେ ଚଢ଼ାଉ କରିଛନ୍ତି। ବ୍ଲକର ବରମୁଣ୍ଡଳୀ, କରଡ଼ାକନା, ବନ୍ଧାଗୁଡା ଗ୍ରାମର ଛକରେ ଥିବା ଚା’ ଦୋକାନକୁ ବନ୍ଦ କରିଛନ୍ତି। ପରେ ତହସିଲଦାର ଗୋଟିଏ ପରିବାରର ଟ୍ରାଭେଲ୍ ହିଷ୍ଟ୍ରି ସହ କଣ୍ଟ୍ରାକ୍ଟ ଟ୍ରେସିଂ ଆରମ୍ଭ କରିଛନ୍ତି। ଗ୍ରାମର ଜଣେ ପିଜଟିଭ୍ ବାହାରିବା ପରେ ତହସିଲଦାର ଏହି ଚଢ଼ାଉ କରିଛନ୍ତି। ଗ୍ରାମରେ ସାମାଜିକ ଦୂରତ୍ୱ ମାନିବା, ମାସ୍କ ପିନ୍ଧିବା, ହାତକୁ ସାବୁନରେ ଦିନକୁ ୪ଥର ଧୋଇବାକୁ ପରାମର୍ଶ ଦେଇଛନ୍ତି। ଏହା ପରେ ଶେରଗଡ଼ ଚାରିଛକକୁ ଆସି ଆମାନିଆମାନଙ୍କୁ ତାଗିଦ୍ କରିଥିଲେ। ଉକ୍ତ କାର୍ଯ୍ୟରେ ତହସିଲଦାର ଡ. ଦୟାସିନ୍ଧୁ ପରିଡ଼ା, ଅତିରିକ୍ତ ତହସିଲଦାର ଅକ୍ଷୟ କୁମାର ମଲ୍ଲିକ, ମନୋଜ କୁମାର ନାହାକଙ୍କ ସମେତ ଶେରଗଡ଼ ପୋଲିସ ସାମିଲ ଥିଲେ।