ହାଇଦ୍ରାବାଦ, ୫।୫:ବହୁ ଚର୍ଚ୍ଚିତ ରୋହିତ ବେମୁଲା ଆତ୍ମହତ୍ୟା ମାମଲାରେ ସାଇବରାବାଦ ପୋଲିସ ପକ୍ଷରୁ ଜାରି ହୋଇଥିବା କ୍ଲୋଜର ରିପୋର୍ଟକୁ ନେଇ ରୋହିତଙ୍କ ପରିବାର ପକ୍ଷରୁ ଅସନ୍ତୋଷ ପ୍ରକାଶ କରାଯାଇଥିଲା। ଏହି ମାମଲାର ପୁନଃ ତଦନ୍ତ ପାଇଁ କୋର୍ଟଙ୍କ ନିକଟରେ ଖୁବଶୀଘ୍ର ଆବେଦନ ଦାଖଲ କରାଯିବ ବୋଲି ତେଲଙ୍ଗାନା ସରକାରଙ୍କ ସୁତ୍ରରୁ ଜଣାପଡ଼ିଛି। ଏହି କ୍ଲୋଜର ରିପୋର୍ଟରେ ଅନେକ ଅନିୟମିତତା ରହିଥିବା ଦର୍ଶାଇ ତେଲଙ୍ଗାନାର ରେବନ୍ତ ରେଡ୍ଡୀ ସରକାର ରୋହିତଙ୍କ ପରିବାରକୁ ନ୍ୟାୟ ପ୍ରଦାନ କରିବେ ବୋଲି କଂଗ୍ରେସ ମହାସଚିବ କେ.ସି ଭେଣୁଗୋପାଳ ରବିବାର କହିଛନ୍ତି। ସେହିପରି କେନ୍ଦ୍ରରେ କଂଗ୍ରେସ ସରକାର ଆସିଲେ ରୋହିତ ବେମୁଲା ଆଇନ ଅଣାଯିବ। ବିଶ୍ୱବିଦ୍ୟାଶୟ କ୍ୟାମ୍ପସ ଗୁଡ଼ିକରେ ସାମାଜିକ ଓ ଆର୍ଥିକ ଭାବେ ପଛୁଆ ରହିଥିବା କୌଣସି ଛାତ୍ରଙ୍କ ପ୍ରତି ଜାତି ଓ ଧର୍ମ ଆଧାରରେ ଉତ୍ପୀଡ଼ନ ବିରୋଧରେ ଏହି ଆଇନ ଆସିବ ବୋଲି ସେ କହିଛନ୍ତି। ସୂଚନାଯୋଗ୍ୟ, ଶୁକ୍ରବାର ସାଇବରାବାଦ ପୋଲିସ ପକ୍ଷରୁ ଜାରି ହୋଇଥିବା କ୍ଲୋଜର ରିପୋର୍ଟରେ ରୋହିତ ଦଳିତ ନ ହୋଇ ଓବିସି ବର୍ଗର ହୋଇଥିବା ପ୍ରକାଶ ପାଇଥିଲା। ଦଳିତ ହୋଇ ନ ଥିବା ଖବର ପ୍ରଘଟ ହେବା ଭୟରେ ରୋହିତ ଆତ୍ମହତ୍ୟା କରିଥିବା ଏହି ରିପୋର୍ଟରେ ଉଲ୍ଲେଖ ରହିଛି।