ଦାରିଙ୍ଗବାଡି,୧୨।୪(ଡି.ଏନ.ଏ.): ଓଡିଶାର କଶ୍ମୀର କୁହାଯାଉଥିବା କନ୍ଧମାଳ ଜିଲା ଦାରିଙ୍ଗବାଡି ଅଞ୍ଚଳରେ ଗତ ଦୁଇ ଦିନ ତାପମାତ୍ରା ବୃଦ୍ଧି ପାଇଛି। ମଙ୍ଗଳବାର ସଂଧ୍ୟା ସୁଦ୍ଧା ସର୍ବାଧିକ ୩୪.୫ ଡିଗ୍ରୀ ତାପମାତ୍ରା ରହିଥିବା ବେଳେ ବୁଧବାର ସକାଳ ସୁଦ୍ଧା ସର୍ବନିମ୍ମ ୨୦.୫ ଡିଗ୍ରୀ ରହିଥିବା ଦାରିଙ୍ଗବାଡି ବିଡ଼ିଓ ଗଦାଧର ପାତ୍ର ସୂଚନା ଦେଇଛନ୍ତି। ବୁଧବାର ମାଧ୍ୟାନ୍ନରେ ଯେଉଁ ଭଳି ଅସହ୍ୟ ଗରମ ହେଉଛି ଆହୁରି ତାପମାତ୍ରା ବୃଦ୍ଧି ହୋଇଥିବା ଆଶଙ୍କା କରାଯାଉଛି। ସୂଚନା ଅନୁଯାୟୀ ଗତ ୩ ଦିନ ହେଲା ଅଞ୍ଚଳରେ କାଳ ବୈଶାଖୀରେ ବର୍ଷା ହୋଇ ନ ଥିବା ବେଳେ ଅଞ୍ଚଳରେ ଗ୍ରୀଷ୍ମ ପ୍ରବାହ ବୃଦ୍ଧି ପାଇଛି। ଖରା ଗରମ ଯୋଗୁ ଲୋକେ କାମଧନ୍ଦା କରିବା ମୁସ୍କିଲ ହୋଇପଡୁଛି। ସେପଟେ ଜଳ ଅଭାବ ଯୋଗୁ ପନିପରିବା ଚାଷ ହୋଇପାରୁ ନ ଥିବା ଜଣାପଡିଛି।