ଭୁବନେଶ୍ୱର,୫।୧(ବ୍ୟୁରୋ): ରାଜ୍ୟରେ ଶୀତ ହ୍ରାସ ପାଇଛି। ଆଗାମୀ ଦିନରେ ଆହୁରି କମିବ। ମଙ୍ଗଳବାରଠାରୁ ଆସନ୍ତା ୯ ତାରିଖଯାଏ ପାରଦ ଉପରକୁ ଉଠିବ। ୧୦ ତାରିଖରୁ ୧ରୁ ୨ ଡିଗ୍ରୀ ତଳକୁ ଖସିବ। ତେବେ ଆଉ ହାଡ଼ଭଙ୍ଗା ଶୀତର ସମ୍ଭାବନା ନାହିଁ। ଚଳିତବର୍ଷ ଡିସେମ୍ବର କିମ୍ବା ଜାନୁୟାରୀ ପ୍ରଥମ ସପ୍ତାହ ସୁଦ୍ଧା ରାଜ୍ୟରେ ବର୍ଷା ହୋଇନାହିଁ। ଫଳରେ ରାଜ୍ୟରେ ଶୀତର ପ୍ରକୋପ ବଢ଼ିଲା ନାହିଁ। ଅଳ୍ପ କିଛି ଦିନ କେତେକ ସ୍ଥାନରେ ସର୍ବନିମ୍ନ ତାପମାତ୍ରା ୫ରୁ ୭ ଡିଗ୍ରୀ ସେଲ୍ସିୟସ୍ ମଧ୍ୟରେ ରହିବା ପରେ ପାରଦ ୧୦ ଡିଗ୍ରୀ ଉପରକୁ ଉଠିଯାଇଛି। ଏପରି କି କେତେକ ସ୍ଥାନରେ ସର୍ବନିମ୍ନ ତାପମାତ୍ରା ୧୫ରୁ ୧୮ ଡିଗ୍ରୀ ଉପରେ ରହିଛି। ସେହିପରି ଦିନର ତାପମାତ୍ରା ୩୨ ଡିଗ୍ରୀକୁ ଛୁଇଁଛି। ଆଉ କିଛି ଦିନ ହାଲୁକା ଶୀତ ରହିବ; ମାତ୍ର ପାରଦ ଆଉ ୧୦ ଡିଗ୍ରୀ ତଳକୁ ଖସିବ ନାହିଁ। ଫେବୃୟାରୀ ଦ୍ୱିତୀୟ ସପ୍ତାହରୁ ଦିନର ତାପମାତ୍ରା ଉପରମୁହାଁ ହେବ। ରାତିରେ ହାଲୁକା ଥଣ୍ଡା ରହିଲେ ମଧ୍ୟ ଦିନର ତାପମାତ୍ରା ୩୫ ଡିଗ୍ରୀ ଉପରକୁ ଟପିଯିବ। ରାଜ୍ୟରେ ଆସନ୍ତା ଦୁଇଦିନ ୬ ଜିଲାରେ କୁହୁଡ଼ି ହେବାର ସମ୍ଭାବାନ ରହିଛି। ସେହି ଜିଲାଗୁଡ଼ିକ ହେଲା କଟକ, ଜଗତ୍ସିଂହପୁର, ଭଦ୍ରକ, ଖୋର୍ଦ୍ଧା, ବୌଦ୍ଧ ଓ କନ୍ଧମାଳ। ଏହିସବୁ ଜିଲାରେ ଘନକୁହୁଡି ହେବାର ସମ୍ଭାବନା ରହିଛି। ଏ ନେଇ ପାଣିିପାଗ ବିଭାଗ ପକ୍ଷରୁ ଏଲୋଓ୍ବାର୍ନିଂ ଜାରି କରାଯାଇଛି। ସୋମବାର କୋରାପୁଟରେ ସର୍ବନିମ୍ନ ତାପମାତ୍ରା ୯.୬ ଡିଗ୍ରୀ ସେଲ୍ସିୟସ ରେକର୍ଡ କରାଯାଇଥିବା ବେଳେ ଜଗତ୍ସିଂହପୁର, ଭଦ୍ରକ, ଖୋର୍ଦ୍ଧା, ବୌଦ୍ଧ, କନ୍ଧମାଳ ଜିଲାରେ ଘନକୁହୁଡ଼ି ହେବା ସମ୍ଭାବନା ରହିଛି।
